SIBU: Dikena nentuka chara ngatur media bejalai lanchar maya nyambut Hari Malaysia 2020, pengawa meri penerang media udah diatur ba Palan Media, Ringkat 2, Stadium Betutup kena Hari Dua ke udah.
Penerang ke baka nya dikenataika Direktor Opis Media enggau Komunikasyen Korporat Opis Pemadah (JAPEN) Malaysia Putrajaya, Dr Amerjit Singh A/L S.Bhag Singh, Pemesai Pengatur Pengawa Unit Komunikasyen Sivil Sarawak (UKAS), Samuel Simon enggau Penulung Direktor Opis Media enggau Komunikasyen Korporat JAPEN Putrajaya, Mohd Dzikrullah Junus.
Pengudah bala pengari media mendingka penerang sida iya dibai nemuai ngelawa endur nyambut Hari Malaysia 2020 dikena nentu sereta nemu endur baka ke udah ditetapka ngagai genap ijinsi media ke deka ngulihka penerang maya malam nya.
