ENGKILILI: Sinu sereta peduli enggau nasit ke udah nuntung sida ke diau ba Rumah Empading, Nanga Bunu, Skrang berengkah ari 12 Mei ke udah, Raban Komiti Parti Pesaka Bumiputera Bersatu (PBB) Pampang Engkilili nyuaka bantu 37 bakul pemakai rangkai.
Bantu nya disuaka ngagai 37 Tuai Ruang Bilik (KIR) ba rumah panjai nya kena Hari Satu ke udah.
Ngena bantu ke baka nya iya ulih mantu ngelempungka penanggul sida ke diau ba rumah panjai nya maya ba timpuh kuarantin.
Kelimpaha ari nya, pejalai sida iya mega seruran dijaga sida ke gawa ba baris mua (frontliners) ngambika ke enda pansut ari endur nya dikena mutuska rantai pengelekai virus Covid-19.
Sida ke diau ba rumah panjai nya mega diasuh seruran nitihka Prosedur Operasyen Standad (SOP) baka ke udah ditetetap pengelama timpuh kuarantin 14 hari.
Semua sida ke diau ba rumah panjai nya meri besai terima kasih ngagai Komiti PBB Pampang Engkilili enggau Perintah Gabungan Parti Sarawak (GPS) laban udah meri bantu ke baka nya.