![](https://utusansarawak.com.my/wp-content/uploads/2022/06/TIONG0SUBSIDI.png)
DATO’ Seri Tiong King Sing
BINTULU: Nadai subsidi diberi ngagai sida ke nupi manuk ngayanka perintah enda berapa peduli ngagai pengawa ngasilka pemakai ba menua tu, ku Kaban Parlimen Bintulu Dato’ Seri Tiong King Sing.
Ku iya, perintah enda berapa mereti senentang semua sistem pengawa ngasilka pemakai dikena mutarka penanggul kurang bekal manuk enggau telu.
“Ba maya ke sama, perintah mega enda madahka pekara ke betul senentang sebana sida ke batanam enggau betup ketegal semua kos bekal rantai pemakai ke niki.
“Sida tu orang ke sebana amat ketegal penanggul rantai ngasilka pemakai. Perintah patut mutarka penanggul tu lebih serius,” ku iya baka ke bisi disebut dalam Facebook kena Hari Enam ke udah.
Ku iya, proses nupi manuk nyentuka besai sereta nyadi manuk dagin lalu ulih dijual ngena ungkus ke besai amat.
“Ketegal nya, mayuh bengkah opis perintah patut berunding baka ni chara meri penguntung maksimum ari mekanism subsidi sereta ngena sumber lebih efektif ke ulih meri penguntung ngagai rayat.
“Iya ke betul kebuah kurang manuk enggau telu ketegal rega pemakai manuk ba tikas global ke mar amat sereta enda ulih ditentuka, kelimpah ari kos pengawa nupi manuk ke nyau majak betambah mayuh.
“Baka ni sida ke betupi ulih betan nyentukka manuk ke ditupi besai sereta sedia dijual laban sida iya semina ulih minta subsidi ba tikas penudi ratai pengawa mekal?” ku iya nanya.
Ketegal nya iya ti mega Kaban Kunsil Nengeri (ADUN) Dudong ngarapka perintah ulih berundingka perambu ngemendarka sida ke betupi minta subsidi dibayar opis ke patut nitihka dokumen meli baka ke diberi pemekal pemakai manuk.
“Ba maya ke diatu, sida ke betupi bedaja chara mit enda ulih meli pemakai manuk ngena rega lebiuh mudah ari pemekal laban sida iya enda ulih meli chara mayuh sebaka enggau sida ke import pemakai manuk.
“Ngena chara ke baka tu aku pechaya sebana sida ke betupi ulih dikurangka. Sida iya mega ulih napi gelumbang rega komoditi global ke niki ketegal bisi bantu ari perintah.
“Kitai patut nemu enda ngira berapa mayuh duit ulih dikena, iya sigi enda ulih mantu semua orang chara efektif laban chara ngena mekanism subsidi enda berapa betul,” ku iya.