![](https://utusansarawak.com.my/wp-content/uploads/2020/11/Pic4-2.jpg)
![](https://www.utusansarawak.com.my/wp-content/uploads/2020/11/Pic4-2.jpg)
Tusun Ke-44
KUASA MISTIK ANTU BUNSU PETARA
Bepelasarka penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: (1) Kuasa mistik Petara (God, Almighty, Tuhan) (2) Kuasa mistik Antu Bunsu Petara (Dewa Dewi) (3) Kuasa mistik Antu (Sitan, Jin, Iblis). Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu.
Sebedau aku mai pemacha nampung pansik pasal kuasa mistik Antu Bunsu Petara (Dewa), aku deka naka ulih nyaut tanya ari sekeda pemacha. Saut ke tanya dua iti nya udah diterangka aku dalam artikel ba tusun ti dulu ari tu tang enda ngawa ga; sekali tu aku nguji nerang baru sereta lenak agi awakka nyadi ulang kenang.
TANYA ARI SEKEDA PEMACHA
Ni Petara ke selalu disembah bansa kitai Iban? Ni bansa Petara ke tau disembah bansa kitai Iban? Aku nanya munyi nya laban bisi orang nyebut nama sida; Keling, Sempurai, Bunga Nuing, Pandak Segatak, Kumang, Lulong.
Aku tu Keristin R.C. tang aku sayauka pengaruh taring babi ti agi dikembuan aku. Mayuh orang sereta kaban belayan aku ngasuh aku muai taring babi nya. Kati tau buai tauka enda? Kati tau aku meri pengaruh nya ngagai ipar aku ti nyadi polis / sedadu?
SAUT NGAGAI JAKU TANYA
Saut No.1. Sebedau megai agama Keristin, kitai Iban nyembah dua raban kuasa mistik (2) enggau (3). Semua dua raban nya. Raban (2) selalu disebut kitai Iban Petara lalu (3) Antu. Bisi ga sekeda kitai Iban ngumbai (2) enggau (3) nya Antu magang. Ambi ke chunto maya kitai Iban Gawai Sandau Hari, Gawai Tuah enggau ti bukai, sekeda kitai nyebut orang ke dikangau datai ngabang nya, Antu, tang sekeda nyebut sida nya Petara. Sapa sida nya? Pekara tu udah diterangka ba paragraf keterubah tadi.
Bansa Petara ke tau disembah bansa kitai Iban, nya nitihka agama enggau pengarap kitai Iban empu. Enti nuan udah megai agama Keristin tentu nuan nyembah Petara (God Almighy, Tuhan) ti dalam kategori kuasa mistik nya. Kitai Iban ti apin megai agama Keristin ari dulu kelia endang nyembah kuasa mistik (2). Antu Bunsu Petara (Dewa Dewi) ti dua raban: Kesatu, Sengalang Burong tujuh diri menyadi; Kedua, Orang Panggau enggau Gelong. Ingat … dua raban Antu Bunsu Petara tu ukai petara ti sama kategori enggau Petara (Tuhan, God Almighty, Lord Jesus Christ). Sida tu sama tikas enggau Dewa Dewi, Diety dalam agama Hindu tauka agama bukai.
Raban Kesatu: tujuh iku Sengalang diri menyadi nya nya: (1) Bidok Linggar Aki Jugu Menaul Tuntong, Aki Lang Singalang Burong (Raja Singalang Burung). (2)] Matai Tuai Raja Menjaya, Manang Langgong (Raja Menjaya). (3) Raja Biku Bunsu Petara, Pantan Inan Raja Jadia, Bunan Petara. (4) Raja Sempeleta @ Raja Selampetoh @ Raja Selampandai. (5) Gangga Ganggai @ Gangga Ganggong, Anda Mara. (6) Ini Inda Rabong Menoa @ Ini Inee Rabong Hari. (7) Rangkang Kirai Raja Sua (Siva), Pepat Pudak Raja Simpulang Gana
Raban Kedua: Orang Panggau enggau Gelong. Sida ti tebilang dikangau lalu selalu datai nulung kitai Iban iya nya: Sempurai ti bensumbar Bungai Nuing, Kumang seduai Lulong. Sida tiga tu endang tebilang nulung Tuai Kayau bansa Iban maya ngayau munsuh. Kala mega sida tu nulung maya bansa Iban sakit raya. Sida bukai iya nya: Indai Keling (Laing), Keling, Kelinah (Indai Abang), Laja, Tutong enggau Pungga.
