KOTA KINABALU: Polis Sabah ngetan dua iku melaki bini dipelabaka nyual dadah sereta ngerampas dadah bansa syabu 2,020 gram pemereat berega lebih ari RM80,000 ba Jalan Lokawi, Putatan kena Hari Tiga ke udah.
Sapit Komisioner Polis Sabah Datuk Mazli Mazlan madahka, dua iku melaki bini ke beumur 43 enggau 34 taun nya ditan maya seduai iya benung dalam kerita lebuh ngentu ba tisi jalai urung pukul 4.45 lemai.
“Ari asil pengawa meresa kerita nya raban kami bisi tetemuka siti plastik chelum endur nyimpan dua bungus plastik bechura perak ke ditulis ‘savoring tea’. Lebuh kedua-dua bungkus palstik nya dibuka raban kami meda tekang kristal ke dibalaka dadah bansa syabu 2,020 gram pemerat,” ku iya madah lebuh dirandau pengerang berita.
Lebuh ditasat lebih silik agi dadah nya deka dijual ngelingi Kota Kinabalu sereta dipelabaka diambi ari seiku lelaki ke diau ba Labuan
“Pengawa nasat lebih silik agi benung digaga dikena nyidi sapa orang ke mekal dadah nya,” ku iya.
Ku iya, dua iku melaki bini nya direman pengelama seminggu nyentukka ngagai 12 Ogos dikena mantu pengawa nasat lalu kes nya ditasat nitihka Seksyen 39B Akta Dadah Berbahaya 1952.
