![](https://utusansarawak.com.my/wp-content/uploads/2022/08/Pic6.jpg)
MANANG LUPUT …Maya ti bebungkur pua kumbu baka tu, Manang luput ambika semengat sida ulih bekaul enggau Antu ti ngachau mensia.
Harry Usup Umbar
Tusun Ke-48
LEKA jaku, Iban / “Sea Dayak” dikena sida pemansik antropologis nyebut seraban bansa ti bejaku ngena jaku Iban (Ibanic speaking people). Leka jaku “Ibanic” ditengkebang Alfred B Hudson (1970), Professor Emeritus, University of Massachusetts, Amherst, Department of Anthropology. Nitihka pansik analisis “HVS-I region (12 April 2011)”, nunjukka Iban @ Ibanic Group nadai bida ari raban orang asal menua “indigenous people”. Kenu ku sida pemansik antropologis, bepelasarka cytochrome b gene, bansa Dayak @ Ibanic Group, endang seraban enggau orang asal menua (Orang Asli) di menua bukai. Nya alai, Iban nya seraban ari peturun Dayak Borneo ti datai ari menua Yunnan di China & Kemboja baka ti udah disebut dulu agi ari tu. Kenu ku sekeda penulis Orang Putih, leka jaku “Iban” datai ari jaku bansa Kayan “Hivan” ti mai reti orang ti udah pindah ari menua bukai tauka orang ti udu bejalai kin kia. Bisi mega sida ke tuai madah, bansa Iban bulih nama ‘Iban’ ari cherita Tindin “Bragah Ngindang” seduai Entinggi “Keti Aur Tulang”. Amai tauka enda, dua iti teori nya, ukai pekara ti berat lalu nyadi batang kelikuh bansa Iban Sarawak. Utai ti bendar iya nya, bansa Iban Sarawak endang seperugan, saum aki ini enggau bansa Dayak Borneo, lalu bisi tanda amat bepelasarka jaku @ Ibanic languages ti dikena IbanSarawak ke diatu. Ngenang pasal penatai Iban ke Sarawak, penatai aki ini Iban Sarawak ke diatu endang enda sebaka jalai, enda mega sebaka taun kenyau ari taun 1675, nitihka pansik antroplogis. Maya ti ngiga, berimba menua baru endur bumai betaun, Iban endang seruran charut enggau bansa Ukit, Baketan, Seru, Beliun, Lugat, Lusum sereta mayuh mega etnik orang asal (natives) ti mit-mit ke bukai, tang “Iban fears no other tribes”.
ASAL PENATAI MANANG
Lebuh Raja Simpulang Gana datai ari menua tasik, iya semina diberi tanah dapur. Nya aja reta tengkira sida menyadi ti agi tinggal diempu iya. Tegal nya iya pedis amai ati lalu ngumbai Singalang Burong bechiping maya magi keresa pesaka sida sebilik. Taja pia, apai iya Raja Jembu enda ngasuh iya ringat lalu bejaku, “Nuan patut puas ati laban berengkah ari sehari tu nyentuk ke jemah ila, nuan deka bekuasa atas tanah. Enti bala menyadi nuan sereta enggau semua peturun sida nya deka nguna tanah endur sida bumai betaun, sida enda tau enda minta pemendar ari nuan”.
Udah ti bebagi reta tengkira, Raja Singalang Burong pindah ari rumah apai iya Raja Jembu laban ti deka berumpang menua baru. Iya jadi enggau Indai Kechendai Bapantak Jerak, Dara Sentaba Balun Kupak. Apin lama udah ti jadi melaki bini, dia bini iya tabin. Tegal nya, bini iya enda tentu deka makai utai lalu majak kurus-sekurus. Meda baka nya, Singalang Burong ngasuh bala nembiak iya madahka menyadi indu iya Ini Inda Rabong Menoa, Ini Inee Rabong Hari datai ngagai menua iya lalu ngabas penyakit bini iya nya. Lebuh ti ngama tubuh bini menyadi iya nya, dia Ini Inda Rabong Menoa pan bejaku.
“Bini nuan tu, aka wai, tabin nyelai baka tu laban iya alah ayu tegal nama iya “Indai Kechendai Bepantak Jerak, Dara Senteba Balun Kupak. Nya kelalu tinggi sereta enda ngipakka gamal tubuh iya empu. Nya alai nama iya nya patut dipindah lalu asuh manang ngaga nama baru ke iya. Nyadi…, kena ngintu pengawa tu nuan patut nirika gawai ti dikumbai Betawai Bepindah Nama,” ku Inda Rabong Menoa, Ini Inee Rabong Hari.
“Apo nih…! Ni bisi manang di menua aku ditu?!” pia ku saut Raja Singalang Burong. Anang ke meda pelian, ninga pasal manang pan iya enda kala.
“Nya mih, aka wai, kitai mesti bisi manang. Enti nadai, baka ni kitai deka ngubat bala kitai ti tabin baka bini nuan nya,” ku Ini Inee Rabong Hari.
