![](https://utusansarawak.com.my/wp-content/uploads/2020/07/1.-Mayas1.jpg)
A newborn gorilla suckles on its mother's teat at Amsterdam Artis Zoo March 13, 2007. The gender and name of the baby is not yet known. The baby is the offspring of mother Binti and father Akili. REUTERS/Toussaint Kluiters (NETHERLANDS)
![](https://www.utusansarawak.com.my/wp-content/uploads/2020/07/1.-Mayas1-818x1024.jpg)
SIGI amat mayuh bengkah cherita udah ditusui orang ke tuai kelia pasal pengawa kitai bansa ke ngaga ruang bilik, bumai betaun enggau jalai pengidup bukai. Lalu pia mega pemayuh bup ke bisi ngenang pasal asal pengawa siti-siti. Ari semua nya, sekalika dicherita nyadi ensera tauka ditulis dalam bup, ninting iti cherita enggau ensera nya bisi penyelai ari pangan diri, taja pan sekeda bisi mega penyama mimit.
Siti cherita pasal asal kitai Iban nemu beranak engka udah bisi ditulis dalam bup. Cherita pasal beranak tu mayuh bengkah, seneka ati kitai milih ari ni kuing iya. Nyadi niang ini menya kala ga nusui cherita pasal beranak munyi tulis aku ditu.
JEMAN SEMAK ANTU
Nyadi jeman kelia, lebuh menua agi semak antu semak jelu, lebuh anak mensia bedau tentu jauh ari utai bukai dalam dunya tu, agi begulai sejalai enggau semua utai idup, enti lebuh indu beranak, sida deka dibuntas pia aja. Anak nya idup tang indai iya mati.
Ari tegal nya, semua bala indu ke beranak maya nya mati magang udah sida ngadaka anak, laban nadai jalai bukai ngulihka anak enti enda muntas perut indai iya. Nya alai rambau nya kelia, nadai siku meh bala indu ulih beranak lebih ari sekali, laban semua sida mati udah ngada anak sida ti terubah nya.
Nyadi rambau nya kelia bisi siku lelaki penama Ungit, ke baru bebini. Nyadi nyau kelama seduai udah begulai, dia deh bini Ungit nyau betubuh bisi. Meda baka nya, tudah Ungit pan nyau tusah ati laban takut ditinggal bini iya ke tentu deka mati lebuh ngadaka anak sedua iya ila.
Laban ati kelalu tusah, Ungit selalu enggai begulai enggau orang bukai agi. Iya selalu nurun kediri ke tanah, ka babas begiga utai dempa ungkup seduai melaki bini.
Nyau kepuas ke selalu pereman kediri ba sebelah tanah, ba sebelah babas, dia deh iya ninga utai nyau chapuh ba puchuk kayu. Iya lalu ngansak mansang semak agi, belalai ba pun kayu.
Peda iya mayas ngeringak mela indu siku gali atas rajang. Peda iya tak ditekan-tekan sida perut indu mayas nya. Dia iya tekenyit meda anak indu nya lalu ada.
“Nya lia tenchang ba dan kayu,” ku jaku sida didinga iya. Udah nya peda iya lia nya tadi lalu diunsut-unsutka sida ba tubuh indu ke beranak. Dia iya meda indu nya lalu tau duduk.
“Nya gaya mayas ngintu indu beranak, ni enda idup indai iya,” pia ku Ungit bejaku kediri.Seninjik iya bisi meda lia mayas nya labuh ari puchuk kayu.
Nya alai lebuh mayas enda meda iya lalu beguai ngambi papung lia ke lalu dibai iya pulai ngagai bini iya. Dia iya lalu madah ngagai bini iya chara enggau jalai mayas ngintu indu beranak baka ke udah dipeda dalam babas nya tadi.
Udah nya seduai iya lalu diau kediri, jauh mimit ari orang bukai. Mata lia nya tadi lalu tanam seduai, lalu nyadi senyadi tumbuh.
Nyau datai ba bulan bini iya beranak, dia laki iya lalu naban iya ngagai lubang batu takut ka iya kena laban ribut enggau ujan.
