TERIMA KASIH… Dato Gereawat Gala nyuaka tiles enggau PA System ngagai Tuai Rumah Gau anak Baong,
Stapang D, Poyut/Lubok Nibong.
MARUDI: Rayat ba kandang menua Stapang (Poyut / Lubok Nibong) diasuh terus meri sukung ngagai Perintah Gabungan Parti Sarawak (GPS) ngambika mayuh bengkah projek pemansang ba endur nya ulih diteruska.
Penulung Menteri ba Opis Kepala Menteri, Meratika Pengereja, Imigresen enggau Projek Dato Gerawat Gala ngasaika diri puas ati enggau sukung rayat ke diau ba rumah panjai di Stapang A, B, C, D enggau E maya Pengawa Bepilih Besai Nengeri Ke-12 (PRN-12) bulan Disember taun ke udah.
Ku Gerawat, maya PRN Ke-12 rayat ari lima bengkah rumah panjai ba Stapang udah meri sukung enggau pemenang ngagai GPS ke ngasuh temegah amat.
Iya mansutka jaku munyi nya maya Pengerami Nyuaka Bantu Tiles enggau PA System ngagai Rumah Gau anak Baong, Stapang D.
Gerawat ngarapka peranak rumah panjai nya ulih meri kerejasama ngagai tuai rumah sida empu ngambika semua projek baka ke udah diperambuka ulih dikemujurka enggau manah jemah ila.
Lebuh ngenang senentang perengkaguna ke udah disediaka baka eletrik, jalai, bekal ai, telekomunikasyen enggau iya ke bukai ba Poyut / Lubok Nibong, Gerawat pechaya ketegal udah bisi perengkaguna ke baka nya iya ulih mantu nyungkakka ekonomi sida ke diau ba endur nya.
Gerawat deka meda rayat ba kandang Poyut / Lubok Nibong nyungkakka ekonomi diri empu nyereta pengawa betanam betupi.
Ku Gerawat, baka ke udah ditagaka Kepala Menteri Datuk Patingi Tan Sri Abang Johari Tun Openg, iya deka ngasuh nengeri tu maju sereta bisi penatai pemisi ke mayuh datai ba taun 2030.
Iya ngasaika diri temegah laban mayuh amat sida ke diau ba Poyut Lubok Nibong udah nyereta pengawa betanam betupi ke ngemeranka pengawa nanam sawit.
“Ngagai sida ke bedau ngemansangka tanah puang, sida patut berengkah ari nejuka baka laban tanah nya reta kitai,” ku iya.
“Anang nenjuka tanah puang lalu patut dikemansangka enggau pengawa nanam sawit laban produk ke baka nya ulih meri asil enggau penguntung ke mayuh,” ku iya.
Maya penegrami nya Gerawat madahka geran MRP penyampau RM10,000 diberi ngagai rumah panjai nya sereta RM3,000 agi diberi ngagai Serakup Indu Dayak Sarawak (SIDS) Rumah Gau anak Baong.