NGINGA SAPA KE PATUT NYADI MANANG
Ninga munyi nya, Raja Singalang Burong pan ngasuh dua tiga iku bala nembiak iya ti bisi ati deka nyadi manang lalu bebangun. Nadai seiku bala nembiak iya angkat lalu madahka diri sanggup nyadi Manang Bali. Meda utai baka nya, iya pan ngasuh menyadi iya ti benama Raja Menjaya nyadi manang. Berat asai mulut Raja Menjaya madahka diri sanggup nyadi Manang Bali laban ti enggai bebali nyadi indu lebuh ti udah dibangun menyadi iya Ini Inda Rabong Menoa nya. Taja pia, nyau puas ti diumbuk Raja Singalang Burong, Raja Menjaya pan nadai jaku agi lalu tekala nya Ini Inee Rabong Hari pan nirika gawai Bebangun ba tuchung Bukit Rabong. Udah ti nyadi Manang Bali, iya pan digelar orang Menjaya Manang Raja Betalaga Baroh Rekong, Manang Bali Menyadi Aki Singalang Burong. Iya pan nyadi manang ti pemadu pama sereta bisa jeman nya.
Udah tembu Gawai Bebangun Menjaya Manang Raja seduai Ini Inda pan nirika gawai Betawai Bepindah Nama ke ipar seduai Indai Kechendai Bepantak Jerak, Dara Sentaba Balun Kupak. Nyau datai ba pengujung Gawai Betawai pagi nya, dua tiga kempuk asi pan dirintaika Manang Menjaya ba papan. Genap kempuk asi mesai tunjuk nya pan digagaka sida nama memagang. Enda lama udah nya
NAMA BARU BINI SENGALANG BURONG
Manang pan ngambi manuk tawai lalu diasuh iya makai sekempuk ari asi nya tadi. Manuk tawai nya mantuk lalu makai kempuk asi ti benama Endu Sudan Berinjan Bungkong, Endu Diu Tiong Menyelong. Nya alai, munyi nya mih nama ti diberi Manang ngagai bini Singalang Burong.
Udah ti gerai baka selama bini Raja Singalang Burong nya pan betubuh bisi lalu ngadaka anak lelaki ti diberi seduai nama Aji ti bensumbar Berani Ngilah Bulan, Menteri Suka Raja Rengayan. Aji bebeini ngambi petunggal iya empu, anak Raja Sempulang Gana. Kelimpah ari nya, Raja Singalang Burong seduai iya Endu Sudan Berinjan Bungkong, Endu Diu Tiong Menyelong bisi enam iku anak indu ti jadi enggau enam iku bunsu burung bisa (omen birds): Ketupong, Bejampong, Beragai, Embuas, Pangkas @ Kutok, Kelabu Papau.
“The seven omen birds are rufous piculet (ketupong), banded kingfisher (embuas), scarlet-rumped trogon (beragai), Diard’s trogon (papau or kalabu), crested jay (bejampong), maroon woodpecker (pangkas) and white-rumped shama (nendak). These seven birds are the crucial omens in Iban augury”.
Referen maya dan kolobrasyen: Tetuan Alexander Mering – Kabupaten Sintang (Bachelor of Law, UNTAN, Pontianak, Indonesia) & The Encyclopaedia of Iban Studies, Volume III, Joanne and Vinson H. Sutlive. The Sarawak Journal 1994 -The Source of Iban History, Benedict Sandin)
(Betampung ba Tusun Ke-49 minggu nyin ila)
Nya mih, sekeda cherita asal penatai enggau pemindah bansa Iban ti makin ngansak sesemak ke Utara, ari menua Batang Sadong, nyentuk ke menua Batang Krian-Sebelak di menua Saratok ke diatu. Ari menua pelilih menua Serian, Betong, Saratok Iban majak ngiga menua baru tunga ke Utara. Sebedau ngenang pemindah Iban ke menua bukai ke Utara nyentuke ke Berunei, lalu ke Sabah, aram kitai mansik dulu pasal asal penatai Manang bansa Iban. Arapka Iban patut nemu asal penatai diri empu endang seperugan sebedau bepechah berimba menua baru di menua bukai. Artikel ti deka nyadi bup tu ila, endang deka befokus ba senentang perugan Dayak @ Ibanic Group aja, ukai reti kitai ngelaung tauka enggai begulai enggau bansa Dayak bukai, tang mih awakka mudah agi dipansik laban mit agi rampa. Bansa Dayak bukai awakka sida empu ga mansik. Nitihka pansik Litericha enggau Sains Spiritual, Dayak @ Ibanic Group tu ukai semina kala diau begulai enggau Bunsu Petara (Dewa) – Sengalang Burung tujuh iku diri menyadi, Orang Panggau Libau enggau mayuh bansa Antu, dulu kelia; tang bansa Dayak Borneo @ Ibanic Group mega datai ari peturun Bunsu Petara (Dewa, Dewi) ti bechampur enggau mensia dunya (1) Bunsu Petara (Dewa) + Mensia (2) Antu + Mensia + Bunsu Petara. Ila kita meda lenak agi, amat tauka enda utai tu. Pia mega, bala tuai Iban Sarawak dulu kelia endang dipilih Bunsu Petara, atas pemendar ari Petara (Tuhan, God Almighty). Pechaya tauka enda, bepanggai ba pemacha empu. Engka bisi ga pemacha deka nemu pasal referen artikel tu, endang enda ulih dirintai ditu laban kelalu mayuh, lalu deka ditulis dalam bup maya dichelak ila. Nya alai, Iban patut nemu asal penatai peturun diri empu, ambika kitai ulih serakup lalu begempung enggau bansa bukai di Sarawak mega. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115.
Oleh HARRY USUP UMBAR