KUCHING: Parti Pesaka Bumiputera Bersatu (PBB) sitak Kunsil Nengeri (DUN Demak Laut enggau Gabungan Parti Sarawak (GPS) deka terus nyingkang ke mua ngatur agenda ‘Sarawak Dikenuluka’, Ku Kaban Kunsil Nengeri (ADUN) Demak Laut Dr Hazland Abang Hipni.
Ku iya, pengawa ke baka nya dikena nentuka sitak DUN Demak Laut terus diempu PBB-GPS sereta nambahka agi pemayuh majoriti pemenang maya pengawa bepilih besai ke deka datai.
“Nya kebuah sebaka enggau taun ke udah, PBB DUN Demak Laut deka ngena ngatur pengawa betemu enggau mensia mayuh, mending sereta seruran mutarka genap penanggul enda ibuh nganti maya bepilih besai datai.
“PBB deka neruska penyulut pengawa ke udah digaga sebaka enggau pengawa bepilih besai ke dulu ari tu ngena konsep mutarka mayuh bengkah isu ke bisi diasika rayat.
“Nya nyengkaum mayuh bengkah isu baka tanah, pengawa berumah, infrastruktur, pengelantang pendiau enggau sosioekonomi.
“Genap isu ke baka nya deka diperatika sereta udah tentuka iya ulih diputarka ngambika meri peyenang ngagai rayat,” ku iya maya nyadi Tuai Aum PBB Pampang DUN Demak Laut empai lama ke udah.
Lebuh ngenang senentang Pengawa Bepilih Besai Nengeri (PRN) Sarawak ke deka diatur sebarang maya, Dr Hazland ti mega Tuai Pampang PBB DUN Demak Laut madahka, pemujur pengawa ke udah digaga PBB ba sitak DUN Demak Laut mujur amat.
“Nya kebuah kitai patut terus ngetanka rikot nya sereta nambahka agi pemayuh sukung rayat ngagai PBB-GPS.
“Rayat diatu udah pandai milih tuai enggau parti ke ulih nyaga pengelantang pendiau sida iya laban meda trek rikot enggau pengawa ke digaga baka ke diatu enda ibuh nganti bepilih besai.
“Ngena Politik Pemansang baka ke udah dikena berengkah ari dulu suba, sigi endang nyata pengidup rayat udah dijaga ketegal seruran mai mayuh pemansang ketegal politik nengeri ke tegap sereta ulih dipechaya.
“Enda sebaka enggau penyakal ke terus mai politik pemula, politik bepechah, politik ngasut, politik benchi enggau politik bebebelit,” ku iya.
PBB DUN Demak Laut terus deka ngenyemakka diri enggau rayat dikena nentuka genap agenda pemansang ke diba datai ngagai sida ke begunaka iya.