KUASA PETARA... Dulu kelia ujan kudi tau nyadi penusah besai tegal mensia ti ngaga ulah nyelai dini-dini endur.
NTA Tusun Ke-37
Batu Tibang di Ulu Pasai Siong
“Ukai ujan kudi sebarang tu, unggal,” ku Tuai Rumah Changgai meradakka nyawa iya bejaku enggau Tuai Rumah Jelenggai. “Uji tambun ai ujan nya lalu asuh panduk sida ke indu enggau periuk ba dapur dia.” Ninga munyi nya berumban Tuai Rumah Jelenggai ngambi periuk iya ari bilik iya lalu ditambunka iya ba tanju. Enda lama periuk nya penuh. Udah nya ditanggung iya jejampat periuk nya ke dapur . Nasit ga api getah damar ba tempuan iya agi idup dirar-dirar. Nya mih dikena iya manduk ai nya sambil besampi.
“Nya asai kita ai ujan ti nelian datai. Angat menua kami tu. Badu agi kita datai, badu agi kita sangkai ba menua kami ditu. Sepi asai kita…!” Nitih ku penemu Tuai Rumah Changgai tadi enti dipanduk ai ujan kudi nya, nya tau ngasuh ujan bukai jera lalu enggai datai agi. Ari nya ujan kudi tau badu tekala nya. Tang anang ke badu ribut sereta ujan kudi nya, ngasuh nyau munyi digah ai wung di Pelagus.
“Apu, kudi nyadi menua kitai tu laban anak nyumbuh nya tadi, nih! Lagi nuan ensepi enti temu aku!” ku Jelenggai kuchau-kuchau sambil mata iya gining-gining ngiga anak nyumbuh nya tadi. Tang dini dih ulih dipeda agi. Mensia ti ngelinggi iya dia pan ama dipeda ama enda, anang ke anak nyumbuh ti mit baka nya. Tambah mega malam nya nyau petang tegayam.
Mayuh api getah damar udah padam lapan ribut enggau ujan ti tuduh ari sekeda atap ti udah dikesaika ribut. Maya nya Tuai Rumah Jelenggai teingatka diri bisi mai daun mambung ari umai lemai tadi. Kenu ku niang apai iya di Kanowit suba enti ujan kudi daun mambung ti agi idup tau ditunu. Asap iya ti bau nya tau muru antu kudi. Jejampat iya ngambi daun mambung ti diengkah iya di atas para lemai tadi. Daun nya tadi pan tunu iya ba api getah ti agi bedirar daun api iya. Nyau begelembung asap daun mambung nya tadi dipuputka ribut. Tu baru iya lagi. Udah tu nadai nemu chara agi nundukka antu kudi nya. Iga ga Petara enda nyaup kami muru antu kudi tu, ku ati iya bejaku kediri. Andal mimit ati iya. Tang enda ga ujan kudi ngetu. Nadai seiti chara ti semitan.
Ngasuh kudi nya nyau balat agi seretai enggau ribut chelap enda ngetu-ngetu bepuput. Enda lama udah nya rumah panjai nya tadi pan teberarak lalu tumbang. Tiang patah lalu tekesai laban ribut. Gegar perin teberunsai lalu tepelanting ditabanka ribut. Atap daun biru tekebu entah kini ke penunga? Munyi ke nurun ke antu sabak bala sida ke indu-indu enggau anak mit. Betekalau bunyi panjung sida ke laki. Munyi ke dialahka munsuh rauh sereta panjung sida. Maya nya ujan makin lama makin balat sereta chelap-sechelap. Ribut enggau ujan ti nyau asai batu ais nya mungkur bala mensia. Tekala nya mega semua mensia ti bisi ba Rumah Jelenggai nya bebali nyadi batu memagang.
Betegaring batu galang bebelat ari bukit ke lebak. Sekeda tepanggai ba sebelah bandir kayu enggau selepak batang. Sekeda ditabanka terusur ai ujan datai ba Sungai Sekara. Ukai semina mensia aja ke nyadi batu tang mih semua ramu baka tiang, papan enggau atap rumah. Pia mega semua bansa jelu ke ditupi sida baka mayau, uduk, manuk, babi enggau semua utai idup dalam rumah nya. Ukai semina Rumah Jelenggai aja ti kena pangka ribut kudi nya. Semua rumah panjai enggau langkau ke mit-mit enda jauh ari nya mega nerima nasit ti sebaka. Semua nyadi batu magang. Engka nya mih kebuah entigis Sungai Sekara sampai ke sehari tu mayuh bendar batu ke besai-besai ba sungai nya ba sebelah tebing. Mayuh mega batu ti agi bisi ditemu ba sebelah benung sungai nya.