Iya lalu mela bini iya beranak nunda gamal bela mayas ke udah dipeda iya dulu suba. Naka pengiruh meh tudah tuai mela bini iya, tang empa pengangkun sereta penyayau Ungit ka bini iya, nya alai mujur meh iya ngintu bini enggau anak iya.
BEKINDU NGANGATKA TUBUH
Bini iya lalu lantang meda diri idup udah bekau ngadaka anak, lalu keterubah indu menua nya idup udah bekau beranak. Dia iya lalu minta penyadika Ungit api, laban kena iya bekindu ngangatka tubuh, laban enti tubuh angat, berasai nyamai agi. Lalu nya meh terubah asal bala indu nemu bekindu udah sida beranak – ba aku siku enti aku meda letur abi bekindu sida niang indai menya, nya meh tanda pemedis sida udah mai kitai sama enggau ba dunya injau tu, lalu nya mega siti pemadah ngagai bala anak pemesai reti indai kitai ke udah ngadai nyawa beranakka kitai.
Nyadi bala sida serumah nyau irau ati laban lama nadai meda seduai. Digiga orang ngagai langkau seduai, nadai ga dia. Meda bakanya, orang pan lalu ngiga ngagai lubang batu. Datai dia, lalu dikangau, tang nadai ga nyaut.
Udah nya baru sida bisi meda asap bisi pansut ari lubang batu. Sida pan bisi ga ensium utai tak bau rengut. Nyadi utai ti bau rengut nya lia ke dikena indu nya beranak.
Sida lalu tama ngagai lubang batu lalu tekenyit meda indu nya bekindu semak siku anak mit ti baru ada. Ungit tu dipeda sida tuchum ketawa nyenguk gamal anak lelaki iya ti baru ada.
Dia bala sida serumah lalu nanya ni jalai iya ngintu bini beranak. Ungit pan lalu nusui jerita iya ke meda mayas nya ari pun munyi ke dulu tadi. Iya lalu madah sida ulih ngambi tambak lia ari semak langkau iya.
Berengkah ari nya bala mensia mayuh lalu belabuh betanam dia. Sida lalu balat pengangkun ka Ungit ke udah bulih penemu sereta lalu magi lia ngagai sida. Lalu berindik ari nya meh bala mensia nemu ngintu bini beranak.
Nyadi tudah anak Ungit nya tadi tak bebulu. Lalu lebuh iya besai agi, bulu iya nyau bauh sebauh. Lebuh iya mansang udah besai bendar, dia deh bulu iya nyau belikau-likau.
Dia Ungit seduai bini iya lalu bejaku enggau anak seduai, “Oh, kati alai nuan tu tak mengat nyelai ari orang bukai deh anak, tak bebulu. Tubuh nuan anak baka mensia, tang nuan tu tak bebulu baka jelu. Enda meh kami duai indai nuan nemu begulai enggau nuan tu anak,” pia ku jaku Ungit.
“Endang sigi amat jaku seduai nya apai, lalu enti seduai enggai begulai enggau aku, kati ku aku enggau deh apai, indai,” pia ku iya.
BEBALI NYADI REMAUNG
Udah bekau nya, anak seduai nya tadi nyau bejalai. Apin jauh udah iya ngejangka endur nya, iya lalu bebali nyadi remaung. Datai iya ba semak tuchung bukit, iya lalu negung inggar bendar.
Nyau munyi ku dalam sebut Lemambang timang jalung, lebuh ke nyebut datai ba menua remaung: …Nya ga menua Aji ke berani tau tenung raja suka remaung, iya ke landik negung, lubang ooh mua,…ooh mua lubang.
“Nama utai empu nyawa, antu jelu kini?” pia ku Ungit. “Enti baka menua ke bisi remaung, tentu nya utai ke empu nyawa. Manah aku nyidi bekau anak tua tadi,” pia ku Ungit.
Iya lalu nyidi bekau abi kaki anak, tang semina bekau kaki jelu ti bisi temu.
“Tentu mati meh anak aku tu, empa jelu ke bemunyi nya tadi,” pia ku puchau tudah Ungit. Iya pan lalu pulai ka rumah seduai madah ngagai bini iya bekau anak seduai ti nadai temu tunga, mina nemu bekau kaki jelu aja.
