![](https://utusansarawak.com.my/wp-content/uploads/2022/07/Caption-7-1024x680.jpg)
MAYUH endar bala di Sarawak ditu mantah penemu seiku tuai parti ari tanah Malaya ti madah bala orang ti mengkang ngemeranka jaku English nya tepagang dalam genggap koloni.
Ukai bala rayat nembiak redak aja, tang bala menteri kitai di Tanah Tansang Kenyalang ditu endang ngerijat ninga penemu ari Abdul Hadi Awang ke nyadi presiden Parti PAS.
Sekeda ngumbai ulah mansut penemu nya beduduk ari diri empu ti kurang penemu sereta enda lanchar ngena jaku English. Bisi mega madah sida nya endang ’anti-English’, reti nya endang enda setuju menua Malaysia tu ngemeran sereta ngemansangka jaku ribai nya.
Nyadi kitai di Sarawak tu endang kenyau ari jeman kelia udah ngena jaku English ti diajar dalam sekula lalu ngujungka kitai udah mayuh orang ke nyadi luya, nyadi pengajar, nyadi lutur sereta mayuh pampang penemu bukai ti ngena jaku English ngemansangka diri, menua enggau bansa.
Jaku nya udah nyadi jaku ’official’ menua Sarawak baruh Artikel 161 (1) enggau (2) Federal Constitution enggau Artikel 2 (c) Malaysia Agreement 1963 (MA63). Bala sida MPs ari Sabah enggau Sarawak mega dikemendar bejaku ngena English dalam Dewan Rakyat sereta Dewan Negara.
NYADI JAKU PERINTAH
Di menua kitai Sarawak tu, berengkah ari 18 November 2015 suba udah berengkah maduka jaku English serimbai enggau jaku Bahasa Malaysia nyadi jaku perintah, nitihka penetap pengawa nyiri jaku ulih Kepala Menteri maya nya Pehin Sri Adenan Satem.
Adenan madah semua opis perintah dikemendar ngena jaku dua bengkah nya kena betulis surat, baum enggau atur bukai, nyengkaum dalam aum Kunsil Nengeri.
”Nadai kebuah betulis surat ngagai sereta entara opis perintah ngena jaku Bahasa Malaysia aja; kitai ulih ngena jaku English mega. Nya nitih pilih kitai empu,” ku Adenan lebuh bejaku ba siti pengawa mayuh di Borneo Convention Centre Kuching (BCCK).
Iya madah ngena jaku English nya patut laban dunya diatu endang jarang enda ngena jaku nya dalam pengawa dagang, dalam aum entarabansa, dalam internet, betulis surat, dalam licha ba universiti enggau mayuh atur pengawa bukai.
BISI PENGIRAU
Penulis bisi irau mimit ati meda mayuh bendar bala nembiak kitai di Sarawak sereta di menua bukai dalam Malaysia ti udah pansut ari universiti tang agi balat kurang penemu enggau penau nulis sereta bejaku ngena jaku English. Endang lama udah bisi penanggul tu ti ngujungka sida nya mayuh tepagang nadai bulih pengawa ba kompeni enggau opis perintah.
Enti dikalih kitai mimit jalai nyebut, jam ke diatu, chukup mayuh orang udah bulih degree nadai bulih pengawa tauka enda mujur bulih pengawa ti meruan, pengawa ke setetap enggau pemandai sida empu.
Mayuh kebuah tusah ngulihka pengawa ti ngipakka pemandai tauka pengelandik sida sebuat tu nitih degree tauka pemandai sida, nitih jurai petunggal penulis Datu August Buma ti baru apin lama udah pinchin nyadi Direktor Opis Pengereja Pengawa (Labour Department) Sarawak.
“Siti kebuah nya endang laban nadai mayuh peluang alai gawa ke setipak enggau pemandai sida emou. Ambika banding ba siti opis nya engka bisi siti tauka dua iti aja pengawa ti begunaka orang bisi degree ke agi mengkang megai pengawa nya lalu reti nya nadai meh pengawa puang ba endur nya,” ku August lebuh ditanya penemu apin lama.
Laban orang ti megai pengawa baru umur 40 tauka 50 taun, reti nya nadai pengawa puang ba penuduk nya antara 10 ngagai 20 taun laban orang perintah diatu pinchin umur 60 taun. Tau mega dikumbai atur pinchin 60 taun nya siti ari utai ti tau ngujungka pemayuh orang nadai alai endur gawa majak betambah.
Kedua, mayuh opis perintah tauka kompeni ngiga orang ti landik dalam jaku ribai, iya nya English. Tu bepun ari jaku English nyadi jaku entarabansa enggau jaku ’Information Communication Technology’ (ICT), reti nya jaku kena bekomputer, jaku Internet. Enti kitai nadai penemu tauka pengelandik nya, endang amat tusah deka gawa bekenaka komputer, ti alai jaku English dikemeranka.
Mayuh agi kebuah bukai ngasuh orang tusah deka bulih pengawa kelimpah ari diri empu ti milih, reti nya enggai enda bulih pengawa nitihka pengelandik, penau sereta juluk ati. Tang aku ngena awak tu meri tekan enggau perati nyemetak ba pengurang nembiak siku-siku dalam jaku English ti ngujungka sida enda mujur bulih pengawa ba opis perintah enggau kompeni.
