DALAT: Pengingin ati sida ke diau ba Kampung Klid deka meda bisi jalai raya nyadi nyata sereta meri pengaga enggau penampak baru ngagai sida iya.
Kebuah baka nya laban pengawa nemujurka projek Jalan Kampung Medong/Lebrasau enggau Kampung Klid Dalat dipelabaka tembu ba taun 2022.
Ketegal bisi pemansang ke baka nya sida ke diau ba genturung pendiau ba ulu Batang (Btg) Oya ulih ngasaika pengidup sida iya lebih manah agi ketegal udah bisi jalai raya ke baka nya.
Jalan raya 11.5 kilometer pemanjai ke nelan belanja RM44.4 juta berengkah digaga kena 6 April taun tu sereta dipelabaka tembu kena 5 Oktober 2022.
Menteri Pengelantang Pendiau, Pengelantang Komuniti, Indu, Ruang Bilik enggau Pemansang Nembiak Mit, Dato Sri Fatimah Abdullah sigi endang ngarapka jalai raya nya meseti tembu nitihka timpuh baka ke udah ditetapka.
“Aku ngarapka iya ulih tembu nitihka perambu iya nya maya bulan Oktober 2022. Projek tu lama amat udah dianti sida ke diau ba Kampung Klid. Terima kasih ngagai Kepala Menteri Datuk Patinggi Abang Johari Tun Openg ke udah ngemendarka projek tu,” ku iya.
Iya mega madahka, kelimpah ari meri terima kasih ngagai Abang Jo ketegal udah ngemendarka projek bukai baka bekal ai (SAWAS), Waterfront Dalat Fasa 1 & 2, Centexs, Galeri Warisan Melanau Oya, Opis Pelilih Mit Oya, Parking Lot ba Market Hari Enam enggau iya ke bukai.
Ku Fatimah, ketegal udah bisi jalai nya bekal letrik mega deka bisi sebaka enggau endur bukai ba Pelilih Dalat laban ba maya ke diatu sida iya ngena injin api.
Iya mansuka jaku munyi nya maya Pengerami Nyuaka Chek Pampas ngagai sida ke ngempu tanah endur ngaga jalai raya ba Balai Raya Kampung Medong Hulu kemari.
Kontraktor ke ngemujurka projek nyengkaum ngaga tiga bengkah jematan (Sungai Lebrasau/Sg Peluan/Sg Klid) enggau 30 parit nya Avos (Malaysia) Sdn Bhd Kuching.
Maya pengerami nya iya nyuaka chek pampas penyampau RM169,603.75 ngagai 23 iku sida ke ngempu tanah endur ngaga jalai raya nya.
Pampas nya nyengkaum 25 lot endur ngaga jalai raya dua kilometer keterubah sereta sida bukai deka nerima pampas nya ba bulan November.
Maya pengerami nya Fatimah ti mega Kaban Kunsil Negeri (ADUN) Dalat nyuaka bantu Endowment Fund Sarawak(EFS) enggau Geran Tambah Spesial ngagai siti sekula primari enggau tadika.
Sama bisi enggau maya pengerami nya Sapit Residen Bagi Menua Mukah Abdul Halim Abdullah,Penguasa Opis Tanah enggau Survei Bagi Menua Mukah Sr. Monaliza Ismail, Pemesai Pelilih Dalat Kueh Lei Poh, Penulung Injiner Sivil Opis Kereja Raya Sarawak, Opis Wilayah Tengah Yazid Mustaba, Pemesai Spesial Kaban Parlimen Mukah Dato Hanifah Hajar Taib, Abang Hashim Zainudin, Penghulu Yasa Tanbik, KK Mahrup Libeng (Kpg Medong Seberang), KK Kim Bol (Kpg Medong Hulu), KK Mahadi Basri (Kpg Medong Hilir) enggau Kunsilor Rokiah Yassin.
Oleh Hnery B Siyu