![](https://utusansarawak.com.my/wp-content/uploads/2020/07/Pic8.jpg)
![](https://www.utusansarawak.com.my/wp-content/uploads/2020/07/Pic8.jpg)
Ba Tusun Ke-10, tu mai kita nampung pansik pasal kuasa mistik bansa Dayak Iban bisi besangkut paut enggau penemu Sihir (Black Magic, Ilmu Hitam). Maya kitai mansik sereta bejurai pasal utai ti dikumbai mistik tu, kitai enda ulih enda nyebut pasal kuasa Petara (God Almighty, Tuhan, Allah Taala), Antu Bunsu Petara (Dewa Dewi) enggau Antu (Sihir, Sitan, Jin, Iblis, enggau ti bukai. Kuasa mistik tu mega tau dibagi ngagai 3 raban nya: i. Mistik Antu ii. Mistik Antu Bunsu Petara(Dewa-Dewi) ii. Mistik Petara (God Almighty, Tuhan, Allah Taala )
MISTIK ANTU
i. Mistik Antu nya kuasa ti ulih Beliau ari Antu: sitan, jin, iblis, sihir, enggau ti bukai. Kenu ku Beliau @ Bomoh ti kala berandau enggau aku, penemu mistik ti dikena sida berubat iya nya: pengaruh (ubat) enggau puchau. Pengaruh tauka ubat nya mayuh bansa tauka tukuh baka: batu, tanduk, taring, ngeli, kayu, batu, etb. Bisi mega pengaruh dalam tukuh ai ti disimpan dalam puchung. Kereban bukai iya baka sirih, pinang, kapu, kain, daun, entembu enggau mega utai tumbuh ti bukai.
Beliau @ Bomoh bisi dua iti bansa penemu mistik ti bepelasarka Antu: i. Kuasa mistik dikena ngubat mensia ti tabin ii. Kuasa mistik dikena medis mensia. Beliau @ Bomoh Dayak Iban jarang amai nguna kuasa mistik sida kena medis mensia klien sida, enti enda ari dendam tauka bebalas. Kebuah pia, kenu ku sida, Beliau @ Bomoh ti dulu mungkar nanjar ngemedis orang bukai deka tulah tabin raya lalu parai kena empa pengaruh iya empu.
Beliau @ Bomoh @ Dukun ulih ngubat orang ti tabin ti kena kuasa mistik baka sida ti kena pengaruh orang bukai. Sida ulih muru antu sitan dilekat ba tubuh orang ti sakit. Sekeda Beliau ulih ngubat orang ti punas lalu dah nya tau bisi anak. Sida mega tau ngulihka indu tauka laki ti deka ke laki tauka bini orang: tu disebut orang jayau. Sekeda Beliau tau dikena ngiga orang ti mati lemas tauka lenyau enda temu tunga. Sekeda Beliau mega ulih nyaga mensia bukai ari kena pengaruh tauka ubat orang. Sida ulih ngaga jimat ‘tangkal’ ti dibelit ba rekung nyadi marik tauka ditangkin ba punggung. Sekeda Beliau nguna kain chelum tauka daun sabang ti dilekatka sida ba pintu rumah kena nyaga mensia ari Antu @ black magic. Ba kain tauka daun nya ditulis iya leka puchau tauka sampi ngena tulis Jawi munyi tu: “Aku dijaga ari semua utai jai ari Antu: sitan, jin, sihir tauka nama-nama utai ari langit tauka ari tanah.”
Kuasa mistik kedua ti ulih digaga Beliau iya nya: ngemedis mensia bukai ngena kuasa Antu: sitan, jin, enggau ti bukai. Beliau mega ulih ngaga pemenchi antara dua iku orang melaki bini tauka pemenchi di antara diri sebilik.
