![](https://utusansarawak.com.my/wp-content/uploads/2020/03/feature-image.jpg)
BINTULU: Bala apai indai diasuh nyikap bala anak diri empu enggau pengelandik teknikal ngambika ulih besemekih lebuh maya deka nginga pengawa jemah ila.
Kaban Kunsil Nengeri (ADUN) Samalaju Majang Renggi madahka, pengawa
ke baka nya dikena ngasuh bala anak sida iya bulih pengawa ba sektor industri ke udah bisi ba kandang Samalaju.
“Mayuh bengkah industri udah bisi ba kandang Kunsil Nengeri (DUN) Samalaju sekalika industri berat tauka industri minyak enggau gas.
“Loji metanol ke benung ba proses digaga nyengkaum industri bukai deka nyediaka lebih ari 70,000 peluang pengawa ba endur tu” ku iya.
Iya mansutka jaku munyi nya maya Pengerami Merekat Rumah Sarang Burung Walit, Tuai Rumah Sibat Anak Sumbang, Jalan Bintulu-Miri.
Ku Renggi, semina pelajar ke chukup ulih ngasuh peranak ke diau ba kandang nya ulih ngasuh sida iya bulih pengawa baka ke diguna industri.
“Aku ngarapka peranak ba kandang DUN Samalaju sedia sereta nyikap diri ngambika bulih pengawa ba industri sereta ngena peluang ke bisi dikena nyungkakka ekonomi diri,” ku iya.
Iya mega madahka, sektorbetanam betupi bisi jalai ulih mujur laban peminta ke mayuh amat ngagai sektor nya ba Bintulu.
“Peminta ngagai barang pemakai sigi mayuh amat laban Bintulu enggu Samalaju sigi endur ke dilawa mayuh amat orang begigaka pengawa.
“Nya kebuah aku meda sektor betanam betupi bisi jalai ulih mujur ke besai amat ba endur tu,” ku iya.
Kelimpah ari nya iya mega meransang mensia mayuh sama enggau ngaga rumah sarang burung walit dikena nambahka penatai pemisi enggau ekonomi sida iya empu.