BALA raban Hevance benung merindang ba siti pengerami AMD 2012 suba.
GEMPUNG ati, kaul sereta penyerakup bala kaban komiti ngatur pengawa tau dikumbai kunchi pemujur.
Kebuah pia, laban enti nadai gempung ati sereta kaul enggau opis tauka sebarang sapa ke bisi kuasa enggau jalai mantu pengawa nya, endang deka bepenanggul mimit nyapai pemujur.
Beduduk ari peragam ati bakanya meh enti kitai deka ngatur sebarang pengawa, kitai enda tau enda bisi langgur ti manah, nyengkaum ngena kaul enggau orang tauka opis ke bisi kuasa sereta beguna besai kena nyapai pemujur atur pengawa nya.
ANUGERAH MUZIK DAYAK
Nya alai lebuh bala komiti Gerempung Pemusik enggau Artis Dayak (DAMA) deka ngatur renggat penudi Anugerah Muzik Dayak (AMD) dalam taun 2016 suba, kami sebuat ti betuaika Snowdan Lawan (diatu Datuk) tumu betemu enggau sida ari WaiFM Iban, ari Radio Television Malaysia (RTM). Tuju aum nya laban program AMD nya dilanggur deka ditabur terus ngena churung radio WaiFM Iban.
Ungkup bala pemacha AMD ti diatur DAMA tu enda salah baka Grammy Awards di menua Amerika Sarikat. Tu meh alai bala sida raban pemusik enggau artis Dayak diberi kelala nerima prais.
Lebuh meratika penyakit Kubit-19 diatu udah bisi kurang, ka tambah mega menua Sarawak diatu udah nyingkang ngagai tikas empat ‘recovery plan’ tauka langgur mulaika pemansang, nya alai endang patut ga DAMA berunding ngatur AMD sekali agi. Enti enda ulih taun 2022 tu, taun dudi nyin ila pan manah ga. Penulis udah nerima mayuh peminta ari bala artis Iban enggau Bidayuh beduduk ari utai tulis aku pasal AMD apin lama ti udah.
CHARA NGATUR PEKIT
Tu siti pekit entara semua artis enggau pemusik Dayak (Iban, Bidayuh enggau Orang Ulu) tang iya ukai pekit terus baka pekit belagu bukai, laban tu pekit ngena jalai nganjung VCD tau CD lagu ti dipekitka. VCD enggau CD tu deka dipeda lalu dibandingka enggau pangan diri ulih seraban akim professional sepengelama sebulan tauka lebih nitih kategori ti dipekitka.
Pekit renggat penudi AMD 2016 diatur ba Borneo Convention Centre Kuching (BCCK) ke dipejadi Tan Sri Datuk Amar Dr James Jemut Masing (diatu niang). Mayuh bala pemesai datai mantu atur nya suba nyengkaum Datuk Joseph Salang Gandum, Datuk Malcolm Mussen Lamuh, Datuk Seri Sophia Brodie sereta enggau bala bukai.
Utai ti balat narit ati mensia mayuh nya baka bintang entarabansa ari Indonesia Cita Citata ti maya nya benung ningkat tebilang enggau mayuh lagu dangdut iya.
Kelimpah ari tabur terus ke daitur WaiFM, DAMA mega bisi nyengkaum surat berita New Sarawak Tribune enggau Utusan Sarawak nyadika ‘media partner’. Tuju ngaul semua sida tu endang awakka mudah agi ulih ngerembaika berita pasal semekih AMD nya. Iya mega ulih nguntungka dua iti surat berita nya laban diberi awak bulih berita sereta ngambi gambar pengerami nya. Nyadi WaiFM berengkah nabur terus progrem nya maya orang belabuh ngerintai nama orang ti enggau nyereta pekit ngagai maya nama orang ti menang prais nya dipadahka.
SAPA ULIH NYERETA PEKIT AMD?
Nyadi enti nyema semekih AMD bisi diatur pengudah tu, mina kaban DAMA (orang udah direjista) aja ulih enggau bepekit. Lalu pia mega komiti dipelaba sekali agi deka ngaul RTM (WaiFM). Senentang tabur berita ngena surat berita, New Sarawak Tribune dipelaba deka nyadi ‘media partner’ sekali agi (ungkup jaku English). Lalu ungkup jaku Melayu pilih komiti nya entara Utusan Sarawak tauka Suara Sarawak. Semua kaul enggau gempung tu endang nyadi batang kunchi pemujur ti meri nyawa enggau seput baru ngagai industri musik kitai Dayak.
Enti nundaka pemayuh penanyi tauka artis baru bala Dayak, kelebih agi bala penanyi Iban diatu, nadai kebuah pekit tu kurang penyampau orang ke nyereta. Ba pekit AMD 2012 suba bisi 186 iti lagu nyereta lalu dulu ari nya dalam taun 2010 bisi 189 iti lagu dipekitka dalam sekeda kategori. Nyadi ba taun 2014 lebih ari 200 iti lagu bepekit. Ba atur iya penudi (2016) lebih ari 300 iti lagu nyereta pekit. Tu ngayanka pemansang besai dalam industri musik Dayak.
Nya alai Sada Sarawak ngena awak tu enggau naka ulih meransang bala artis lama enggau baru awakka sama enggau nyereta pekit tu jenah ila. Berengkah ari diatu sida diperansang ngaga lagu baru sereta ngemanahka agi lagu lama sida. Kitai ngarapka semua ulih ngena awak tu nguji penyulut tauka penyurut diri empu nyadi pemusik tauka penanyi.
Bala artis enggau raban ti menang mega deka dikelala bala mensia mayuh dalam industri musik Dayak. Sida deka bulih rejeki ti lebih laban tropi ke diempu sida nya deka nyadi batu ilau ngasuh karier sida perenching.
PEMUJUR PENGUDAH NYERETA AMD
Peda kita pemujur ti udah diasaika sekeda raban enggau artis ti udah kala menang maya pekit DAMA/AMD kenyau ari taun 2008 suba. Sapa ti enda nemu Urai, Andrewson Ngalai, Maxwell Franklin Saran, Melissa Francis, Diana Nini, Claudia Geres enggau menyadi iya Carrie Geres, Nai Dinamik, Jenny Tan, Winnie Albert, Jennarino Jeraki, Ernesto Kalum, Masterpiece, Hevance, Taju Remaung, Ethnic Transmission, ZK Band, Clemence Joys, Romino Grey, Embat Lala, Hailey, Lydia Mike, Stevenson, Gabriel Fairoz Louis, Ranee Pat, Leez Zwita, Jessica Remaya, Doris Nuji, Mike Rantai, Fiona John Nolly sereta mayuh agi penanyi bukai ti enda ulih sebut aku ditu. Sida tu meh ti kala merindang sereta udah kala menang ba DAMA 2008, AMD 2010, 2012, 2014 enggau AMD 2016 suba.
Kelimpah ari bala artis baru, semua atur AMD tu mega udah endur ngayanka sereta dikena meri basa ngagai bala penanyi veteran. Sida ti udah diberi basa sereta diambi merindang ba pengerami nya nyengkaum Jennifer Jack, Christopher Kelly, Datin Senorita Linang, Candy, Jimmy Palikat, Richmond Alan Morshidi, Esther Bayang, Antonia Djawi, sekeda penanyi bukai sereta mega niang Michael Jemat (diberi basa).
Nadai kebuah sida bukai enda disengkaum dalam rintai ripih nama tu jemah ila. Selamat mujur sereta maju ngagai semua.
Oleh TELESA EMPERAN