![](https://utusansarawak.com.my/wp-content/uploads/2020/11/1.-115.jpg)
![](https://www.utusansarawak.com.my/wp-content/uploads/2020/11/1.-115.jpg)
Sabak ti siti pengawa asal kitai bansa Iban. Iya dikereja ulih tukang sabak maya rabat (malam nyenggai di menua Batang Krian enggau Saribas) kena ngelulu pengangkat sereta pejalai semengat tudah ti parai nya berengkah ari rumah alai iya parai sampaika menua Sebayan.
Ba serantu jalai endang mayuh bendar menua dipansa tauka ditengah semengat, nyengkaum nengah Titi Rawan sebedau nyemerai ngagai menua Sebayan di Batang Mandai Mati. Sebedau nya iya mega mansa menua dikumbai Pintu Tanah ti alai iya deka ngebuka pintu nya. Ditu meh tukang sabak mantaika pengelandik diri ngelulu semengat tudah ti parai nya tusah ngebuka pintu tanah, baka reti kelulu nya ngenang semengat melunggang menua idup ngagai menua mati.
Diatu bala sida tukang sabak nya nyau udah abis ninggalka dunya injau kitai tu, mina tinggal dua tiga iku agi tang nadai agi ngereja sabak kelulu baka dulu suba laban tebal agi bala Iban di rumah panjai tauka di menggeri udah masuk Kristian. Taja pia, tukang sabak siku berasal ari menua Senunuk di Paku, Saribas bisi bekunsi enggau penulis sekeda sabak kelulu.
Iya enda ngasuh nama iya ditulis ditu. Kelimpah ari nya sekeda leka sabak ditu bisi dinjau ari siti bup ditulis niang Jimmy Donald menya.
Nyadi kelulu dalam leka sabak tu ngenang pasal semengat tudah ti parai nya niki sebuah rumah di Sebayan munyi ti entudi tu.
Datai Burung Endan di Sebayan, peda perabung rerenyung tunggul tulang. Manuk mengkukuk ijau lelayang, rumah entak reregah panjai jementang.
Lalu niki di geri, anak temuai rambuk sapai, Sengalang rambuk berang. Jingkau lalau abis jejenenggang, tunjan tangga tunsang kengkang. Dindik iya tempuan, manah batan sima kenyalang.
Baru sida ti nyaya, bisi nyawa lumpak tetukang, “Apu duduk unggal, duduk. Duduk meh, temuai rambuk sapai, duduk sengalang rambuk berang.”
“Awakka unggal, awak! Aku nuju orang ti nagaka aku. Enteran panjai, endur ngentakka gansai, nyapi rambai mengkabang tumbang.”
“Duduk unggal duduk!”
“Awakka unggal, awak! Aku ka nuju orang ti nagaka aku enteran pandak, endur ngentakka sangkuh tumbak, urat nyerenang lempuang.”
“Duduk unggal duduk!”
“Awakka unggal, awak! Aku deka nuju orang ti nagaka aku tanduk janga rusa, alai aku ngaitka ma, bebuta burit jarang.”
“Duduk unggal duduk!”
“Awakka unggal, awak!” Aku deka nuju orang ti nagaka aku pemanggai ruai alai aku manggaika terabai, kena tampai lantang disimbang.”
“Duduk unggal duduk!” Awakka unggal! Aku deka nuju orang ti nagaka aku tikai besai baka Danau Barai lilih nyegang.”
“Duduk unggal duduk!”
“Awakka unggal! Aku nuju orang ti nagaka aku penyandih tekih lading tengkajang.”
“Duduk unggal, duduk!”
“Awakka unggal, awak! Aku deka nuju ruai Jerugu, sayau tingkil ninggalka orang.”
“Oh, enti nuan ngiga, nyin meh ruai Jerugu, iya ti bisi enturan pirak, alai nuan ngentakka tumbak, nunang sapak gagang tempuang. Nyin meh ti bisi sengkuar marau, alai nuan ngelempaika senulau baju kelatang.”