Nyait enggau bini iya ke belalai ba tibang malam nya pan kena tempias kudi nya. Langkau seduai iya teberarak lalu dikesaika ribut kudi malam nya. Tibang ti endur seduai belalai mega dipangkaka ribut chelap lalu nyadi batu. Padi enggau seduai iya empu ti di dalam tibang nya mega nyadi batu. Taja ribut kudi ngemalat nya tang enda ga ulih nginsitka tibang ti udah nyadi batu nya. Semua kereban ba langkau Nyait nya udah tekesai memagang ditabanka ribut lalu nyadi batu mega, ninggalka sigi batu ti mesai tibang ba punjung bukit. Nyau beratus-ratus taun batu nya ba punjung bukit. Lama-lama nyau lebih setengah Batu Tibang nya dilamun tanah.
Udah kudi ti nyelai nya, lebih seratus taun Sungai Sekara nya enda diuan bansa Iban. Tang, nyau kelama-lama dia dih seiku tuai bansa Iban ari Sungai Pasai ti benama Tunku ngemeranika diri muka menua Sungai Sekara nya baru. Baka selama mega, sida ti endang ngemunka pengawa bumai betaun enda sanggu agi diau mendam berengkah ari nanga nyentuk ke entigis Sungai Sekara nya. Pia mega bansa Iban ari endur bukai mega bisi datai makin nambah-senambah dalam taun 1900. Bala Iban ke datai ngagai menua nya mega nadai ga apa nama. Sida gerai nyamai gayu guru. Agi ke bepuluh taun empai ga sida berani bumai ba senentang Rumah Jelenggai ba entigis sungai nya. Lama menua nya dipulauka sida, enda endur sida bumai. Menua nya lalu digela sida kampung mali. Tang nyau kelama-lama datai ke bepuluh-puluh taun udah nya, mensia nyau majak mayuh-semayuh. Endur bumai sereta endur berumah mega makin sekut. Enda ulih enda menua nya mega lalu diperimba sida. Kuru ga ke udah-udah. Nadai ga sida sebana sida bisi dikachau antu kudi. Semina bukit ti endur batu tibang nya enda kala diperimba bala Iban. Nadai seiku bala Iban berani nebang kayu ba bukit nya. Sida mega enggai ngampir semak ngagai batu nya, takut menawa.
Maya lemai hari nyerumba silau suah orang ninga munyi orang nyabak tunga ngagai batu sigi nya. Bala Iban nyangka nya semengat Nyait enggau bisi iya ti udah parai nyadi batu dalam batu nya. Suah mega bala Iban tepedaka bala nyumbuh duduk ba atas batu. Kala mega sida mega utai nyelai ba atas batu nya. Sida kala tepedaka bala nyumbuh ti nyabak munyi kitai mensia di atas batu nya. Lebuh orang deka meda semak-sesemak bala nyumbuh nya nemu lesap. Enda nemu kini ke penunga sida rari. Nya mih sekeda ari penyelai batu nya. Nadai batu bukai ba bukit nya. Batu ke mit-mit udah betegaring ke lebak terus ke dalam sungai.
Tinggang Penusah
Bepuluh-puluh taun udah nya, enda mukai-mukai serata menua Batang Pasai bisi ditinggang sebengkah agi penusah ke besai. Batang Pasai nyengkaum sungai ke mit-mit ditinggang musin kemarau ti panjai bendar. Sekumbangbala Iban udah datai di Sungai Pasai dia, enda kala sida ditinggang penusah ti berat baka nya. Semur idup sida enda kala sida meda musin kemarau ngelama nya. Sekali tu musin kemarau panas amat. Siang hari asai ke didaing api. Malam chelap dadam asai ke diau ba tuchung Bukit Sadok.. Sungai ke mit-mit mayuh rangkai nadai ai. Sekeda rantau ba Batang Sungai Pasai mayuh putus nadai ai.
Pati Sungai Pasai nyengkaum Sungai Siong, Sungai Sekara, Sungai Bon, Sungai Sebintek enggau Sungai Pasai Kanan rangkai, nadai ai. Sungai ti mit-mit enda kira agi. Batang indu Sungai Pasai semina lubok ke besai-besai aja agi bisi ai. Nya pan nyau baka danau. Sekeda lubuk nadai jalai ai anyut ke ili laban rantau nyau rangkai. Bau kenas sungai nya laban bau but ikan enggau semua utai idup dalam ai. Bala Iban beambika ai ba lubok aja.
