![](https://utusansarawak.com.my/wp-content/uploads/2022/07/Caption-2.jpg)
NYENTUKKA sehari, kitai bansa Iban endang agi mengkang ngemata sereta agi terus ngemeranka pemali nitih ti dipeturunka ari aki ini kitai kelia.
Chukup mayuh bansa pemali ti dikembuan sepintu-sepintu sebilik kenyau ari kelia, endang nadai putus. Bisi nya udah dibuai, iya nya dipenyadi orang ti ulih muai iya, diberi kuasa ulih antu tauka Petara ti dipadah dalam mimpi.
MAYUH MACHAM PEMALI
Tang mayuh pemali endang agi mengkang nyadi pemali. Bisi nya mali makai buah entekai, mali makai ular, mali makup, mali empeliau, mali sawa enggau mayuh pemali bukai. Penulis endang kala udah bekunsika cherita bala kami sebilik ti mali baya. Tu beduduk ari niang aki tuai kami kelia ti benama Manang Belabun ke diambi orang ngubat anak indu balat sakit. Nemu deh anak baya ti diunjam sangkuh Iban ti balat sakit nya. Mudah amat ga Aki Belabun enchabut sangkuh (tang enda minta peda orang bukai). Udah nya apai indu nya madah sida iya endang baya. Bepun ari nya sida madah bala peturun Belabun mali makai, munuh, nupi semua bansa sida baya sebilik.
Nyadi bala anak penulis mali kijang, laban ari sepiak indai sida endang peturun mali makai dagin kijang. Sebarang sapa ngelanggar pemali deka burak jari enggau kaki baka kaki kijang. Enti diperati endang mayuh bala ari menua Rimbas sereta endur bukai ti ngembuan jari enggau kaki bakanya.
Bisi ga bala kami serumah mali nanam chabi. Sinu bendar ga meda tudah anak mit ti buta berengkah ari umur iya urung semilan taun. Iya ada baka nembiak bukai, tang laban iya agi mit ditinggalka apai iya parai, nya ti ngujungka indai iya belaki baru. Nyadi apai tiri iya siru amat sampaika ngema iya lebuh nanam chabi. Tudah ti dima nya tetap meda pengawa apai tiri iya ti nanam chabi lalu tu meh ngujungka tudah nembiak nyadi buta maya umur iya manggai semilan taun munyi ti udah disebut dulu tadi. Taja pia, nembiak tu endang keran; iya belajar bemain gitar lebuh diau nguan palan orang buta di Kuching ditu. Iya mega landik ngurut, lalu agi mengkang ngurut ba palan sida di Batu Lintang tajapan umur udah ngelui 55 taun.
Cherita siti nya pasal bala diri menyadi lelaki lima iku ti ditinggalka apai indai sida parai maya umur agi mit. Semina menyadi sida ti tuai endar nya meh udah ulih ngereja pengawa kena sida beridup. Tang sida serumah nadai ibuhka sida, lalu nejuka sida merinsa. Meda bakanya sida dibai menyadi tuai sida mawa ke dalam kampung jerung nyangka ukur bisi nemu endur ngereja nyatu kena sida beridup. Nya meh ngujungka sida ninggalka rumah panjai. Hari kedua ke mejuhka diri dalam kampung, menyadi tuai sida penama Bujang tesat tang bisi dikangau orang niki laban hari nyau petang. Rumah orang nya ba puchuk kayu. Bemalam dia meh iya. Lebuh dani, dia iya nemu diri diau atas dan kayu, nadai rumah agi. Tang enda lama udah sida sebilik tiga iku nya datai baru lalu dan kayu bebali nyadi rumah baru. Sida madah diri bunsu empeliau. Apai empeliau madah mayuh nyatu ulih dikereja sida enda jauh ari endur nya. Bujang lalu dipadahka iya sida menyadi enggau peturun sida dudi hari ila mali empeliau, reti nya enda tau makai, nupi enggau munuh jelu nya. Udah nya sida menyadi lalu bisi nemu mayuh nyatu, enda alah dikereja sida menyadi. Nya meh ti ngujungka sida nyadi kaya, senang lantang ditulung empeliau.
Agi mayuh pemali bukai, tang enda ulih dikunsika kitai ngelansa. Nyadika penudi iya kitai bekunsika cherita siku bujang berani penama Ranggung.
DISAH BUNYI BURUNG
Nitih siti ensera, ke mega endang cherita amat udah nyadi, ari niang aki kami penama Ligung, dulu menya menua tu agi siga laban mayuh munsuh. Lebuh maya nya kitai Iban bemunsuh amat enggau bala Kantu. Nyadi bansa Kantu tu nama menua enggau bansa Iban ke diatu kena pegai Kalimantan, Indonesia, tunga ka ulu Sungai Kapuas. Diatu kitai udah bebaik, lalu penulis pan bisi ga bepangan enggau dua iku indu dara Kantu ti sama landik belagu.
Nyadi kelia, maya menua agi siga, bala nembiak Iban maya nya jarang enda nemu megai senyata, abis nadai baka senyata pedang, ilang, nyabur, berayang tauka sangkuh. Sida pan selalu matih diri lalu kekadang beguro enggau orang pungka laki rumah sida empu tauka ari rumah bukai kena nyendiaka diri nangkup munsuh, lebih agi bala Kantu.
