![](https://utusansarawak.com.my/wp-content/uploads/2021/03/Pic6.jpg)
![](https://www.utusansarawak.com.my/wp-content/uploads/2021/03/Pic6.jpg)
Tusun Ke-58
KUASA MISTIK ANTU
Bepelasarka penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: (1) Kuasa mistik Petara (God, Almighty, Tuhan) (2) Kuasa mistik Bunsu Petara (Dewa, Diety) (3) Kuasa mistik Antu (Sitan, Jin, Iblis). Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu. Sekali tu aku mai pemacha ngenang pasal sekeda ari kuasa mistik Antu.
ANTU NGAYANKA DIRI II
Nitihka pansik Sains Spiritual, Antu tau dibagi ngagai dua kategori: (1) Antu – energi ari tubuh mensia ti udah parai @ roh ‘tubuh halus” (2) Antu jai: Sitan, Jin, Iblis, Sihir – ‘supernatural being’
Genap bansa di dunya tu bisi bansa Antu kediri empu lalu disebut ngena nama ti bebida: dalam English disebut ghost, specter, phantom, wraith, spirit, demon, genie, incubus, devil enggaua ti bukai bepanggai ba penyadi semengat mensia ti parai. Reti nya energi tauka roh mensia ti udah parai tau nyadi Antu Jai: Sitan, Jin, Iblis, Sihir, enti kena roh / semengat mensia nya alah laban Antu Jai @ energi negatif nya.
Minggu nyin, aku main pemacha mansik 10 kebuah Antu ngayanka diri Antu ‘makhluk halus’ ngayanka diri ba mua mata mensia. Mayuh ti interbiu tauka berandau ruai enggau kitai Iban di rumah panjai aku suah ninga sida nusi cherita pasal peneleba sida empu maya ti meda, betemu tauka ninga munyi Antu. Kelimpah ari 10 kebuah nya, agi mayuh macham chara bebalut enggau jalai pengidup mensia dunya baka: mantaika mayuh macham munyi, nunga ke belakang, mantaika mua aja, mantaika jari aja, bebali nyadi api tauka senawah.
Kenu ku orang tuai kelia, enti Antu nya ayan nunga ke belakang, iya ukai deka nganu tauka ngachau kitai mensia ti meda iya. Taja pia, enti iya ayan semak rumah orang nya, reti nya tanda bisi orang parai ba rumah nya. Kati Antu ke munuh tauka ngachau mensia ti parai nya? Ukai. Anang salah sangka, anang ngumba ngumbai diri pintar bepikir. Nitihka penemu agama, sains spiritual nya mih roh / semengat mensia ti parai nya. Dalam penemu agama Adat Iban nya mih Antu Sebayan. Nya mih kebuah, di rumah panjai kitai Iban dulu kelia, maya orang rabat, semua orang di rumah nya tinduk di ruai magang, enda tau tinduk di bilik; enggai ke digerau / dikachau Antu Sebayan. Kenu ku orang tuai, semua bala sida ke indu endang takut ke Antu Sebayan. Engka laban Antu Sebayan rindu agi beduan bala sida ke rindu? Sida ke lelaki takutka bini enti sida takutka Antu Sebayan, pia ku orang tuai.
Pemacha tentu agi ingatantu tauka disebut energi negatif dalam penemu sains (Albert Einstein), enda ulih anchur ‘dimusnah’ tang iya ulih berubah, bebali transform. Nya mih kebuah, sekeda Antu energi negatif nyayanka diri maya sida bebali ‘transform’ nyadi objek bukai baka asap, api, ambun, remang enggau ai. Maya energi negatif nya transform / bebali nyadi api, nya mih kekadang disebut kitai Iban mata Antu. Utai ke bendar, nya ukai mata Antu, tang endang tubuh antu ti bebali nyadi api tauka senawah utai.
SENGAJA NGAYANKA DIRI
Kekadang Antu ayan mantaika mua tauka kaki aja nya, Antu ti baka nya endang sengaja ngayanka diri laban mayuh macham kebuah baka: (1) Ngundang barang mistik / pengaruh ti diibun mensia (2) Nguji pemisa puchau / pengaruh ti diibun mensia dunya Barang mistik / pengaruh ti diibun mensia dunya endang bisi kuasa 壮upernaturalti misteri; semina ulih pansik ngena penemu sains spiritual enggau agama aja; nya pan ukai 100 pesen nemban. Antu ti diau dalam barang mistik / pengaruh endang bisi kaul enggau Antu: Sitan, Jin, Iblis tang ukai reti semua kuasa mistik nya jai magang lalu tau ngemedis mensia dunya. Ambi ke chunto, pengaruh ti ngasuh mensia kebal tauka liat isi; enda telih kena utai tajam baka duku, lunga, gilet enggau ti bukai enda tau salah guna sereta enda tau sengaja kena ngemedis mensia. Barang mistik nya bisi penti pemali kediri empu.
Ingat mih. Barang mistik supernatural/pengaruh ti baka nya enda tau dikena mensia dunya ngelaban “encabar’ kuasa mistik Petara (Tuhan, God Almighty); laban semua kuasa mistik endang asal iya datai ari ‘Supernatural Being’ Petara (Tuhan, God Almighty) magang.
KUASA DALAM BARANG MISTIK
Kelimpah ari nya, kuasa mistik Antu ti diau dalam barang mistik / pengaruh ti diibun sekeda kitai mensia nya bisi munsuh kediri empu. Reti nya, bisi tikas kuasa spiritual ti lebih tinggi ulih ngalahka iya. Ambi ke chunto, kuasa mistik Bunsu Petara (Dewa) – Orang Panggau enggau Gelong, lebih tinggi ari kuasa mistik Antu: Sitan, Jin, Iblis enggau Sihir. Eviden iya; tentu kitai Iban kala ninga cherita pasal semua bansa Antu enda ulih ngalahka Orang Panggau enggau Gelong tauka Sengalang Burong tujuh iku diri menyadi maya beperang.
Nya mih sekeda ari kebuah Antu manah tauka Antu Jai: Sitan, Jin enggau Iblis ngayanka diri ba mua mata mensia. Agi mayuh mih kebuah bukai tang enda alah sebut, enda alah pansik. Dunya Misteri Petara (God Almighty) tu endang enda ulih pansik mensia dunya enggau silik: lalu tetap nyadi misteri.
Nya alai, enti pemacha bisi utai deka ditanya tauka deka bebagi penemu pasal tiga kuasa mistik nya, tau SMS HP: 01114019115 / 0138475146. Pia mega pemacha tau ngirumka cherita sereta gambar pasal kuasa alam ghaib nya ngagai Inbox FB aku. Terima kasih mega ngagai kita ti udah ngirum informasyen, tanya tauka gambar.