LAWAS: Pengawa ngerachun enggau nubai ikan ba sungai ukai semina ngerusakka eko sistem, tang tau ngemunaska mayuh bengkah spesis ikan enggau pengidup sungai.
Sapit Kepala Menteri Datuk Amar Haji Awang Tengah Ali Hassan ngasaika diri nesal amat sereta ringat lebuh dipadahka senentang bisi orang nubai sereta ngerachun ikan ba Sungai Sundar.
Iya ti mega Menteri Pemansang Bandar enggau Pengeraja Asal II, Menteri Dagang Antarabansa enggau Industri, Terminal Industri enggau Menteri Pemansang Entrepreneur Sarawak madahka pengarang berita munyi nya pengudah ngelepaska 100 ribu iku anak undang ba Sungai Sundar
Ketegal nya iya minta peranak kampung ngeriput terus ngagai sida ke bekusa enti nyema bisi nemu senentang pengawa nubai ikan ba sungai di Sundar.
“Anang takut ngeriput pengawa ke tau ngemunaska semua pengidup sungai. Pengawa ke baka nya ukai semina nadai moral tang ngemunaska penatai pemisi enggau jereki orang berikan sungai,” ku iya.
Ketegal nya Awang Tengah ngasuh semua orang ke diau ba endur nya bekerejasama enggau sida ke bekuasa nyaga jereki ke bisi ba sungai.
Sama bisi enggau ADUN Batu Danau Paulus Palu Gumbang, Residen Bagi Menua Limbang Ir Ahmad Denney Ahmad Fauzi, Pemesai Betanam Betupi Limbang Japaruddin bin Ali, Pemesai Pelilih Lawas Ladin Atok enggau bala tuai raban bansa.