![](https://utusansarawak.com.my/wp-content/uploads/2020/03/feature-image.jpg)
KUCHING: Kampung (Kpg) Buntal ke kaya enggau rampa menua asal bisi jalai ulih maju enti dikemansangka nyadi palan dagang temuai tebilang ke patut dilawa.
Penulung Menteri Utiliti (Bekal Ai) Datuk Dr Abdul Rahman Junaidi madahka, kebuah baka nya laban genturung pendiau orang berikan nya ulih narit mensia mayuh ngena chara bukai baka kedai nyual asil tasik ke baru ditangkap.
Abdul Rahman mega madahka, genturung pendiau ke bisi urung 3,000 iku orang nya mega bisi nyedia tauka nyual pemaki tasik tebilang ngagai mensia mayuh ke diau ngelingi bandar raya Kuching.
“Genturung pendiau nya bisi ngembuan mayuh pengelebih ke ulih dikemansangka nyadi palan dagang temaui tebilang ke patut dilawa ba Sarawak,” ku iya.
Iya mansutka jaku munyi nya lebuh dirandau pengarang berita pengudah besembiang Solat Jumaat ba Masjid Darul Mutaqqin Kampung Buntal kena Hari Lima ke udah.
Dr Abdul Rahman ti mega Penulung Menteri ba Opis Kepala Menteri (Hal Ehwal Islam enggau DBKU) madahka, Esplanade Buntal ke digaga ngena belanja RM3.7 juta ulih narit mensia mayuh ke deka merindang ati maya ujung minggu ngelawa endur nya.
“Esplanade nya seruran dilawa mensia mayuh maya ujung minggu lebih agi ngagai sida ke deka meda pemanah gaya tasik,” ku iya.
Kelimpah ari nya ku iya, Perintah Sarawak mega deka ngaga jalai raya 8.5 kilometer pemanjai ke nelan belanja RM85 juta dikena nyambung Kampung Bako enggau Kampung Buntal.
“Enti udah tembu ila udah tentu sida ke diau ba Kampung Buntal deka ngasaika lebih mayuh agi pemansang lebih agi ba sektor ekonomi enggau dagang temuai,” ku iya.
Sama bisi enggau Direktor JAIS Khalidi Ibrahim enggau Pemanchaa Kuching Utara Roshidi Junai.
Oleh Zarina Abdullah