KUCHING: Sebuah lori ngundan tong gas belantak enggau sebuah kerita 4WD maya penusah bebadi jalai raya ke nyadi ba Taman Batu Kitang kena Hari Tiga ke udah.
Nitihka pengari Bilik Operasyen Bomba Negeri Sarawak, maya penusah bebadi nya nyadi deriba lori tekepit ba penuduk mua endur deriba duduk.
“Kami nerima kangau penusah bebadi jalai raya nya urung pukul 12.43 tengah hari lalu pengudah nya kami enggau naka penyampat nganjung siti tim ari Balai Bomba dan Penyelamat (BBP) Batu Lintang ngelawa endur nya.
“Lebuh datai ba endur nya raban bomba ngerat pintu mua lori ngena perengka spesial ngambika mansa ulih dipansutka sereta diperubat,” ku iya lebuh meri penerang ngagai pengarang berita.
Pengudah raban EMRS meresa mansa iya dipeda agi ngelala raban bomba ke mantu iya taja pan dipeda trauma.
“Mansa dianjung ngagai hospital ngena kerita EMRS ngambika diperubat lalu deriba kerita 4WD nadai bakal.
“Pengudah nya tim bomba meresa endur penusah nya nyadi dikena nentuka endur nya selamat,” ku iya.