Ai enda tentu beresi sereta suah ngenataika penyakit. Penyakit berampit baka penyakit lan, mutah bira, malaria enggau kolera nyadi-senyadi. Mayuh bala Iban di menua Pasai parai sakit. Mayuh chara dikena bala Iban minta ujan ari petara. Sekeda orang nirika Gawai Tuah. Sekeda bala Iban niat ba tiang Tugau ba Nanga Pasai. Enam bulan udah mensia mayuh nganti hari ke ujan tang enda ga ujan datai. Nyau ketujuh bulan mayuh bansa Iban enda liat ati lalu pindah sebelah ngagai Nanga Pasai. Sekeda pindah sebelah Sungai Iban.
Mayuh mega orang pindah ngagai Batang Oya, Balingian enggau Mukah. Ba menua nya kemarau tang enda ga ai sungai nya langkang seretai rangkai. Ai ba endur nya mega masin. Tuai bansa Iban ke benama Tunku ba Sungai Sekara enggai pindah. Iya mega enda ngasuh bala nembiak iya pindah. Lebih tujuh bulan udah sida idup ngena ai ari akar enggau buluh. Kala mega sida bulih ai ari lubuk sungai ti agi bisi takung ai mimit-mimit.
“Enti baka tu enda ulih enda pindah kitai,” ku bala anak Tunku ngumbuk apai sida. Nadai utai ulih dikereja maya kemarau nya. Utai ditanam enggai mih tumbuh. “Sayau menua kitai tu anak. Ba menua baru kitai ila kada mih ngemanah tu. Kada mih orang menua baru deka meda kitai. Tusah ga kitai nadai endur diau,” ku Tunku nimbal bala anak iya. Bala anak enggau bini iya enda memunyi agi. “Amat ga penemu apai kita nya, dom,” ku bini iya nyukung penemu Tunku.
“Kira ke nganti enda lama agi mih kitai anak. Enda patut Petara enda kasihka kitai. Tentu ujan enda lama agi deka datai. Nadai kala kemarau panjai baka tu. Lama amat udah enda ujan. Enti semua lubuk udah rangkai magang nadai ku enggau mih. Pindah mih kitai ila,” ku Tunku ngenyamaika ati bala anak iya baru. Beperening pangan diri bala anak iya. Sida enda berani ningkah penemu apai sida. Mati idup telentang tungkup enda mih sida menyadi ninggalka apai enggau indai sida. Merinsa sama merinsa ga, pia ku sida sebuat.
Berengkah ari kemarau datai ke tiga bulan Tunku bisi begawai mimit kena iya minta ujan ari Petara aki petara ini iya. Tang apin ga bisi ujan datai. Suah mega iya niat ngagai ba pendam aki ini iya minta musin kemarau nya diganti enggau musin ujan. Tang enda ga Petara malik ke mua. Nyau kelama-lama enda liat ati tudah Tunku. Pia mega lama iya udah ringat sereta muchau sayau meda ikan, undang enggau lelabi ambis mati. Iya pan bekira deka ngudi hari ambika ujan datai.
Tang, baka ni chara. Enti nunda chara Nyait tentu iya sereta bala nembiak iya deka nyadi batu magang. Kepuas ke bepikir, iya pan bulih runding dikena iya ngudi hari tang enda ga kelalu balat baka enggi Nyait. Nadai iya niat deka ngelangkungka jelu ngemalat nya. Sema tak nyadi batu baka Nyait nadai ku enggau mih. Sema nyadi batu aku aja ga. Asal bala anak uchu ambu aku idup senang lantang dudi hari ila, ku ati tudah tuai.
(Cherita tu ditusi Serit Anak Nuing ba Batu 19 Jalai Oya-Sibu, Sungai Pasai, Sibu, 1989)
(Betampung ba Tusun Ke-38 minggu nyin ila)
Nya mih pun cherita ti nyelai tang amat nyadi di entigis Pasai Siong kira jeman Raja Charles Brooke dulu kelia. Nitihka pengingat Serit Anak Nuing, sebedau bansa Iban datai berumpang menua Sungai Pasai tu kelia, menua nya endang agi diuan bansa Beliun. Pechaya tauka enda, bepanggai ba pemacha empu. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp ba 013 8325146 tauka SMS 01114019115. Kelimpah ari nya, enti bala pemacha bisi tetemuka cherita tauka utai ti nyelai ‘misteri’ di menua kita, pasal Antu tauka Bunsu Petara tauka pasal Tuhan God Almighty, tau mega talipaun aku, puji Tuhan, enti ‘diizin-Nya’ aku deka datai ba endur kita nya.
Oleh HARRY USUP UMBAR
About Post Author
