Mohammad Razi Sitam maya betemu enggau peranak genturung pendiau ke bisi bekaul enggau pengawa meri pampas tanah endur ngemujuka projek nagang ampuh.
DEBAK: Agih penyampau RM30 juta udah dikemendarka Perintah Sarawak dikena mutarka penanggul ampuh ngenyit ba Debak.
Sapit Menteri Pemansang Indu, Nembiak Mit enggau Pengelantang Komuniti Mohammad Razi Sitam madahka, pengawa ngemujurka projek nagang ampuh ba genturung pendiau di Pelilih Mit Debak deka dijampatka agi ngambika ulih mutarka penanggul ampuh ke seruran bisi diasaika sida ke diau ba endur nya.
“Sigi endang udah bisi perambu projek nagang ampuh ke deka dikemujurka ba genturung pendiau ke bisi penanggul ampuh. Lebuh kami deka ngemujurka projek nya, kami napi mayuh bengkah penanggul.
“Kami pechaya penanggul ke ngasuh projek enda ulih dikemujurka ngelama tu ulih diputarka enda lama agi,” ku iya lebuh ngena lepa puang iya betemu enggau sida ke bisi bekaul enggau pampas tanah endur ngemujurka perojek nagang ampuh ba rumah iya empu kena Hari Dua ke udah.
Lebuh ngenang senentang pekara nya, Razi ti mega Kaban Kunsil Nengeri (ADUN) Saribas ngasuh sida ke diau ba endur nya meri kerejasama ngambika projek nya ulih dikemujurka enggau jampat.
Sida ke diau ba endur nya beterima kasih ngagai ADUN Saribas laban peduli amat sereta ngasuh projek nagang ampuh nya dikenuluka ba kandang menua nya.
Lebuh bejuraika senentang pampas, peranak genturung pendiau ba kendang menua nya minta penyampau pampas ditambahka ari penyampau ke udah ditetapka perintah.
Razi setuju enggau peminta sida sereta deka ngenataika pekara nya ngagai Opis Tanah enggau Survei.
About Post Author
