![](https://utusansarawak.com.my/wp-content/uploads/2020/07/STAIL-Pendidikan-PIX-1.jpg)
![](https://www.utusansarawak.com.my/wp-content/uploads/2020/07/STAIL-Pendidikan-PIX-1-1024x768.jpg)
KENA ngenukuka pandemik Covid 19 ulih disekat, perintah udah neritka Atur Nagang Pemindah (PKP) berengkah ada 18 Mac sebedau atur nya dilonggar ngagai PKP Pemulihan (PKPP) kena 10 Jun lepas.
Udah tentu rayat lantang ati lebuh PKPP tu diteritkuasa beratika mayuh sektor rama engau kompeni luar di dalam menua tepagang kenyau ari tiga bulan ke udah bekaul enggau peneritkuasa atur tu.
Antara ke udah tepagang nya bekaul enggau peneritkuasa atur nya pekara pelajar nengah sekula-sekula ditutup lalu ngujungka bala nembiak sekula enda besekula baka selama.
Keba nya Komiti Pemansang enggau Pengelikun Kampung ( JKKK ) Rumah Saga, Nanga Ulai, Rimbas Debak udah ngambi pemutus ngembing nembiak sekula di rumah panjai ngulang pelajar sida sereta nembuka kereja sekula.
Tu kena ngenukuka nembiak sekula ke diau di rumah panjai sida enda jauh tinggal lebuh sekula dibuka di serata menua ila.
Sambil diketuaika ulih Tuai Rumah (Tr) Saga Unggut ke nyadi Chairman JKKK Nanga Ulai, sebengkah program udah diperunding khas ungkup semua nembiak sekula di dalam rumah panjai sida.
Nengah program nya ke dipejalaika ulih raban komiti JKKK rumah panjai nya, bala nembiak sekula udah digelumu di siti endur ke udah disedia sambil dikemata ulih pengembing ke udah dipilih.
“Pekara nyediaka kereban kena belajar nya nadai penanggul kena bejadika program tu ketegal bala pengajar di sekula udah nganjung kereban kena ngulang pelajar sereta latih ke patut ditembu.
“Indah kami mega udah ngambi mayuh kereban pelajar sereta latih ari internet awakka pejalai program tu mujur agi ungkup nembiak sekula ,” ku Tr Saga.
Iya madahka program nya sebengkah insentif JKKK iya kena mantu bala nembiak ngulang pelajar sida di rumah panjai lebuh sesyen sekula bedau diasu dibuka baka selama maya ke diatu.
Taja pia , piak JKKK Nanga Ulai kata Tr Saga tetap ngemeranka Prosedur Operasyen Standard (SOP) ke udah ditetapka perintah lebuh bejalaika program nya di rumah panjai sida.
Sekeda ari pekara ke disenurutka ku pengajar ke suba nya menggau penutup mua, masu jari ngena sabun selalu mega seraka rama satu meter antara pangan diri .
“Program belajar di rumah panjai tu tudah dipejalaika enggau lanchar sambil senurutka SOP ke ditetapka olih perintah nengah peneritkuasa PKP itu.
“Keba nya aku meri terima kasih ngagai semua piak ke udah ngambi bagi dalam ngemujurka program itu ungkup ke pemanah nembiak redak Rumah Panjang Nanga Ulai, Rimbas,” ku Tr Saga.