SIBU: Rayat Malaysia diasuh bekunsika ngasaika pemanah beserimabi enggau Nyambut Hari Malaysia 2020 ngena ‘hashtag’ #MomenNegaraku ba platform media sosial diri empu.
Nya munyi jaku pesan Menteri Komunikasyen enggau Multimedia Malaysia, Dato’ Saifuddin Abdullah maya aum media bekaul enggau Nyambut Hari Malaysia pengudah nyereta Aum Komiti Besai Nyambut Hari Malaysia 2020 begulai enggau Menteri Utiliti Dato Sri Dr. Stephen Rundi Utom ba Ringkat 6, Hotel Kingwood kena Hari Dua ke udah.
Ku Saifuddin, semua rayat Malaysia sama enggau nyereta Nyambut Hari Malaysia beguna amat laban iya chara dikena madangka apresiasyen enggau pengerindu ngagai menua.
“Rayat Malaysia ulih bekunsika maya pengaga nyadi rayat Malaysia ngena chara ngepaika menira sereta ngujakka menira Jalur Gemilang kelimpah ari ngena baju nasional tauka ngepan raban bansa diri empu,” ku Saifuddin.
Lebuh ngenang pengawa nyediaka diri Nyambut Hari Malaysia 2020 ke deka diatur ba Stadium Betutup Sibu kena 16 September iya madahka, program nya deka diatur nitihka Prosedur Operasi Standard (SOP) laban kitai agi ba maya Gerah Nyaga Pejalai Maya Nyuman (PKPP) ketegal Covid-19 baka ke diatu.
“Aku meransang ngambika semua rayat Malaysia meda program chara terus maya nyambut Hari Malaydia ke bisi disediaka RTM enggau stesen televisyen bukai maya malam nyambut,” ku iya.
Dr. Rundi meri apresiasyen enggau terima kasih ngagai perintah besai ke udah milih nengeri Sarawak endur ngatur Pengerami Nyambut Hari Malaysia dua taun bejurut.
Ku Dr. Rundi, motif ke dibantaika maya nyambut kena 16 September mandangka apresiasyen rayat Malaysia ngagai pengawa numbuhka Malaysia sereta mantaika pengerindu rayat Malaysia beserakup enggau pangan diri.
Pengawa ke disengkaum dalam Program Nyambut Hari Malaysia ke sekali tu nya madangka eleman main ba pangganu enggau elemen digital ke ulih dipeda mensia mayuh terus ba TV1 enggau media sosial ‘Facebook Live’ ba laman Facebook Unit Komunikasi Awam Sarawak (UKAS), TVSarawak, Astro Awani enggau Sarawak Events Channel.
Pengudah abis aum media Saifuddin enggau Dr. Rundi sereta raban bukai ngelawa Stadium Betutup Sibu laban deka meda chara nyedika diri ba endur nyambut Hari Malaysia.
Sama enggau ngelawa Stadium Betutup Sibu nya Seketeri Opis Menteri Komunikasyen enggau Multimedia, Dato’ Suriani Ahmad.