SIMANGGANG: Sekolah Menengah Kebangsaan (SMK) Simanggang udah nyediaka bilik operasyen beseimbai enggau sesyen muka sekula nya baru kemari.
Prinsipal sekula nya Ramlee Bee madahka, bilik operasyen nya disediaka ari asil inisiatif sida iya setipak enggau pengawa nitihka Prosedur Operasyen Standard (SOP) maya pasca Covid-19 baka ke diatu.
“Guna bilik operasyen nya nyadi palan endur nerima ripot tauka ngumpul penerang bekaul enggau pejalai sereta penatai bala pengajar ngagai sekula nya ninting hari.
“Kelimpah ari nya bilik operasyen nya mega dikena ngerikot temperature bala nembiak sekula maya pukul 7.30 pagi ninting hari…enti temperature ke dirikot lebih ari 37.5 degree celcius penerang ke baka nya deka digumpul sereta disimpan di dalam bilik operasyen nya,” ku iya.
Lebuh dirandau pegarang berita maya meratika pengawa muka SMK Simanggang, Ramlee madahka penerang ke disimpan dalam bilik operasyen senang diambi enti nyema bisi pekara ke enda disadang bisi nyadi ba sekula nya.
Kelimpah ari nya ku iya, sida iya mega ngemeranka norma baru ngagai bala nembiak sekula sepemanjai timpuh sekula nya dibuka baka nelebaka diri maya ngetu, ngerikot temperature tubuh ninting hari enggau bup spesial, takah sosial enggau iya ke bukai.
“Pengawa ngemeran sereta nitihka SOP mega ditentuka baka proses sanitasyen bala nembiak sekula maya ngetu sereta udah abis kelas, ngena penutup mua sereta nyediaka lebih mayuh agi endur nuchi jari ba genap blok sekula.
“Kami mega meri penerang pasca Covid-19 tiga kali sehari ngena sistem broadcast ngagai bala nembiak sekula ngambika SOP ba sekula tu seruran dititihka,” ku Ramlee.
Iya ngarapka pengawa ke baka nya ulih nentuka operasyen SMK Simanggang bejalai lanchar sereta nyamin semua orang lebih agi bala nembiak sepemanjai timpuh pasca Covid-19.
Ba maya ke diatu SMK Simanggang bisi 1,000 iku nembiak sekula sereta pemayuh penatai bala nembiak sekula sepemanjai timpuh dua minggu ke udah bisi ngerikot lebih ari 93.2 pesen ninting hari.
Penyampau penatai bala nembiak sekula maya hari keterubah SMK Simanggang berengkah dibuka bisi ngerikot 92 pesen.
Oleh Valentine Ngumbang