![](https://utusansarawak.com.my/wp-content/uploads/2022/03/KMKKkerja-pix-28.02.22-1024x768.jpeg)
SIMANGGANG: Ngatur pengawa ngena chara baru beguna amat ngagai bala Tuai Mensia Mayuh enggau Tuai Raban Bansa (KMKK) sepemanjai sida meri servis ngagai rayat ba kandang menua ke dipegai diri empu.
Ku Penulung Menteri Pelajar, Inovasyen enggau Pemansang Pengelandik Datuk Francis Harden Hollis, ngena chara ke baka nya beguna amat laban tebal agi pengawa ke digaga sida begulai enggau mayuh bengkah ijinsi perintah diatur ngena chara online ba maya ke diatu.
“Dulu suba KMKK patut nurun ngagai opis mayuh bengkah ijinsi perintah lebuh ngatur pengawa bekaul enggau rayat sebedau pengawa ke baka nya diatur ngena komputer tauka telefon pintar ke ulih disambung ngagai networking internet kemaya hari tu.
“Ketegal nya KMKK patut ngembuan penemu Teknologi Komunikasyen enggau Pemadah (ICT) ngambika ulih ngenyampatka agi proses pemansang sereta seruran ulih ngatur pengidup rayat lebih mudah, jampat sereta digaga enggau manah.
Kelimpah ari nya Harden ti mega Kaban Kunsil Nengeri (ADUN) Simanggang deka meda KMKK ngatur institusyen sida nitihka atur baka ke udah disediaka ijinsi perintah.
Ku iya, ngena chara ke baka nya beguna amat ngambika KMKK ulih nyadi institusyen ke efektif sereta dipebasaka rayat diau ba kandang menua dipegai diri empu.
“KMKK patut ngatur aum enggau aktiviti ke ulih meri penguntung ngagai komuniti kelimpah ari nyediaka ripot nyadika bukti betulis diberi ngagai Opis Pelilih Menua.
“Sida iya mega patut nerangka semua belanja ke udah dikena ngagai ijinsi perintah enggau rayat nyadika bukit pengelurus enggau integriti KMKK ba kandang menua diri empu,” ku iya.
Taja pia, Harden ngarapka KMKK komited ngesan tanggungjawap ke diberi sereta ulih ngemenuhka Key Performance Indicator (KPI) baka ke deka dipeda perintah,” ku Harden.
Dulu ari nya iya enggau raban KMKK bisi betemu enggau Pemesai Pelilih Sri Aman, Mohd Ashree Wee sebedau betemu enggau tiga bengkah ijinsi ngemujurka Program Transformasyen Menua Pesisir (RTP) DUN Simanggang.