MARUDI: Tuai raban bansa nya tuai ke semak sereta begulai enggau rayat ngesan tangggungpengawa ke beguna amat ngatur pengelantang pendiau mensia mayuh.
Sapit Menteri Pengerai Sivil, Pengawa Berumah enggau Perintah Pelilih Menua ti mega Kaban Kunsil Nengeri (ADUN) Marudi, Datu Dr Penguang anak Manggil ngarapka mensia mayuh ulih ngena chara ke betul lebuh madahka serbana tauka penanggul diri ngagai Tuai Mensia Mayuh enggau Tuai Raban Bansa (KMKK) ngambika diabi ngagai perintah.
Iya meri tabi puji ngagai tujuh iku KMKK ke udah nerima surat kuasa megai penuduk enggau nyambung megai penuduk sida nyadi tuai ba Pelilih Beluru.
Penguang ngarapka bala tuai ke udah nerima surat kuasa megai penuduk ngaga tauka ngatur pengawa enggau naka ulih ba kandang menua diri empu.
Iya mansutka jaku munyi maya Penegrami Nyuaka Surat Kuasa Megai Penuduk Baru enggau Nyambung Timpuh Megai Penuduk bala tuai mensia mayuh enggau raban bansa ba Opis Pelilih Beluru.
Surat kuasa nya disuaka Pemesai Pelilih Beluru Alfred Geling ngagai sida ke nerima sereta diperatika Seketeri Politik Premier Sarawak Alexander Asing, Pemancha Enggah Muga enggau bala penghulu ba Pelilih Beluru.