Timbalan Menteri, Datuk Rosol Wahid (kiba) ba opis menteri nya kemari.• Foto BERNAMA
PUTRAJAYA: Rang Undang-Undang (RUU) Pelaksanaan Langkah Sementara dikena Ngurangka Impak Covid -19 ke deka dipejuraika maya aum Parlimen ke benung diatur dipelabaka ulih mantu pemisi mensia mayuh ke kena dikachau Covid-19, ku Menteri Dagang Dalam NeNgeri enggau Hal Ehwal Pengguna, Datuk Alexander Nanta Linggi.
Ku iya, RUU nya nyengkaum ngubah Akta Perlindungan Pengguna 1999 ke ulih ngatur pengawa dagang ngena chara kredit.
“… kami deka ngelindung mensia mayuh lebuh maya napi Covid-19 baka ke diatu, enti nyema sida enda ulih mayar lalu sida ke meri kredit enda mudah ngachau orang ke meli,” ku iya maya aum media pengudah lebuh meri penerang ngagai bala staf opis menteri nya kemari.
Menteri Besai Tan Sri Muhyiddin Yassin udah bisi nyebut deka nyediaka deraf RUU Pelaksanaan Langkah Sementara dikena Nguranka Impak Covid-19 kena 5 Jun ke udah dikena ngurangka impak undang-undang ketegal penyakit berampit Covid-19.
Lebuh ngenang senentang pekara bukai Alexander madahka, Program Food Bank Siswa ke diatur opis menteri nya sebedau tu deka diteruska pengudah studen institusyen pelajar tinggi mulaika diri baru ngagai kampus maya bulan Oktober ke deka datai.
Maya pengerami nya Alexander mega nyuaka setipikit rekonisyen Malaysia Book of Records (MBOR) ngagai Komisioner Serikat Malaysia (SSM) ke udah mujur ngerijista 2,705 pengawa dagang baru ba timpuh sehari kena 20 Februari ke udah.
“Nya rikot ke pemadu mayuh kala diterima SSM ba timpuh sehari laban chara pukul rata rikot ngerijista ninting hari pengawa dagang baru ba serata Malaysia semina 1,000 aja sebedau tu,” ku iya sereta madahka, penyampau ke baka nya dirikot ngena program #JOMDAFTARSSM2020.