Tegal menua ti kurang pengelikun sereta siga, lebuh maya nya mega bala indu kitai Iban di menua tu endang takut bendar turun kediri dalam babas, ke umai tauka begiga lauk ba ai baka mansai enggau pengawa bukai jauh ari rumah. Sida takut amat laban Kantu selalu bisi datai deka mumpung pala sida.
Nya alai lebuh sida ke indu turun ngagai umai, sida selalu minta ulu ka orang lelaki ti berani, ke endang pungka laki. Tang ba sebuah rumah panjai nya, indu sida selalu nginjau lelaki bukai nguluka bala indu. Nya alai nyau malu meh sida lelaki serumah nya.
Siku lelaki ba rumah nya penama Ranggung pedis ati amat laban indu sida serumah selalu minta diuluka lelaki ari rumah bukai.
“Nama guna kita selalu minta uluka lelaki ari rumah bukai? Kati semina sida nya aja ti berani? Aku tu pan berani meh baka sida nya. Aku tu pan tau meh nguluka kita turun,” pia ku jaku Ranggung. Sida ke indu nya beperening pangan diri temati kutu enda nyaut.
Nyadi hari siti sida ke indu lalu turun nuju umai sida diuluka Ranggung siku aja. Bala sida lelaki bukai serumah nya nadai deka enggau Ranggung nguluka bala indu ke turun munyi ku nya tadi.
Datai ba umai, sida indu nya lalu mantun. Benung sida mantun, dia lalu datai meh bala Kantu deka munuh bala sida indu nya. Bala munsuh nya datai ngenyit, datai ari bukit. Sida lalu begau. Bala sida indu nya lalu rari, sereta ngangauka Ranggung.
“Rari kitai! Munsuh datai!” ku sida indu megau pangan diri sereta awakka Ranggung lalu sama ninga. Amat lalu angkat tudah Ranggung ngelaban Kantu ngetanka bala indu sida serumah ke diuluka iya turun.
Pama pemerani Ranggong; gasak iya katas, peda lalu baka ke ditebas. Jamah iya ka baruh, peda abis labuh. Teruju iya ke ulu, peda abis tingkil dagu. Pantap iya kili, peda abis tingkil ngeli. Dia meh iya enggau naka ulih ngelaban Kantu. Amat nadai tentu nyamai bala Kantu dijamah iya.
Manjung meh tudah Ranggung minta sah, tang nadai orang datai ngesah. Mayuh Kantu udah parai laban iya tang sida nya endang mayuh tubuh. Makin parai, makin datai ga bala Kantu, Ranggung nyau kirat. Manjung baru ga iya minta bantu, nadai ga orang datai mantu.
Enda mukai-mukai, lebuh nya lalu datai bala burung tiung mayuh bendar. Burung tiung enda nemu pemayuh, nyau chapuh dunya. Sida burung tiung nya ukai lima puluh iku tang jauh lebih mayuh ari nya.
Sida datai nya lalu nepan ba puchuk ragai tebelian ti besai bendar. Sereta sida inggap dia sida lalu memunyi.
“Tiung! Tiung! Tiung!” ku sida. Munyi sida nya nyaris bendar. Nyau pechah munyi babas laban sida. Enda nemu agi penginggar, nyau munyi dunya ti deka pechah.
Ninga burung tiung nya memunyi nyampau penginggar, bala Kantu tekenyit bendar ati. Sida ngumbai bala Ranggung datai mantu.
“Nya bala iya datai! Aram, rari kitai! Seiku iya aja enda alah bunuh kitai. Enti bala datai tentu kitai abis parai. Aram, rari kitai,” pia ku jaku tuai bala Kantu.
Bala sida Kantu ke agi idup rari magang, ngumbai nya bala Ranggung datai ninga panjung iya, lalu datai ngesah iya. Bisi ngelima enam iku parai laban Ranggung tang iya empu nadai telih.
MALI BURUNG TIUNG
Pulai meh Ranggung enggau sida indu ke diuluka iya. Datai di rumah sida lalu nusui pasal Kantu ke alah jamah Ranggung. Ku sida indu, “Amat berani meh Ranggung. Balat meh pemerani iya. Taja bala Kantu lebih dua puluh iku, sida abis rari dijamah iya. Iya ngelaban sida nadai takut mimit. Enti Ranggung nadai enggau kami turun tadi, tentu abis kami indu parai dibunuh Kantu.”
Semua Iban sekayu rumah nya lalu muji pemerani Ranggung.
Nyadi malam nya, benung Ranggung tinduk, iya lalu bemimpi. Dalam mimpi iya asai ke tepedaka Raja Tiung begamal baka mensia. Ku Raja Tiung bejaku enggau iya, “Tegal sah kami nuan menang, lalu agi idup. Enti bala Tiung enda memunyi di puchuk ragai tebelian tadi, nuan tentu enda taan dijamah Kantu. Sida ke indu mega tentu parai magang dibunuh Kantu. Tegal saup kami tiung sida Kantu rari magang, lalu kita enda parai.
“Nya alai, kenyau ari tu nyentukka bala uchu-ambu, ichit-wit nuan jemah ila, enda tau sekali-kali munuh tiung. Kita mega enda tau makai tiung. Barang sapa lelaki ari purih nuan, enti bisi makai tiung, sida iya deka parai laban besi. Barang sapa indu ari purih nuan, enti bisi munuh tauka makai tiung, sida deka parai beranak”.
Nya alai nyentukka saritu, agi mayuh kitai Iban bedau ‘mali tiung’.
Oleh TELESA EMPERAN