Enda mengat lama, kira dua hari udah nya, dia seduai bisi ninga nyawa utai negung semak endur seduai ke diau. Ungit lalu pansut ari lubang batu, lalu nyampi.
“Aku nadai kala ninga utai munyi tu. Enti nuan nya antu tauka jelu, anang munuh anak telesak aku. Enti nuan udah munuh anjung pulai kitu bangkai iya.”
Enda lama udah nya dinga tak semerap babas semak nya dia, peda tak anak iya empu. Dia anak iya lalu bejaku, “Anang agi bejaku nuan apai, aku meh ke bemunyi didinga nuan nya tadi. Aku tu nyadi remaung. Seduai indai diau manah-manah enggai ka aku saru, ku iya.
Iya lalu nampung jaku, “Enti kita meda bekau aku makai, anang negu bekau nya. Enti kita meda tai aku, bap enggau daun idup. Enti kita meda tubuh aku empu, anang tak terus lalu belanda, terus rari. Surut dulu, nya baru belanda.”
Tudah Ungit seduai bini iya tu nyau nyinuk ninga ajar anak seduai. Siku nya pan lalu nampung jaku iya baru, “Nyadi tu pantang enti kita berapi, anang mutarka papung unggat. Anang nunu lemetak tauka gamat. Enti kita diau ba langkau, anang ngelempaika utai ba mua pintu.
“Anang nyakap kami enggau jaku. Enti kita meda buah tau tak bisi, nadai batang nadai pun, anang makai buah nya. Nya taju ditaan kami. Enti kitai makai buah nya, kita mati ulih kami,” pia ku jaku anak ngajar apai seduai indai iya. Udah nya iya lalu lesap, nadai temu tunga.
Agi dulu kelia, mayuh remaung diau ba pulau Borneo tu, tang diatu nyangka nyau udah punas. Kebuah orang nemu bisi remaung laban orang mayuh nemu kerubung kerang kerubung lukan ba sebelah mua lubang ba atas tuchung bukit ke tinggi.
Kemayatu, enti kitai bisi rembus ngagai kampung jerung nadai dinga kesung nyumbuh bujang, kampung sunyi nadai dinga kesuie munyi orang orang, lalu enti kitai bisi ngereja utai salah pantang, tau kitai bisi ninga nyawa remaung. Tang nya ukai iya ti bendar, nya nyawa antu mali diri nyadi remaung. Nyadi udah nya iya lalu lesap nadai temu tunga.
BUKIT TENGALAT
Nya alai bepun ari cherita Ungit seduai bini enggau anak iya ti bebali nyadi remaung, bala kitai bansa rambau nya lalu belabuh nemu ngintu diri beranak. Ka tambah nya sida mega nemu bebasa ka antu ka jelu lebuh bejalai dalam babas enggau kampung, lebih agi tegal takut kena laban taju remaung.
Ba menua kami, bisi bukit ke beberita iya nya Bukit Tengalat. Enti undur ngili Batang Krian nadai orang enda tepedaka Bukit Tengalat laban ke jauh tinggi ari bukti bukai.
Nyadi ku cherita orang tuai menya bukit nya bisi diuan remaung tang enda kala ayan segenda agi diatu. Mina nyawa iya bisi udah kala didinga negung dulu menya. Bisi ga orang kala ngambi mimpi, lalu bisi meh ke madah diri tulung remaung ari Bukit Tengalat.
Kelimpah ari remaung, bisi ga cherita siti madah orang kala nemu telaga Kumang ba Bukit Tengalat. Barang sapa ke tetemuka nya, deka jadi bilik lansik, laban ai telaga nya tau ambi ka pemandang, iya nya ubat bisa ke tau jadi pemanis enggau penunduk.
Tudah pangan laban ke numbas pemagas sereta buyan, selalu bisi geli mimit ngagai Bukit Tengalat nya. Ukai tegal takut ka remaung tang takut betemu enggau Kumang. Badi ngapa enti lalu enda ulih pulai ngagai Kumang indai anak rumah diri empu.
Ulih TELESA EMPERAN