GENAP kali bisi pengawa rami enggau begulu gaga ati kenyau ari kelia nyentukka kemaya haritu endang semampai bisi atur ditagaka kena kena bepinta, kena besampika berekat ari Petara.
Nya alai maya pengerami baka Gawai Antu, Gawai Umai, Gawai Tajau, Gawai Burung enggau semua pengerami gaga ati baka Melah Pinang, seiti ari penggal atur pengawa orang kena menggal pengaga ati nya miau pengabang.
KEBUAH MESETI BEBIAU
Mayuh endar kebuah pengabang enda tau enda dibiau.
Kesatu, biau nya kena orang betabarka burung ke jai. Kedua, iya dikereja orang kena ngelalu penatai pengabang mayuh ngichaka sida nya mai tuah, mai limpah ngagai orang ke empu rumah sereta ngagai bala pengabang empu, minta sida sama betuah belimpah baka orang ke empu rumah. Ketiga biau nya mega kena minta kasih ari Petara ngambika meri penyelap enggau pengembap, meri pengerai enggau pengayu ngagai bala mensia mayuh nyengkaum bala pengabang sereta mega orang empu rumah. Reti nya biau bepinta pengerai enggau semua pemanah ke bukai baka minta pengelantang penyenang dalam pengidup.
Biau pengabang tu sigi dipejalaika orang ba pun pengerami, iya nya udah bekau pengabang nyau jenuh udah duduk sereta mega penggal pengawa bukai, nitih atur sebuah-sebuah rumah panjai ke bempu pengawa, tauka orang sepintu bilik ke bempu pengawa, kelebih agi baka dalam pengerami melah pinang.
LEKA BIAU NITIHKA BANSA GAWAI
“Nyadi leka biau pengabang nya mega nitihka pengerami nya. Enti iya Gawai Batu, biau pengabang bisi mega bepinta pemulih bumai betaun, lalu enti maya orang bebiau Gawai Antu, leka biau nya deka muji orang ke empu ruang bilik dulu, udah nya baru muji bala pengabang mayuh ke datai. Mayuh macham leka biau pengabang, laban iya nitih gawa atur pengawa ke alai sida nya ngabang,” ku niang Lemambang Jingan anak Lanchang @ Udang ke dulu menya tebilang landik bebiau di menua Batang Melupa, Saratok.
Udang mansutka jaku tu lebuh berandau enggau penulis urung taun 1979 kelia.
Genteran biau pengabang ke dikena ka chuan dalam lambar tulis tu nya siti ari genteran biau ke selalu agi dikena orang miau pengabang ba menua Batang Ai, Skrang, Batang Lupar, Saribas enggau Krian, kelebih agi pati Saribas baka menua Paku, Rimbas, Padeh enggau Layar, sereta semua ai Krian baka Kabo, Melupa, Kawit, Ulu Krian, Budu, Telik, Awik, Sebelak, Sebetan enggau semua genturung menua Krian ulu, tengah enggau ili.
Uji kitai sama ninga sereta belajar mimit ari biau pengabang ari seiku tukang biau ba sebuah rumah panjai dalam ai Assam di Saratok.
Ooo-ha! Ooo-ha! Ooo-ha!
Sapa ke semetak inggar bemunyi?
Munyi ke masak chagak bedil besi,
Tebah bini tuai kitai, Datuk Musa Giri
Didinga ari tisi langit lati,
Lanji-lanji tengkak sawang.
Ni utai ke semetak inggar didinga?
Munyi ke masak chagak bedil temaga
Tebah Empiang bini Anya
Didinga ari Singapura
Pansa geruda kapal bekejang,
Ngadap ka leka matahari mati.
Nama ke semetak inggar temekung?
Munyi ke masak chagak bedil kelutung.
Tebah Kala Nyepit nya gela Subung,
Didinga ari pun Semambu Ngandung
Kunjung-kunjung nyadi benung Tajau Bujang,
Kebung ka burung tiung lelaki.
Ngangauka Datuk Kanang Langkau Seri Pahlawan,
Puchung begantung nengan bulan,
Gagah Berani nama nuan, tau nangga
Gam gigi gumbang.
Rumbai tu beranak ka Endu Pupu Kebul Bebuli
Tu indu pemadu nama,
Dikumbai Dayang Tekang Mau Tuchi
Rega nengeri siti menua
Beranakka Lulung datai ari
Segupung Ati Tanah
Sembah di kelasah pandan bekuang.
Beranakka Kumang
Nepan di takang apung beluyah
Menyadi Saripah Aka Tuan,
Jadi enggau Sigi Beru Hari
Ninggang kunchi guntur beringgang,
Jadi enggau Sigai Beru Lemai
Ninggang telesai ujan sayang.
Nya orang ngemeran ka batu pesuk
Teman tunjuk jari lima
Ai belambuk ngampuh ka menua.
