SIBU: Bisi 45 iku penyereta udah nyareta Woksyop Ngembuan Pengelandik Nyaup Meri Penerang ba Bilik Seminar Masjid An-Nur Sibu.
Bala penyereta ke sama bela bisi enggau nyereta nya raban Women Organization For Change (WOC) Sibu, raban indu ari mayuh bengkah gerempung ngelingi Bandar Sibu enggau raban Gerempung Pengelantang Pendiau Bagi Menua Sibu.
Woksyop pengelama dua hari berengkah ari 22 Ogos nya diatur WOC Sibu ke bekerejasama enggau Unit Psikologi enggau Kaunseling Hospital Sibu.
Batang tuju ngatur woksyop nya dikena meri peneleba ngagai raban gerempung senentang konsep kaunseling ari aspek etika, prinsip, limitasyen eggau tuju kaunseling.
Woksyop nya mega dikena meri penemu ngagai bala penyereta senentang pengelandik ulih napi mayuh bengkah gaya ke bisi nyadi, mayuh bengkah chara napi enggau etika seiku pengatur program tauka pengerami.
Kelimpah ari nya, woksyop nya mega ulih ngasuh bala penyereta nemu senentang proses enggau tikas pengelandik ulih mantu.
Palan WOC Sibu deka berengkah ngatur pengawa ba Hamimas Enterprise Building ba Lorong Kampung Nangka 8A enda lama agi.
Sama bisi enggau nyereta program nya Penyanding Penemu WOC Sibu Kaunselor Nazatulshima Bujang, Kaunselor Zaiton Abdul Kader enggau Pemesai Psikologi Kaunseling Hamidah Kushi Mohd.