![](https://utusansarawak.com.my/wp-content/uploads/2022/07/image-34-1024x822.png)
Tusun Ke-21
NITIHKA pansik teori Infraed (IR) Light for Ghost Hunting, Sains Fizik (Theoretical Physicist – Albert Einstein & Sains Spiritual), ujan nyala, endang tanda Antu Bunsu Petara tauka Antu amat-amat bisi datai; laban sida nya roh @ tauka disebut Eletromagnetic Energy – Negative Energy, semina ulih diau ba utai ti chelap, enda angat tauka mambam. Engergi Negatif @ Antu, roh jai enda ulih diau ba endur ti angat. Kelimpah ari nya, sida tu mega rindu diau ba endur ti petang sereta sunyi. Nya mega kebuah, Antu endang selalu ngayanka diri maya malam hari laban maya nya dunya chelap. Antu @ energi negatif enda ulih dibunuh (dimusnah @ destroyed), tang ulih bebali (transformed).
BILLY DIGERAU ANTU
“Ngasaika diri bisi penemu mimit ti diberi apai aku Lidom, aku pan berasai temegah ati. Apai, aku diatu enda takutka antu, enti sema iya deka ngachau aku. Dini-dini endur sebelah tanah enda mih aku takut,” ku Billy
“Oo…, anang munyi nya! Enti kitai madahka diri enda takut, udu endar antu deka ngipa kitai. Iya sigi udu deka nguji kitai,” pia ku timbal Lidom.
Ba bulan Jun 2000, hari nya iya udah besemaya enggau menantu iya laki Jawai deka ngasu begiga sebelah babas ke Ulu Seteras. Deka begigaka jelu mih ku jaku. Taja udah besemaya, tang menantu iya nya enda nyadi enggau laban enda diasuh bini iya.
“Tumu kitai pulai pagila. Enti nyau datai ke malam lagi dek bejalai, kelalu lelak dek driba pagila. Enda ibuh enggau Apai Chie mih dek,” ku bini menantu iya nya.
Ninga munyi nya Billy pan mupuk kediri urung pukul 11.00 pagi nya. Iya enda tentu berumban iga bejalai. Taja jalai nya ngerenchah temuda, enggau kebun getah, madang engkabang, tang tawas. Nya endang jalai sida semenua nya ke kebun, ke umai tauka jalai sida nangkal getah ke ulu Sungai Selabi, pati Sungai Kabah, dalam menua pegai Kanowit. Udah bejalai umbas iya penyauh, ngetu ga iya belelak. Mata iya seruran gining-gining malik kiba kanan.
BILLY DIKACHAU ANTU
Datai ba Sungai Selabi ba kebun Apai Jerine iya ngetu enda lama. Udah nya bejalai baru lalu melungguang ke sepiak Enda lama udah nya iya pan tedingaka nyawa orang ngangau.
“Oi oi oi…!” ku nyawa orang nya.
“Endai…, ni iya ke enda enggau dih! Lapa madah enda, ka iya enggau…,” ku Billy bejaku kediri enggau ati ti andal. Iya pan ngetu lalu nganti orang ti ngangau nya datai. Anti datai, enda ga datai.
“Endai, nama iya tu beduan aku! Iya ngangau, dianti enda ga datai-datai,” ku iya mutap kediri.
Puas ti nganti iya pan mupuk bejalai baru, lalu datai ba siti lebak, mansa kebun sida Saing. Datai iya ba sungai Senikal, ulu sungai Selabi, dinga iya ngangau baru ga nyawa orang nya.
‘Oi oi oi,” ku nyawa orang nya ngangau baru.
“Chih…, ngayahka aku iya nya. Iya pinta anti, enda ga datai-datai,” ku iya muchau kediri.
Dianti-anti iya baru ga orang ti ngangau nya, nadai ga datai. Iya pan bejalai baru, jauh-sejauh. Bejalai ngetu, bejalai ngetu ga iya, laban ti deka nganti orang ti ngangau nya.
Datai enda jauh ari Nanga Senikal, sepi asai tubuh iya, asai ti dijuka orang. Asai ke dua tubuh, ku iya.
“Bah…, nyelai amai utai tu,” ku iya bejaku kediri. Udah nya, asai ke dua tubuh, asai ke bisi orang enggau begulai bejalai, tang tubuh nadai dipeda. Enda ga ibuh ke utai nya lalu majak bejalai. Iya nyau berasai enda takut agi, laban asai ti bisi orang enggau bejalai.
Iya pan majakka pejalai diri ke ulu sungai besehari-sehari nya. Nadai kerus utai didinga. Nadai meda jelu. Lachau nadai mih didinga kerus. Iya pan bejalai baru ngulu Sungai Teras @ Seteras lalu tama Sungai Maba, ke sepiak, ke Selepung, melunggang ngagai ulu Sungai Rantau Panjai, hari pan nyau malam. Udah nya iya lalu melunggang ke ulu Sungai Semanang lalu datai ba madang engkabang sida Apai Radin. Datai dia, iya pan duduk belelak duduk lalu ngidupka api kebait. Enda lama udah nya iya pan meda puchuk engkabang nyau beselelai baka ke dipangkaka ribut kudi. Baru deka nyengkau senapang, dinga utai nyau munyi indu gamang datai. Mayuh amai bunyi.
“Mum mum mum bek bek bek….!”
“Bah, nama utai tu? Nyelai amai bunyi,” ku Billy bejaku kediri.
