![](https://utusansarawak.com.my/wp-content/uploads/2020/08/Huang-1.jpg)
![](https://www.utusansarawak.com.my/wp-content/uploads/2020/08/Huang-1-1024x576.jpg)
SARIKEI: Kaban Kunsil Nengeri (ADUN) N45 Repok, Dato’ Sri Huang Tiong Sii udah ngatur penemuai laban deka meratika pemujur Projek Transformasyen Menua Pesisir (RTP) ba Sekolah Kebangsaan Jenis Cina (SJKC) Bulat.
Penemuai ke diatur empai lama ke udah disereta bala tuai mensia mayuh enggau tim ari Palan Servis N45 Repok.
Huang sigi komited nentuka pemansang infrastuktur sekula diadu sereta dikemanahka agi ngambika meri penyenang ngagai komuniti sekula lebih agi bala nembiak sekula enggau pengajar ke begunaka endur ke lantang maya ngaga pengawa.
Ketegal nya iya seruran ngatur penemuai sereta betemu enggau staf sekula ngambika nemu bansa bantu ke patut diberi ngagai sekula.
Ba taun 2017, Huang mega ngemendarka agih RTP 2017 penyampau RM106,000 diberi ngagai SJKC Bulat.
Ba taun tu iya sekali agi mega ngemendarka agih RTP 2020 penyampau RM53,000 diberi ngagai SJKC Bulat.
Semua agih RTP ke diberi iya nya dikena ngadu enggau ngemanahka infrastruktur ba sekula nya.
Kelimpah ari nya Huang mega meri terima kasih ngagai Perintah Sarawak enggau Kepala Menteri Datuk Patinggi Abang Johari Tun Openg laban seruran ngemeranka pengelantang enggau penyenang pengidup rayat Sarawak.
Ku iya, semua RTP ke diberi ngagai rayat nya ngayanka Perintah Sarawak sigi enggau naka ulih ngemansangka nengeri Sarawak sereta ngemeranka penyenang enggau pengelantang pengidup rayat.
Oleh Earl Anek