"Antara 38 projek nya Jalai Nyambung Menua Pesisir (JPD), Projek Ameniti Sosial (PAMS), Projek Pengawa Berumah Rayat Pemadu Seranta (PPRT) sereta 203 projek nyambung jalai ngasuh semua penyamapau ungukus 241 projek nya manggai ba RM13.49 bilion." Sapit Menteri Pemaju Menua Pesisir enggau Wilayah Datuk Rubiah Wang
KUCHING: Lebih ari RM900 juta agih ari Opis Menteri Pemaju Menua Pesisir enggau Wilayah (KKDW) ba taun tu udah diberi ngagai Sarawak dikena ngemujurka 38 bengkah projek perengkaguna ba nengeri tu.
Sapit Menteri Pemaju Menua Pesisir enggau Wilayah Datuk Rubiah Wang madahka, antara 38 projek nya Jalai Nyambung Menua Pesisir (JPD), Projek Ameniti Sosial (PAMS), Projek Pengawa Berumah Rayat Pemadu Seranta (PPRT) sereta 203 projek nyambung jalai ngasuh semua penyamapau ungukus 241 projek nya manggai ba RM13.49 bilion.
Ku iya, KKDW sigi enggau naka ulih nentuka wilayah Sarawak enggau Sabah bisi pemujur ari sukut ekonomi lebih agi ngena inisiatif estet padi ba Sri Aman urung 5,000 hektar pemesai ke nyadi tibang padi baru ba Malaysia.
“Pengawa ke baka nya deka diatur sereta dikemujurka ijinsi ke dipegai KKDW iya nya FELCRA.
“Nya siti ari pengawa ke digaga kami dikena ngamatka juluk ati perintah ke deka meda pemakai ulih dijamin kelimpah siti ari opis menteri ke ngesan tanggungpengawa nyaga menua pesisir ngasuh kami sama bela enggau ngemujurka pengawa ke baka nya,” ku iya.
Iya masutka jaku munyi nya maya bejadi pengerami Relak Begulai Enggau Media ba sebuah hotel ke tebilang malam Hari Enam ke udah.
Ku iya, 10 pesen ari agih RM11.04 bilion Belanja 2023 ke ngasuh betambah ngagai RM510 juta diberi ngagai KKDW enti dibandingka enggau taun ke udah.
Ngena agih ke lebih mayuh agi ku iya, opis menteri deka nentuka pemansang ke setimbang antara dua wilayah iya nya Semenanjung Malaysia enggau kedua-dua wilayah ba Malaysia Timur, Sarawak enggau Sabah.
Kelimpah ari nya ku Rubiah, Sapit Menteri Besai ti mega Menteri KKWD Datuk Seri Dr Ahmad Zahid Hamidi maya nemuai ngagai Kuching berapa minggu ke udah bisi nyebut Perintah Besai setuju deka ngaduka jalai dikena mai lumpung kayu ba Sarawak.
Ku Rubiah, KKDW deka ngesan tanggunjawap ngaduka jalai 578 kilometer pemanjai.
“Tebal agi projek nya ba kandang menua ulu enggau utara Sarawak baka ba kandang menua uli di Miri, Limbang enggau Belaga.
“Opis Menteri nagaka semua projek nya deka ditembuka sebedau Krismas taun tu,” ku iya.