Dua raban kuasa mistik dalam kategori ‘supernatural being’ tu sama enggau kuasa mistik (1) Petara (God Almighty, Tuhan) laban sida sama diau ba dunya ‘alam ghaib.’
Saut No.2 Semua orang Keristin R.C. tauka gerija bukai endang enda diasuh gerija sida empu ngembuan pengaruh tauka nama-nama utai ti bisi besangkut paut enggau kuasa mistik bukai kelimpah ari kuasa mistik Petara (Tuhan, God Almighty). Taring babi nuan nya endang bisi kuasa mistik Antu Bunsu Petara (Orang Panggau enggau Gelong tauka Raja Sengalang tujuh iku diri menyadi). Taring babi tauka nama-nama pengaruh ti diberi Antu Bunsu Petara nya mayuh penti pemali tauka ‘syarat’. Ambi ke chunto, utai nya mesti diintu ngena pengawa ‘ritual’ tauka gawai ti disempulang ngena piring ading. Iya enggai nyadi diibun tauka diintu nuan ngena chara sembiang (Keristin). Nya alai, nuan enda tau ngibun utai nya agi. Chara nuan muai taring babi nya ari ibun nuan, mesti mega ngena chara adat basa. Engkah ba endur ti engkeman sereta likun sereta anang bejaku sumbung. Nuan patut madahka diri enda nguna utai nya agi laban….lalu besampi minta lindung Petara (God Almighty.)
Enti ipar nuan polis / sedadu nya minta, beri ngagai iya mih. Nadai salah…tang patut ngena chara ti betul, anang sebarang. Reti nya ukai semina sua jari pia aja tang ngena chara ‘ritual’. Nuan ti Keristin R.C nyerah ke utai nya ngena chara nuan empu, ipar nuan ti ukai Keristin pan ngena chara iya empu: bemalinka ajar Lemambang tauka Manang. Pekara tu bepanggai, sapa Antu Bunsu Petara ti meri nuan pengaruh taring babi nya.
Taja pia, saut aku ngagai tanya kita pemacha semina sadang enggau malin kita aja. Setuju, pechaya tauka enda kita ke penemu aku dalam artikel tu, nya bepanggai ba kita empu. Kebuah pia, laban agi mayuh pekara mistik ti bisi besangkut paut enggau ubat tauka pengaruh kitai Iban. Pia mega semua pekara ti bisi besangkut paut enggau kuasa mistik ‘alam ghaib’ tu endang misteri sereta amai bisi ‘wujud’ di dunya tu.
Nya mih, nitihka penemu agama enggau pengarap mensia di dunya tu, nya mih bida tiga bengkah kuasa mistik nya. Nya alai, enti pemacha bisi utai deka ditanya pasal tiga kuasa mistik nya, tau SMS HP: 01114019115 / 0138475146. Pia mega pemacha tau ngirumka cherita sereta gambar pasal Antu ngagai Inbox FB aku. Pia mega, tuju aku mansik tiga bengkah kuasa mistik tu ukai deka ‘promote’: aku semina bebagi penemu enggau pemacha lebih-lebih agi bansa kitai Iban awakka kitai enda sengapa sebut sereta kelikuh.
Setuju sekalaika enda kita enggau penemu aku dalam artikel tu, nya bepanggai ba kita empu. Kebuah pia, laban agi mayuh pekara mistik ti bisi besangkut paut enggau ubat tauka pengaruh kitai Iban. Pia mega semua pekara ti bisi besangkut paut enggau kuasa mistik ‘alam ghaib’ tu endang misteri sereta amai bisi ‘wujud’ di dunya tu.