Bala orang dulu suba ke mujur bulih degree enggau latih nyadi pengajar enda ibuh nganti lama, sepengudah sida abis peresa ba universiti sida. Kadang-kadang bala ke datai ari menua Sabah enggau Sarawak, enda ibuh nganti udah abis pelajar ba universiti, sida udah nerima surat ari opis pelajar menua madah sida udah dianjung ngagai siti-siti sekula menua nya.
Ambika banding, kes aku empu ke graduate ba taun 1979 menya, endang agi apin ngambi peresa tang udah nerima surat minta aku ngajar ba sebuah sekula sekonderi di Sarawak ba ujung taun 1978.
Tang laban Universiti Sains Malaysia di Pulau Pinang mina tembu peresa bulan Mac, 1978, aku enda nyadi ngajar ba alai iya ke diberi keterubah iya menya. Kebuah pia laban mayuh alai ngajar sereta mega laban rebak bala kami disikap enggau penemu sereta latih, kelebih agi landik jaku ribai, iya nya jaku English.
Nyadi rambau nya kelia, bala graduate ke udah abis latih dalam pengawa ngajar, iya nya sida ke bulih degree tauka diploma dikena nyadi pengajar sigi diambi perintah ngajar ba sekula perintah pengudah bulih degree tauka diploma sida, lebih agi enti sida ngena scholarship tauka duit injau ari perintah.
Taja pia, bisi mega berita ari TV enggau surat berita madah mayuh bala graduate di menua Malaysia, lebih agi di Semenanjung ke udah bulih degree nyadi pengajar bedau bisi endur ngajar. Kelimpah ari nya tebal agi bala sida nya belajar ngena duit injau ari perintah, Pinjaman Tabung Pendidikan Tinggi Negara (PTPTN) enggau duit injau bukai ari perintah tauka ari bank.
Nyadi udah bekau utai nya dipansut lalu dipejuraika bala pemerati pelajar sekula enggau pemerati politik, mayuh ga penemu udah dipansut tauka dibantai sekeda mensia pasal pekara nya lalu mayuh sama sebaka enggau ti udah dipansutka August tadi.
Nya alai laban diatu udah bisi kelalu mayuh orang ke bisi pelajar universiti enggau diploma, pengawa nyau majak tusah digiga. Enti dalam taun 1979 kelia, opis perintah enggau kompeni datai ngiga orang gawa ka sida, diatu opis dua bengkah nya nyau sekut alai bala tudah ke ngiga kereja. Ngambika banding, siti pengawa tauka siti alai gawa nyau datai beratus orang ke minta.
Kitai sama nemu pemesai guna jaku English tu munyi ti udah disebut aku tadi.
Iya ukai mina nyadi jaku entarabansa enggau menua tang mega jaku Internet kena orang bekomunikasyen enggau pangan diri sedunya tu. Bisi orang ngumbai iya jaku global, jaku Internet, jaku entarabansa enggau jaku lumur dua pemadu mayuh orang ngena di dunya entudi Mandarin, taja pan mayuh orang enda nemu Mandarin nya jaku pemadu besai kerembai pengena iya di dunya.
Peneleba tudah pangan ba sekula sekonderi menua ulu udah mekal aku enggau pengadang pasal bala nembiak kitai Iban ti balat kurang dalam jaku English. Di Kanowit, Julau, Betong, Sri Aman, Saratok enggau mayuh bengkah pelilih menua bukai di serata Sarawak, bala pengajar enggau kepala pengajar sereta pemesai opis pelajar ke kala enggau berandau bela madah nembiak Iban enggau bansa bukai ti belajar ba sekula sekonderi pesisir kandang menua nya, sigi sebaka ulah tauka runding, iya nya enda tentu gagit deka belajar tauka nguji bejaku ngena jaku English.
Baka di Kanowit kelia ba sebuah sekula sekonderi seberai pasar – diatu sekula nya datai jalai alun ari Jalai Nibong/Tada – dalam taun 1983 kelia, iya nya agi rambau nembiak belajar jaku English ngena syllabus tauka turai pelajar MCE, tebal agi nembiak ke semadi enda tau enda, alai sida ngambi matapelajar English Language laban enti enda sida enda ulih diberi setipikit.
Tang sapa ke rugi? Ukai pengajar ti rugi tang nembiak sekula empu. Nya alai enti ninga diri sama diri ke bisi nguji ngena jaku nya seleka dua, lalu kumbai lawa, kumbai sumbung. Bepun ari penemu ke madah pangan lawa enggau sumbung nya meh anak kitai Iban lalu rugi nyentukka diatu, kelebih agi bala ke datai ari menua ulu tauka menua pesisir.
Lalu tu ukai penanggul Kanowit, penanggul Julau, penanggul Saratok tauka kandang menua bukai di Sarawak, tang tu sigi penanggul besai ti agi bedau ulih putarka semua sekula, kelebih agi sekula pesisir.
Taja pia, nembiak baru diatu agi bisi awak nambahka penemu sida dalam jaku ribai nya, enti sida bebendar belajar, enda mantul lalu ngujungka diri ngembuan mayuh penemu sereta landik ngena English. Rajin meh ngemansangka diri empu.
Oleh TELESA EMPERAN