![](https://utusansarawak.com.my/wp-content/uploads/2020/08/miring2.jpg)
![](https://www.utusansarawak.com.my/wp-content/uploads/2020/08/miring2.jpg)
TUSUN KEEMPAT
NYAU kepuas, maya bejalai enda berasai sereta enda dipeda indah enda baka penyakit Covid-19 ke lalu enda pukas. Timpuh Atur Mindah Betagang, PKP Renggat Ketiga udah nyauka limpas lalu chungap-chungap renggat iya keempat datai mai berita timpuh nya belabuh ari 29 April 2020 ngagai 12 Mei 2020. Penyakit Covid- 19 nadai nginsit surut; meruan engkabit di menua Sarawak enggai mindah ke bukai.
TULAK BALA
Anak Sarawak nyau abis daya, abis kira. Bala Iban di Mukah teingatka chara aki ini kitai kelia muru antu jai, antu kudi. Bisi berita pasal sida ngatur pengawa miring ti dikumbai Tulak Bala. Biau lemambang maya nya chukup amat. Iya minta penyakit nya mindah misah, rari pegi, anang agi ngachau, anang agi ngeregau. Sida antu penyakit dipinta rari abis, rari lengis, anang tinggal anang cherayan, tekesai terebai ngagai tasik besai, rari ngagai langit tisi. “Ha..ha nyangka nya kebuah sida di Amerika enggau di Brazil ngenyadi nya mati” ku ati Jang, tuchum lelegup. Enda kurang mega orang ba gerija enggau masjid besembiangka menua awakka diberesi ari penyakit nya. Jang lalu ngasaika diri bisi pengerugi besai sekumbang timpuh mindah betagang tu. . Udah beberapa bulan tu seduai enggau bini iya udah nadai nyenguk gerija.
BISI SURUT MIMIT
Bup cherita Tan Sri Datuk Leo Moggie amat ngerinduka ati Jang. Bup nya ngundan cherita iya lebuh agi mit, pasal iya besekula sereta pasal iya ke mujur gawa datai ke maya iya masuk pengawa politik ngujungka iya mujur nyadi menteri ba tiga iti Opis Menteri lalu ngagai maya iya pinchin. Udah pinchin, agi ga iya diambi perintah nyadi Chairman Tenaga National Berhad. Udah Jang tembu macha bup nya, datai berita Covid -19 bisi nginsit mindah mimit, Perintah netapka PKP diubah ngagai PKPB, Perintah Kawalan Pergerakan Bersyarat, Atur Mindah Betagang Belebas ba timpuh ari 13 Mei 2020 ngagai 9 Jun 2020. Reti tu, penyakit nya bisi surut mimit tang perintah bedau berani narit semua undang-undang ti nyekat pemindah rayat.
Rayat tau mindah tang bisi lebas sereta betangkan. Sida mesti minta pemendar ari polis lebuh deka mindah meraka antara pelilih menua.
GAWAI ENDA BERAMI
Maya Atur Mindah Betagang Belebas mungkur maya pengerami Gawai enggau Hari Raya Aidilfitri. Taja pia, pengerami Gawai enggau Hari Raya apin ulih dirami baka selama. Orang apin ulih berami bebala mayuh lalu meruan nitihka SOP tauka atur ti ngintu takah ari pangan diri sereta enda tau betabi jari enggau pangan diri. Sekat nagang orang mindah antara pelilih menua meruan dipejalaika. Orang di rumah panjai tau ngerami Gawai tang mesti nitihka atur nadai berami bebala mayuh. Bansa ni Gawai ti alai orang enda berami? Ati Jang enggau sida sebilik chukup tusah sereta lelengau. Anak enggau uchu seduai iya ke di Kuala Lumpur enda jadi pulai. Bala sida anak ke di Kuching nadai ulih berami. Naka mih pengelengau ke rumah panjai. Ati Jang ingatka gilir sida ngatur Gawai taun tu. Tu kedua kali sida enda nyadi jadi pun Gawai. Taun dalam nyin suba, sida enda begawai laban ipar lelaki iya siku ninggalka dunya enda lama sebedau Gawai. Taun tu sida asa baru. Jang mutuska runding deka merindang diri bemainka lagu Gawai ba YouTube.
JANTAN UMBAT