Datai di ruai Jerugu, sayau tekebu ninggalka orang, lalu duduk temuai rambuk sapai; duduk sengalang rambuk berang, langgar gandar batang senapang, buka ma ari belakang.
Lalu duduk dia iya, nunda penduk nyaruk sengkajang, duduk amai di tikai bemban entabalang, duduk nyandih di tekih lading sengkajang.
“Duduk uchu duduk!” ku ini iya Badung, sayau pumping, ninggalka kebung langit ngeruang.
“Duduk uchu duduk!” ku aki iya Jerugu sayau tekebu, ninggalka nyaru ribut nyepu angina besundang.
“Duduk uchu, duduk!” ku ini iya Gelima, sayau lela ninggalka bala setuga di lubang gangga guntur betinggang.
“Duduk uchu, duduk!” ku ini iya Sendie, sayau lesi ninggalka orang mayuh di sidi matahari pegari tumbuh mansang.
“Lalu, duduk!” ku ini iya Nawi , sayau lesi, ninggalka bala di sidi di baruh matahari mantang.
Lalu duduk Burung Imbuk, nunda penduk nyaruk sengkajang, lalu nyandih di tekih ladang nyengkang.
Udah bekayu penduk di buntut lubuk, baru pensi betundan tinggi, Burung Impidan, datai ari telian lubang ujan labuh memiang.
Engkuna nuan dibai ke ruai, jejukun baka manuk sigun, di tengah kelang, baka nuan dibai ke ruai.Nyau gulu-gulu, baka manuk indu merembam tansang.
Dikebuka pintu bandir tapang, mai kandi besarang sigi pinang belubang, timpa ubung bebengkung danan bekerang.
Udah bekayu legai di langgai sungai, nuju terentang di langgai tawang; udah kandi dibantai, baru sida Sebayan makai pinang.
Ketup pinang kunchit, baru alit nelaga lubang; pakai chambai nyamai betumbuk tulang. Tangkap abap nyerangkap tunggul tebang; betapih sirih enggau taking, jingkau selingau gambih kumpang, perubuhka bunyuh kapu kerang, pakai kapu abu tunu atas bedilang, pakai semakai repuk, ngasuh batuk nyanggir temekang, pakai semakau taruh tubuh tukuh dalam rumbang.
Nyau singkum di mulut kutum, ngulum buah pinang, chemirak tachak mandang rang, ludah bamah buaika lubang, sempa sama lua tikau tempalang, insap nyau betangkap, baka nunu sukat dandang pengerang, perenung baka ti nunu tambung lubang gendang!
Nyadi bakanya meh sekeda leka kelulu sabak ngenang semengat ti niki ngagai sebuah rumah di Sebayan nepat aki enggau ini ti dikelala.
Ba menua Batang Melupa di Saratok diatu endang nadai agi sabak kelulu baka kelia. Tambah mega endang udah nadai agi tukang sabak. Kelia amat bisi tang seduai ibu nya ti sama sekali petunggal enggau niang apai penulis lama udah ninggalka dunya injau tu.
Maya agi bisi sabak kelulu kelia, endang penuh belama nisi sapat lebuh malam nyenggai, kelebih bala indu laban keran deka ninga pemanah tusun kelulu tukang sabak pasal pejalai semengat tudah ti parai nya kenyau ari iya angkat nurun ari rumah, ngebuka Pintu Tanah, nengah Titi Rawan lalu sampaika iya datai di Batang Mandai Mati di Sebayan. Kelulu mida nama Batang Mandai Idup enggau Mati laban endang bisi sungai nama Batang Mandai di menua Kapuas di Kalimantan Barat, Indonesia. Nya meh asal penatai bansa Iban kelia lalu diatu mengkang diwan bala Iban sepiak nyin.