DATAI kita di tebelayar tisi jungkar, engkami tadi
Dia ati aku tak terunti ati meunggar-unggar
Riput takut, umba’ getar-getar,
Nangika kita tak bisi mai batu ngitar
Ke gemetar mambar miga.
Kita tadi pen nyau niki’ ga’,
Di leladi’ tinggi’ rumah panjai, engkami.
Tang mih aku tu tak agi kesal ati
Laban enda nemu kebuah kita ke niki’,
Tak sampal enggau nembiak enggau anak,
Enggau indu enggau kalu.
Ke datai, ke nemuai,
Di ai’, di pendai’,
Di tikai, di balai kami.
Laban ka’ aku ngumbai kita tu datai deka nunggu
Nadai ga aku nemu anak nembiak, indu’ kalu’ kami ditu
Bisi butang bisi betumbang,
Bisi menchuri ub’i menchuri keladi
Menchuri pisang’ menchuri jabang, orang.
Nya alai padahka pejalai kita, menyadi.
Tusuika penemuai kita dia, unggal!
Laban enti kita bedau madahka kebuah diri,
Bedau madahka pejalai diri,
Aku tak agi kesal di jungkal kandang kamai
Agi riput takut rimai.
Laban aku nangika pengawa kita
Baka pengawa niang Munan Apai Umi
Seduai Selutan Tuan Bili menya,
Ke mudik ke langgai sungai Menua Tisi,
Ngujika gempelu batu geraji —
Nya… ke kai penguji ati anak lelaki
Betu’ berani, sebarang tajam.
Aku nyangka’ kereja kita tu
Baka kereja niang Linggir Mali Lebu
Seduai Selutan Tuan Bunsu
Mudik ke Ulu Langgai Bintulu
Ngansingka gempelu batu idu
Nya ga ubat pemantun bulu
Penyarang dan.
Nyangka kita tak nunda kereja Sgt Mulok
Ke ulu langgai Delok
Ngansingka gempelu batu tiruk
Peniruk lubuk dalam semilan.
Taja pan jaku aku munyi nya, menyadi
Laban kita nyau udah nampak,
Enggai nyadi ga aku enda napak;
Kita ga udah semak,
Enggai nyadi ga aku enda ngansak—
JANANG ANAK ENSIRING