![](https://utusansarawak.com.my/wp-content/uploads/2022/08/image-18-1024x678.png)
Tusun Ke-20
KETERUBAH dalam Tusun Ke-20 ti dichelak minggu tu, kitai deka macha tampung leka sada bebuah ‘Nuju Pemaik Dunya Pengelikun Perua’ ti udah dichelak dalam Tusun Ke-19 minggu dulu nyin kemari.
NUJU PEMAIK DUNYA PENGELIKUN PERUA
Pengelikun perua semakin beguyang,
Dirimba penemu selebubu-iru, balat beserekang;
Ditum sebun bum, dang-dang didiang perang,
Seput enggau nyawa semua uchu Awa,
Bekekutang begitang di ujung pedang, puting senapang,
Nambahka ai ke bebali jai,
Angin ngeledin, ozon sawang,
Penyuntuk pemakai ngundang enda belanggang,
Ekonomi, dagang benta tulang, surut ke belakang,
Semakin renggang dih taur dunya,
Semakin meranggang dih jaul mensia.
Ui! Semua bansa mensia,
Uchu Adam seduai Awa,
Di lima tasik tujuh benua,
Di barat enggau di timur,
Di selatan enggau utara;
Aram kitai besaup nyait langit,
Nadak dunya, ngeratut perua,
Betulung mutik pemaik, nembun pengelikun,
Bekerejasama nanggam semaya,
Ngambika dunya tu liu lepa,
Chelap ada, lindap belama
Alai semua mupuk ngerenut, mutik pengidup
Baka belut enggau raban semut!
Aram kitai bedaraka pengelikun dunya,
Begawaika pemaik perua batan Petara.
Aram berebak kitai bearak, bereta ke mua:
Sapa ke kait, kitai bai tambit dalam seladan;
Sapa ke buta, kitai berap ma, iring bejalan.
Sapa ke bagas nulung ke ngelusu;
Sapa ke pintar nulung ke bagu.
Sapa ke kaya nulung ke mensena,
Sapa ke pemisi nulung ke merinsa.
Sapa ke pandai nulung ke babal,
Sapa ke bidik nulung ke sial.
Sida ke labuh dikatung,
Sida ke rebah disukung,
Sida ke tinggal dianjung,
Sida ke rapas disurung,
Sida ke tengelam dipelepung,
Sida ke rarat diapung.
Ati ke kepapas, ensiang kupas, buai kerupai,
Ati ke bedengki, basu beseri, iar kebukai.
Tudah ke jai, anang dikemeli,
Tudah ke bagu, anang dikemelu,
Tudah ke timpang, anang dikemenang,
Tudah ke nadai, anang dikelanyai!
Dunya tu pesaka kitai,
Perua tu lanting begulai.
Aram sungai kitai terus pegai
Ngambika iya seruran berupai sebaka nanga,
meruan muara.
Kayu terus kitai limbu, intu siru
Ngambika iya seruran betelinsu, mansutka bunga.
Tanah terus kitai simah
Ngambika meruan ami manah,
Tumbuh buah embawang lanja;
Meri kitai tuah, penampung nyawa.
Mata hari terus kitai seridi
Ngambika seruran beseri, meri pengangat.
Bulan terus kitai pinan
Ngambika enda nyelam keleman saru sukat.
Bintang terus kitai tentang
Ngambika enda lelang, saru tiap.
Pemaik mai pengelantang,
Pengelikun mai penyenang;
Pemaik penyukung perua,
Pengelikun penungkat dunya.
DIKENA NGINGATKA PERAYAT DUNYA
Penulis ngasilka sada bebuah ‘Nuju Pemaik Dunya Pengelikun Perua’ ketegal deka ngingatka perayat dunya pasal gaya pemaik enggau pengelikun ke diasaika kitai pengani jam ti diatu. Penulis ngumbai pemaik dunya enggau pengelikun perua tu kemayatu semakin kachau-bilau, selebubu-iru ketegal mayuh leman kebuah, baka penyuntuk pemakai, pengeraja asal ti makin kurang-sekurang, pengangat global, penyakit ke jadika pemunuh mayuh seput enggau pengerampas nyawa mensia. Tang iya ti kelebih agi iya nya pemaik enggau pengelikun beguyang berenyang, begusak tebererak, tusur anchur, rubuh runtuh, lingkap tekerap ketegal perang. Kebuah ti beperang nya (perang mit sekalika besai, ke nampak sekalika belelam) ketegal berebutka menua, kuasa, pangkat, pengeraja enggau penyumbung sekeda tuai ke merintah ngena penyangkam besi. Dalam iya pia, penulis agi meruan bisi pengarap ke semua menua enggau perayat sereta enggau tuai perintah nya mengkang bisi penyayau enggau penyiru ngintu enggau mela dunya tu dalam pemaik enggau pengelikun, laban kengka iya siti tu aja menua kitai, perua kitai ke jadika lanting semua menua enggau dunya. Ka sebuah tu aja dunya ti dibatan Petara ke kitai mensia sebedau kitai pindah ke dunya baru – dunya ke alai kitai deka diau mendam dalam penyenang tauka dalam pemerinsa.
Nangkanka kupas penemu pasal isi sada bebuah ‘Nuju Pemaik Dunya Pengelikun Perua’, bala pemacha dibai penulis nginsut ngagai segenteran sada bebuah ti bejuluk ‘Dunya tu Panggau Pengelulu’.
DUNYA TU PANGGAU PENGELULU
William Shakespeare pemelandai tuai,
Ngumbai pengidup mensia sempama
Ayuk gegendai, kelemayang lelingai,
Mensia sengapa, ampa utai,
Masau hari, ngabiska lemai,
Sesindau baka gerunsau belala makai,
Atas panggau pengelulu dunya tu,
Ke begurau gegiau tinggi gegiai,
Kekenjit ngenditka tumbit kaki kekanjai,
Nelengaka tempenga rasa, dabung landai, bedimbu-awai;
Sekejap alai lalu tekelap, beratan nadai;
Nya ga ensera ke nadai guna,
Dijeritaka orang ke banga, mamau ka parai,
Ke semina penuh auh dejai pengerimai
Nadai utai,
Puang nyelambang,
Sawang lelebang,
Seranta kenang.
Sigi dunya tu panggau pengelulu,
Nyabak sesidak siku-iku,
Betubuh mayuh ketawa rerakah;
Tebelunggit tebalit perua tu,
Lagu ke pemadu sinu,
Nya tebah gundah ke pemadu tusah.
Sigi dunya tu panggau pengelulu,
Ditu orang bejaku, berambai betiu, enda temu apak,
Pangan dikutuk, kaban dikemelu, bemanah diri;
Sempama manuk bejalak, udu pemagak,
Kukuk rauk-rauk, iku melitak, belunyu tai.
Sigi dunya tu panggau pengelulu,
Mulut pulut, ati keladi, tebiat tak siru,
Tangan ngenggam, ngambi kediri, maka nengali;
Nya perangai tuman, ulah runtu, tebiat belau,
Mudah kidan, jampat mari, lengkas ngeransi,
Enda tetemuka umpan, anak diri tegam sekali.
Dunya tu alai mayuh orang ngeluaka pemula,
Enda alah bilang, pimpat tiap, enda ulih tesa.
Bisi ngumbai diri tegigaka atau tuma,
Penuh baka setimpa rutan.
Bisi ngumbai diri tekerukka untak nyamuk,
Penuh kebuk, setepayan bemban;
Bisi ngumbai diri tepulaska perut empiras,
Panjai sebelas, semilan kilan.
BETAMPUNG
Oleh JANANG ENSIRING