MAYUH BANSA BELIAU
Kenu ku sida Beliau, sida bisi mayuh bansa Beliau bepanggaika bansa kuasa mistk ti dipegai sida. Sekeda Beliau bepun ari peturun sida empu. Sekeda Beliau belajar ari Bomoh bansa bukai baka Melayu, Kedayan tauka Dayak ari Kalimantan. Mayuh mega Beliau ti belajar ari bansa bukai di serata dunya tu.
Beliau ulih ngaga kuasa mistik munuh orang ngena penemu jai (ilmu hitam) ti dikumbai “rakit’. Utai nya digaga ari buk enggau pekayan orang ti deka dibunuh iya nya. Udah semua barang nya tadi diengkah iya ba pendam, orang ti deka dibunuh iya nya tadi deka tabin raya. Kenu ku Beliau, doktor ba hospital enda nemu ngubat penyakit orang nya. Alah enda, orang ti tabin nya mega patut ngiga Beliau bukai nyumanka iya. Ulih tauka enda Beliau kedua nya nyumanka iya? Nya kuasa mistik ti enda ulih disaut sapa-sapa. Nya mih, semua Beliau @ Bomoh tentu bisi kaul mistik enggau pangan diri. Sida nemu sapa ti ngubat tauka ngayahka orang [klien sida] ti tabin raya kena ilmu hitam nya lalu sida mega nemu chara ngubat nyumanka orang nya.
Sekeda pengaruh ‘ilmu hitam’ ti bisa dikena Beliau, Bomoh tauka Dukun ngayahka orang iya nya pulung. Pulung digaga ari mayuh macham utai. Sekeda pulung digaga baka telu manuk segala lalu terebai baka bol api tampak maya malam hari. Bisi mega pulung ti digelar sida ‘tukul besi’ ti ulih ngayah sereta ngemedis tubuh dengah sida nya. Pengaruh tu dianggap kuasa mistik ti pemadu bisa sereta jarang ulih ubat sereta disumanka Beliau kedua enti agi sama tikas enggau iya. Bisi mega pulung ti digaga ari batang tebu jerenang enggau utai bukai ti enda alah sebut diatu.
Semua Beliau, Bomoh tauka Dukun sigi bisi guro sida empu ti endur sida belajar. Sapa lebih tinggi tikas penemu dalam nya, sida mih dulu menang. Taja pia, ba pengujung iya sapa ti ulih menang? Pia mega, anang enda ingat, kitai Iban ti ngena servis Beliau patut nemu diri sereta ngelala kuasa mistik Beliau nya. Bejimat-jimat mih, anang alah akal. Kuasa mistik tu ukai utai sengapa lalu enda ulih dimain-main.
Pia mega, kitai Iban@ Dayak ti megai agama Kristian: anang kelalu sumbung….anang sepeneka ati nyebut pasal kuasa mistik Beliau, Bomoh tauka Dukun tu…laban utai tu endang bisi di dunya tu. Iya sebengkah ari pekara misteri tu enda ulih saut mensia sengapa enti enda enggau Pengasai Ke-6 & Ke-7. Kitai Iban Kristian mega tau pedis kena laban kuasa mistik ti bepelasar Antu tu, enti kitai kelalu sumbung sereta enda bebasaka sida. Pia mega, anang kelalu irau, uji bacha bup kudus: Acts 5:16, Mathew 8:16, Luke 6:18. Ayat mistik ari Petara tu mega ulih mantu kitai ari pengaruh ‘ilmu hitam’ Beliau nya: enti kita arapka Iya.
ii. Mistik Antu Bunsu Petara (Dewa-Dewi) (Besambung minggu nyin ila…)
Nya mih lansa pasal dunya misteri ti bisi kaul raban bansa Dayak, Iban. Munyi aku dulu suba, sekali agi ku madah, tuju aku mai kita macha tauka mansik pasal dunya misteri tauka disebut kitai Iban ANTU, ukai aku deka mai kita nyembah ANTU tauka ANTU BUNSU PETARA tang tetap nyembah Petara (God Almighty) taja kitai ngena chara ti bebida.