![](https://utusansarawak.com.my/wp-content/uploads/2021/08/12.-swinburne-sarawak-graduation.jpg)
![](https://www.utusansarawak.com.my/wp-content/uploads/2021/08/12.-swinburne-sarawak-graduation.jpg)
SARU enti madah pemandai labuh ari langit, ku ajar bala sida niang apai menya.
Lebuh ti nibar jaku nya maya makai lemai, endang lalu bemunyi tichak. “Nyey, amat ku tichak,” ku niang indai ti sama betunga makai lemai enggau menyadi penulis ti enam taun tuai agi. Sama bisi begulu makai dia mega niang ini menya ti nganggutka pala aja besetuju enggau jaku apai.
Kami lima diau di langkau kebun numbas penyauh ari sekula primari ti alai kami duai menyadi sama belajar dalam Primari Enam. Nyadi apai mansutka jaku iya urung bulan Jun pengudah Gawai Dayak taun 1967, iya nya urung lima bulan sebedau kami ngambi peresa Common Entrance kelia.
NGASIKA JAKU APAI INDAI
Nyadi kami duai menyadi endang ngasika jaku apai indai, tajapan manchal, kelebih menyadi aku ti udah manggai umur 19 taun ba Primari Enam. Tu beduduk ari tudah tuai ti enda panjai besekula ba sebuah sekula jauh ari rumah panjai kami lalu semampai kena buli orang ke tuai agi lalu ngujungka iya enda betah. Badu meh tudah tuai lalu mina masuk sekula sereta enggau penulis lebuh sekula ba menua kami empu dibuka dalam taun 1962.
Kami duai meh ti sama enggau urung 40 iku nembiak bukai ngepunka sekula primari Nanga Assam setaun sebedau Malaysia ditumbuh ulih Malaya, Singapore, Sarawak enggau Sabah dalam taun 1963 suba. Penulis diberi lumur tujuh lalu menyadi tuai penulis penama Dom (nama timang) diregista ngena lumur lapan.
Udah ninga jaku apai nya tadi kami duai Dom mina tuchum malik ngagai pangan diri laban sigi andal ati sereta udah sedia napi peresa. Kami duai meh ti semampai bulih lumur satu enggau dua dalam genap peresa. Tang Dom endang semampai tinggal di belakang penulis lalu enda kala bulih lumur satu ngalahka tudah pangan.
Nyadi lebuh peresa Common Entrance penulis bisi renga mimit lalu mina ngaga keretas Arithmetic 30 minit aja tajapan jam diberi 45 minit. Keretas English enggau General Knowledge pan bakanya mega tang laban endang udah chukup besedia napi peresa penulis mujur bulih 100 ungkup semua keretas. Nadai tekenyit mega lebuh duduk peresa penggal tengan taun maya ba Pom 1 dalam taun 1968 di sekula sekonderi penulis bulih aggregate 72.8 peratus lalu bulih lumur satu ungkup tiga kelas Pom 1 maya nya. Sida ti bulih lumur satu ba Pom 3 enggau 4 maya nya udah mujur nyadi lutur ngeli enggau nyadi Bishop Gerija Anglika diatu. Dua iku, iya nya seduai ti ba Pom 2 enggau 5 penulis enda nemu dini seduai nya diatu. Taun nya sekula sekonderi nya di Saratok agi kena pegai orang putih, iya nya Gordon Tedrick ari Kanada lalu genap kali peresa, nama nembiak ti bulih lumur satu, dua enggau tiga ari genap iti pom endang diayanka ba papan nutis ambika dipeda semua. Chukup manah penemu nya. Nya meh nyadika peransang.
AMAT KU TICHAK
Aruh ga tichak setuju, laban penemu apai nya endang sigi amat. Penemu tauka pemandai endang ukai labuh ari langit. Kitai enda tau enda bebendar ngulihka semua pemandai enggau penemu. Amat meh nitih sekeda penemu falsafah enggau sikoloji, endang amat bisi orang mai pemandai ada ari perut indai; reti nya pemandai dibai ada tauka “innate ability” dalam jaku English. Bisi mega ngumbai iya “inborn knowledge” (penemu dibai ada).
