![](https://utusansarawak.com.my/wp-content/uploads/2020/11/Pic3A.jpg)
![](https://www.utusansarawak.com.my/wp-content/uploads/2020/11/Pic3A.jpg)
Tusun Ke-46
KUASA MISTIK ANTU: SITAN, JIN, IBLIS
Bepelasarka penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: (1) Kuasa mistik Petara (God, Almighty, Tuhan, Allah Taala) (2) Kuasa mistik Antu Bunsu Petara (Dewa Dewi) (3) Kuasa mistik Antu (Sitan, Jin, Iblis). Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu.
Nadai jaku Iban kena kitai nyebut ‘Magic, Sorcery, Witchcraf’ dalam jaku English. Dalam jaku Melayu tiga leka jaku nya disebut sida ‘sihir’ magang: ‘ black magic – ilmu hitam, white magic – ilmu putih’. Dalam gaya idup bansa Iban kitai bisi nyebut Antu Manah, Antu Jai. Kenyau ari pun dalam artikel tu aku mega nyebut Antu: Sitan, Jin, Iblis. Orang ti nguna ‘mengamalkan’ penemu Antu nya disebut raban ‘sihir’ tauka disebut Beliau, Bomoh tauka Dukun.
Nithka bup “African Tradisional Religion”, peranak menua nya sekali ke sida nya orang ti bepelajar tinggai tauka rakyat selama, semua sida endang pechaya sereta nguna penemu ‘sihir’ nya ti bepelasarka kuasa mistik Antu: Sitan, Jin, Iblis nya. Kenu ku sida, kuasa mistik tauka kuasa spiritual ti baka nya endang bisi di dunya tu ti disimpan Petara (God Almighty). Antu sereta semengat aki ini sida ti udah parai ulih nguna kuasa mistik nya. Sekeda mensia ulih ngambi sereta nguna kuasa mistik nya ngena chara ti manah (white magic, ilmu putih) tauka chara jai (black magic, ilmu hitam). Kuasa Mistik Antu Jai “black magic, sorcery (ilmu hitam, ilmu sihir)’ dikena mensia ngachau munsuh sida. Sida tu ulih ngasuh mayuh macham utai idup baka indu utai, jelu sereta burung nyerang mensia ti munsuh sida.
Nya tau ngujungka munsuh sida tabin raya lalu mati, enti enda berubat enggau kuasa mistik ti lebih kuat tauka tikas penemu ti tinggi agi.
Kenu ku sida ti belajar sereta begunaka penemu Antu jai nya di menua Afrika, maya malam hari sida ninggalka tubuh sida lalu semengat sida terebai betemu enggau raban ‘sihir’ ti bukai tauka ngerusak tubuh mensia ti nyadi dengah sida. Sekeda raban ‘sihir’ ti udah ngemadukan diri beguna penemu jai nya ngaku diri nyebut munyi tu: “Aku udah munuh lebih 150 iku mensia ngena chara ngasuh mayuh macham moto bebadi. Sekeda bisi ga nyebut aku udah munuh lima iku nembiak mit ngena chara nginsap darah sida.”
Uji kitai berunding ngena tikas pikir ti tinggi, baka ni sida nya ulih ngereja pengawa jai nya maya tubuh sida tinggal ba peninduk sida maya malam hari?
Penemu Antu manah “white magic, ilmu putih” selalu diguna mensia kena nyaga diri ari raban Antu jai (black magic, sihir) tu. Sida ti begunaka penemu manah nya nguna mayuh macham perengka baka tinchin, simpai, gelang ti dipechayaka sida bisi kuasa mistik tauka kuasa ajih. Sida ngirup ai ubat tauka ngunsut tubuh sida ngena ai ubat nya tadi. Sida mega nyimpan mayuh macham perengka ti nyelai-nyelai dalam rumah sida empu. Utai tu sebaka enggau utai ti disebut pengaruh dalam jalai pengidup bansa Dayak, Iban Borneo. Utai tu endang dipechayaka sida bisi kuasa mistik lalu ulih nyaga sida ari Antu jai @ ‘ilmu hitam.’Antu: Sitan, Jin, Iblis, endang Pemula sereta Penipu.
Bepelasarka penemu agama Monoteisme raban “Sihir” ti begunaka kuasa mistik Antu:Sitan,Jin, Iblis, nya endang munsuh lumur satu mensia (dangerous enemies of humans). Sida sigi amat bisi kuasa kuat @ ‘power’ mistik ti ulih megai kuasa pikir, nyawa sereta pengidup mensia. Tentu kitai kala ninga rita sida tu suah tama lalu ngempu tubuh mensia tauka jelu dalam Mathew 12:43-45. Nya alai, kitai mensia enda tau sumbung sereta enda pedulika kuasa mistik sida Antu jai nya. Kebuah pia, laban kitai mensia sigi enda ulih ngelaban kuasa mistik Antu nya, enti enda nguna kuasa @ ‘power’ mistik ti lebih kuat ari kuasa sida nya. Kuasa @ ‘power’ mistik ni ti patut diguna kitai mensia? Saut tu semina dalam ati mensia empu.
Raban “Sihir” ti begunaka kuasa mistik Antu:Sitan, Jin, Iblis, endang kepala pemula, Raja penipu. Sida ulih ngemelika sereta mai mensia pechaya ke iya mayuh kuasa tang ke bendar ukai baka nya. Sida ngemulaka mensia awakka mensia pechaya kuasa mistik sida nadai tatak. Sereta lebih ari kuasa Mistik Petara (God Almighty). Tuju sida endang deka ngenakutka mensia ambika mensia nitihka semua utai ti diasuh sida gaga.
Uji kita mansik sekeda pemula Antu: Sitan, Jin, Iblis. Kitai tentu kala ninga mensia parai tauka sakit tegal indu utai, jelu tauka objek bukai. Kenu ku sida raban “Sihir” nya baka Beliau, Bomoh tauka Dukun ti munuh mensia nya endang ari asuh Antu jai nya.
Utai ti bendar iya nya, Antu jai: Sitan ulih ngasuh mensia bepikir beimaginasyen lalu asai ke diri meda, ninga sereta ngereja utai ti enda kala dikereja sida empu.
Nya mih munyi penerang kuasa mistik Antu: Sitan, Jin, Iblis ti bisi besangkut paut enggau penemu Antu Manah ‘white magic, ilmu putih’. Nama bida dua iti penemu ‘supernatural being’ nya? Nama bida penemu Antu Manah ‘ilmu putih’ enggau Antu Jai ‘ilmu hitam.” Pemacha tentu udah mereti kuasa mistik ‘ilmu hitam, black magic nya endang ari kuasa Antu: Sitan, jin, Iblis. Ari sapa kuasa ‘ilmu putih’? Minggu nyin ila kitai nampung pansik tu, au.
Nya alai, enti kita bisi utai deka ditanya pasal tiga kuasa mistik nya, tau SMS HP: 01114019115 / 0138475146. Pia mega pemacha tau ngirumka cherita sereta gambar pasal Antu ngagai Inbox FB aku. Pia mega, tuju aku mansik tiga bengkah kuasa mistik tu mega ukai tuju deka ‘promote’: aku semina bebagi penemu enggau pemacha lebih-lebih agi bansa kitai Iban ambika kitai nemu.