Maya nya urung pukul 7.30 malam, udah petang amat. Iya pan ngidupka lampu kebait, lalu nengau ngagai tunga utai ti memunyi nya. Tengau, nadai ga dipeda. Munyi utai nyau majak.
“Mum mum mum bek-bek bek….! Kekadang ngemesil ga munyi utai nya; munyi ular.
“Apu ular nya. Kada enda ular belalang?!” ku Billy nanya diri empu
Udah nya nyau nemu-nemu ati iya. Utai nya mansa iya beribut-beribut. Nadai utai bukai mih nya, sigi antu. Bisi ga ati iya deka nyebut utai ti udah diajar apai iya Lidom, enda ga iya kempang, laban empai bangat takut iga. Udah nya iya lalu besampi.
“Enti kita nya antu jai, anang ngachau aku. Kitai tu ga sama bejalai begigaka utai, begigaka pemakai. Rari kita, anang ngachau aku. Tu senapang ti dibai aku tu, anang main-main kita enggau aku,” pia ku sampi tudah Billy.
Udah iya pan majak ngidupka api kebait. Munyi utai nya majak memunyi ke ulu, ke ili, begulang-galu. Ama nya datai ari ili, ama nya datai ari ulu. Kekadang munyi ke ngelingi iya utai nya memunyi. Taja pia, iya enda ibuhka utai nya lalu majak nyuluh pama. Enda ga ngerenjang bulu pegu, ku iya.
ENDA PEDULIKA ANTU NGACHAU
Iya sigi nemu nya antu, laban nadai dipeda. Engka antu ti deka nguji iya, laban iya udah madahka diri enda takutka antu. Iya majakka pejalai diri ti nyuluh lalu datai ba Sungai Mali dalam Sungai Semanang, pati Sungai Kabah. Bukit Mali nya sigi beberita bendar, tegal menua nya ti selalu endur orang ninga bunyi antu, kenu ku orang tuai. Enti maya orang bisi rabat, suah orang ninga munyi orang ti betabuh ba endur nya. Enda mayuh orang ti berani bejalai ngasu ba menua nya. Kenu ku orang tuai, menua nya endang diuan antu gerasi. Endang bisi balai nyabung ba endur nya.
Ari Sungai Semanang nya Billy pan majakka pejalai diri ke ili tang nadai utai ulih agi. Kaki pan nyau jampat nyingkang, udah ti nginga utai nyelai nya tadi. Urung sepuluh minit udah bejalai, dinga iya bunyi utai merentum, munyi pengelabuh punggu mesai pala ba senentang kebun sida Puso. Tekenyit, asai ke deka luput asai ninga, utai munyi nya.
“Apuuu…, pama antu di menua tu, nih! Beduan aku amat sida tu. Lagi mih, engka kita deka nguji aku!” ku Billy ngeransi kediri.
Udah nya lalu disepu iya puchau selindung ti diajar apai iya ngelama tu. Nya baru utai nya badu memunyi. Iya pan berasai lantang ati majakka pejalai diri. Urung setengah jam pejalai pengudah nya, iya pan datai ba senentang pendam Lubuk Birah ti enda jauh ari rumah panjai sida iya empu. Rumah panjai sida nya genturung pendiau rumah panjai dalam Skim Puru Nnanga Tada, Kanowit. Tekenyit baru ga iya ninga munyi utai ti ngempaska papan, tunga ke pendam. Enggai badu-badu mih antu tu beduan aku, ku ati iya. Enda iya peduli utai nya, laban iya nemu nya endang antu, ti deka ngerau iya. Datai di rumah diri empu iya pan berasai senang ati, laban udah nemu diri idup.
BALA AKI BUGAP NANYA PEJALAI BILLY
Tumu pagi nya, bini iya pan nusi mimpi diri ngagai Billy. Bini iya bemimpi meda aki Bugap ti lama udah danjan, nanya iya. Aki Bugap tu nguluka bala antu ngasu. Mayuh bala antu enggau iya. Bala antu nya mih ti nanyaka pejalai iya. Kira ke deka berandau enggau iya mih bala antu nya.
Ingat kita, wai, bansa antu ti nguji deka ngachau Billy nya, kini? Sigi amat mayuh bansa antu di dalam kampung tauka babas? Uji kitai sama berunding, nama kebuah antu udu ngachau mensia maya orang nya kediri, tang jarang amat kitai ninga dua iku orang tauka lebih kala dikachau antu?
(Cherita tu ditusi Billy Anak Lidom, Rumah Intai, Nanga Tadi, Skim Puru Nanga Tada, Kanowit)
(Betampung ba Tusun Ke-22 minggu nyin ila)
Sekeda ari artikel dalam gempung cherita Nyelai Tang Amat (NTA) tu, udah kala dichelak nyadi bup ti benama Pengabang Ari Panggau Libau; lalu deka befokus ba senentang pengidup pendiau bansa Dayak di Kalimantan enggau Iban Sarawak tauka bansa Dayak ti bukai di Sarawak. Pechaya tauka enda, bepanggai ba pemacha empu. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115. Kelimpah ari nya, enti bala pemacha bisi tetemuka cherita tauka utai ti nyelai (misteri) di menua kita, pasal Antu tauka Bunsu Petara tauka pasal Tuhan God Almighty, tau mega call aku, puji Tuhan, enti “diizinNya” aku deka datai ba endur kita nya.