Nya menua Apai Miga
Betanduk ngena, umba ketapu
Buok galung bauh ngelagetang.
Ari nya baru aku ngangau ka
Ribai ke datai ari tasik besai
Linang ledung,
Betumpu alau, berimbai ruai,
Enggau Menyalin Bungai,
Tutup Temaga Lawai Bunsu Garai,
Berumah di rantau panjai
Tinggang telesai bungai engkuang.
Rumbur ka Sibau rambuk bulu
Menua ampa raya tekebu,
Sebuah tukau bangkung langkau
Menua Lemandau datai ari ngelepau
Gumbang besabung.
Menua pating aur pengerindu
Lendu-lendu maguh ka
Ulu Belimbun Jawa.
Takang buluh ayu ngachuh ka ulu
Putih Menyala.
Nya menua Raja Bangka bedinding ngena
Gumbang menyadi.
Tuan Jandan bedinding hari
Sukadana Bebuli Ati.
Nya betampung enggau menua
Raja Segangga Gunggung
Penyadung Antu Tuah
Berimbai enggau Raja Segangga Ganggai
Penatai Antu Limpah,
Nya jadi enggau Kemeli Kemantan Padi
Diambi mimpi jadi raja.
Jadi enggau Kemelat Tampuk Lensat
Diambi kenyap tinduk lina.
Dia sida mai pengaruh,
Batu lementak bai ngabang
Ngambika tau nyelepak awak
Menua orang.
Batu duri bai ngabang
Ulih nemu di tuki ridan pengerang
Batu pabung mai ngabang
Ulih nemu di lampung tekalung pundang.
Taring uting babi ngelampai
Tanduk rusa mulai,
Gemala panggum tupai
Dibai orang tuai mansang nandai
Selit di punggai puting ilang.
Awakka gayu, awakka guru!
Awakka gerai nyamai!
Raja nguan menua!
Kami minta jalai bidik enggau lansik,
Minta betuah minta belimpah,
Minta gerai minta nyamai
Minta chelap minta embap.
Aku ngangauka Petara Aki, Petara Ini,
Ngangau ka orang ke lama udah lelang,
Lama udah midang,
Sida ke udah parai, ke udah nadai,
Nya dikangau, ditesau,
Nya aku kumbai, aku lambai.
Enda kami busung, enda kami lunggung,
Enda kami tulah, enda kami pimpah.
Ga dikuan aku ditanggam bentuk selung,
Ga kaki aku bediri ngembar ruit pendawan.
Pala aku dibiau selanjau ijau manuk sabung
Dada aku luak tata minyak ai juyung
Ga aku baka paku besurung gelung
Baka tubu besulur rebung
Baka penduk betampung puchuk
Baka tali betampung wi
Baka tengang tampung belembang.
Baka rutan tampung danan.
Kami ngangau ka orang lama parai
Lama udah nadai
Ngangau ka orang ke lama udah midang
Lama udah tumbang.
Tinggang batang tebelian wi.
Ngangau ka orang lama udah nadai
Kena keranjai indai imbuk kedidi
Orang ke lama udah rentap langgar urat
Dandi lelaki.
Orang lama udah suyak tinggang karak
Kepayang padi.
O-ha! O-ha! O-ha!
Kita ke dalam tanah nyenguk naka punggung
Kita ari langit nilik naka rekung
Kita ari ili mudik sebuah bangkung
Kita ari ulu undur sebuah barung.
Kita ngabang piring rendai, piring salai
Kita ngabang piring asi, piring tumpi.
Enti kita bela udah datai, udah nyeluai,
Enti kita bela udah betugung, udah betembung
Dia kita duduk di tikai wi, tikai peradani.
Tikai pandan, tikai rutan.
Nya kitai empuru makai kapu
Kita beranggap, kita nginsap
Tang kita udah makai rendai, makai salai
Kita ngabang, kita mansang
Kita mai ubat serangkap genap
Mai pengaruh kambuh tubuh.
Nya baru ninggalka batu remaung
Ulih nyamah di parung tingkah tebiang
Nya baru ninggalka batu ratai ka Simpurai
Ulih nyamah di ratai buluh temiang.
Nya baru ninggalka batu pama ke lalau lamba
Ulih nyamah di keresik lansar didendang.
Nya baru ninggalka taring tengiling ka Keling
Dua meling, lapan bekumbang.
Nya baru ninggalka penyelinting
Sangking di tunjuk jari butang
Nya baru ninggalka basilar
Tangkai ka di tandan bau nuking.
Nya baru ninggalka kebal tutup
Nangkup ka adup ruang belakang.
Nya baru ninggalka lansik bidik
Ka betuah enda langkang.
Nya baru ninggalka batu padi
Kebayan puli di mua tibang terentang.
Meri nuan seharitu
Baka batu lulung umbak
Meri nuan seharitu lelijang. OOha…Ooha…
Oleh TELESA EMPERAN