Tu sigi amat. Dalam penemu falsafah kenyau ari Plato seduai Aristotle kelia lalu udah nya dipesetuju ulih sekeda raban falsafah baka Bertrand Russell, John Dewey, Paulo Freire sereta dua tiga iku sida bukal, pemandai endang bisi dibai ada tang enda tau enda disungkakka manah agi enggau penemu sereta pemandai digiga enggau diulihka diri empu.
Reti nya, genap iku kitai mensia ti deka ngulihka pemandai enda tau enda bebendar ngiga sereta ngasu penemu awakka chukup, awakka teguh.
Penemu bala sida falsafah tu mega disukung raban sikoloji ti mega bepenemu madah pemandai dibai ada enggau pemandai ulih diri empu bepun ari pengepuh enggau pemagas enda tu enda “diproses” tauka “diolah” dalam jaku Melayu awakka ulih neresap masuk runding kitai seiku-seiku lalu terus nyadi peneleba, nyadi penemu ti ulih dikena kitai idup, meri penyenang enggau pengelantang.
PEJALAI TERUS KE UJUNG
Pejalai ngulihka pelajar sekula enda tau badu, reti nya iya nadai ngetu, nadai pengujung ti nyemetak. Kebuah pia, penemu kitai mensia endang semampai enda chukup ti ngujungka kitai begunaka pelajar baru kena napi pengidup. Udah tuai umur pan agi ga belajar. Ambika banding bala sida niang ini menya endang nadai sekula tang lebuh orang deka ngatur pengawa bepilih pengari rayat aku ingat bala sida ke tuai nya sigi kenanas belajar nyunting X ba sebelah dinding bilik enggaika salah sunting ba keretas undi. Abis papung kayu ba dapur nyadika sunting tauka pinsil sida. Dinding kami sebilik endang aruk magang laban X.
Nyadi diatu bisi peransang ari bala tuai perintah, kelebih agi baka sapit kepala menteri dulu suba, iya nya Datuk Petinggi Jabu Numpang, ti madah kitai sepintu bilik di rumah panjai anang enda nguji ngemansutka seiku graduan.
Utai tu mudah disebut tang chukup pedis dijapai. Taja pia, sekeda rumah panjai di pelilih Saratok sigi udah lama nguluka mayuh pelilih menua bukai ti dudi ari bulih pemansang sekula.
Nyadi ke bendar iya ukai di Saratok aja, tang diatu kitai udah nemu selampur menua Sarawak tu bela keran besemekih ngemujurka jaku ari bala tuai. Taja pia, penulis mina ulih meri chunto ari sekeda rumah panjai di Krian tengah aja.
BISI PENGERANDANG JALAI
Ambika banding dalam Melupa, rumah panjai baka Kedap ti pemadu ili, udah nya bala sida di Pelaie, Mendas, Tanjung Sikup enggau Sungai Belung udah ditemu bulih pemujur dalam pelajar sekula tajapan ukai genap pintu bisi anak sida bulih degree tauka diploma.
Di Kedap endang amat mayuh udah bulih degree nyengkaum Masters, iya nya datai tiga iku sepintu. Di Pelaie bisi seiku udah nyadi professor ba Unimas nyengkaum sekeda sida bukai ti ngembuan degree.
Ba penemu penulis, genap rumah panjai enda tau nadai seiku ti nyadi pengerandang jalai, nguluka sida bukai ngulihka pemandai degree ari universiti. Laban enti bisi seiku ti nyadi chunto, nyadi ‘role model’, iya nyadi peransang lalu ngayanka anak rumah panjai ngembuan pemandai sama baka enggi orang bukai lalu ulih mujur dalam pelajar sekula sida. Reti nya enda tau nadai seiku ti ngerintis sereta ngerandang jalai awakka nyadi peransang dititih bala nembiak bukai ba genap buah rumah panjai.
Oleh TELESA EMPERAN