LIMBANG: Siku orang ke nadai batang pengawa ke maruk diri dalam kes ngenchuri barang di sebuah bilik suwa semak Bangunan Bangkita ditu Hari Satu tu tadi udah ditan orang periman di bandar tu sebedau diserahka ngagai polis urung jam 11.10 pagi.
Kepala Polis Pelilih Limbang, Superintendan Abang Zainal Abidin Abang Ahmad madahka udah bekau ngetan saspek 35, beasal ari Kampung Buang Abai tpolis mega nemu beberapa barang ditekan asil churi di kandang endur bilik suwa nya.
Asil tasat di endur nya, Polis ngerampas beberapa barang ari saspek nyengkaum beg sandik bechura chelum, pengechas telefon, jam tangan, henfon, lampu tinduk enggau beberapa barang chuhri ke bukai.
“Asil tasat tumu kami nemu saspek ngaku tama ngagai bilik suwa mansa nengah ngeluit pintu besai menggau sebilah duku sererta ngerusak pintu chara pejal,”ku iya dalam sebengkah penerang kemari.
Abang Zainal Abidin nerangka tasat panjai nemu saspek tama ngagai bilik suwa bukai di begunan sama nengah chara ngerusak indu kunchi nengah chara ngeluit ngena sebilah duku.
Beserimbai enggau nya, saspek ngembuan rekod penyalah lama bekaul enggau penyalah pengawa ngenchuri sereta dadah lalu kala ditan sebedau tu.
Kes deka ditasat nitihka Seksyen 457 Kanun Keseksaan.
