![](https://utusansarawak.com.my/wp-content/uploads/2022/07/Caption-3.png)
Tusun Ke-17
MINGGU tu kitai macha tampung sada bebuah ti diberi pejuluk ‘Nesal Dudi Nadai Reti’ ti udah dichelak dalam Tusun Ke-16 minggu dulu tu kemari. Lalu dalam Tusun Ke-17 tu baru kitai berengkah ngupas reti sada bebuah tu ke besilup. Nyadi sada bebuah ‘Nesal Dudi Nadai Reti‘ tu nyurukka pemesai guna siku-siku mensia ngisi maya tauka rebak biak iya ngena mudal pengidup (baka duit ringgit, reta tengkira, pemakai enggau utai diirup) enggau mudal mensia iya (baka soft skills ke nyengkaum penemu, pemandai, pelajar, pengelandik, pemagas enggau sekeda ke bukai) awakka lebuh iya nyau besai tuai, iya enda seranta enda mensena, enda lansang enda kedubang, enda belala, enda ngining orang bukai dalam pendiau enggau pengidup.
Rentayan Ke-1, Ke-2 enggau Ke-3 nyebut munyi tu:
Ku perati maya lengkas besili,
Jampat bebali:
Iya enda nganti,
Enda alah seli,
Enda ulih biki,
Enda alah seruri,
Enda alah seleti.
Seharitu, udah nyadi kemari,
Pagila udah nyadi tadi.
Maya udah ku sidi,
Jam udah ku tapi,
Musim udah ku keliti,
Mansa udah ku punsi,
Ketika udah ku titi;
Munka aku begedi, ngutuk diri,
Ensepi ba jeman tuai tu
Diri tepipi, rimpai rimpi,
Tegal pengelemi diri.
Chuan biak salah iri,
Rebak nembiak salah bai,
Nesal dudi nama mih reti!
Manggul burung kutuk nadai ni penyadi!
Wayang pengidup aku ulang pasang:
Nadai sepekara ke tau merindang,
Tusun pengidup melintang pukang,
Ulah jelekah senundang-luntang,
Pengawa empelita besuda balang
Kereja melisa sebarang-barang,
Pendiau bebitau, nyelalang jalang,
Sempama abu di tempangan tapang
Dikebuka begiu begalu-gulang
Terus lesi ditabanka hari
Mati dibudi jemu pagi.
Dalam Rentayan Ke-1, Ke-2 enggau Ke-3, pengarang nyidi tali pengingat diri-empu lalu nguji meresa semua utai ti udah dikereja iya-empu kenyau ari mit. Lebuh nyau tuai tu, baru iya sedar, iya nya maya, peluang tauka awak ti bisi maya rebak biak menya, udah dilepas sereta enda diguna enggau manah enggau menyana, enggau menuku. Ensepi nya, baru ngutuk diri, baru nemu nesal – ketegal maya ke agi biak menya ulah digaga empelita, pendiau neraka, ngelusu ngaga penabat tauka pesindang idup kedudi hari. Ketegal nya, takar ke tuai tu pengidup sereba kurang, sereba nadai — suntuk duit ringgit, pemakai, penemu, pemandai, penau, pengelandik. Lalu penesal tauka pengawa ti manggul burung kutuk nyau diatu, lebuh diri nyau udah tuai lukai, buban banan, nya sigi nadai reti sekali-kali, keba ku jaku tadi: Chuan biak salah iri, rebak biak salah bai!
Rentayan ke-4 nyebut:
Isa bintang enda ulih aku tunang
Laban aku tu nadai pemandang engkuang nerutu,
Isa bulan enda ulih jadika perembam dalam
Laban aku tu nadai lunda jematan, duyung melepu,
Isa mata hari enda ulih diambi ke sulu ati, peraja mimpi
Laban aku tu nadai jayau beteri buluh perindu.
Rentayan Ke-4, isa bintang enda ulih diambi ke tunang; bulan enda ulih diambi ke pangan; matahari enda ulih bai jadi, amat ga udah ngulihka senaka utai ke ulih daya, ulih japai, ulih diri-empu ngena tengkira, runding enggau pikir, tulang enggau urat. Tang nya pan enda ga ulih.
Rentayan Ke-5 enggau Ke-6 sada bebuah tu nyebut:
Tang, semua danau dah patut aku keranau
Ngiga empurau beduri pati;
Lempa, tanah paya dah patut aku seruga
Nengkilaka pama muntat ngeli;
Engkebuk dah patut aku jenguk
Nyubuk teguk besiram mandi;
Genting dah patut ku rambing,
Merening tengiling betaring siti;
Seribu jalai, patut dah seribu ku titi
Baru aku jampat mereti,
Tetemuka panti seribu tapi.
Lubuk dalam dah patut aku selam,
Seninjik tetemuka Bunsu Gumba Ngereman,
Nyurungka aku perugan tanduk genali.
Puchuk Tapang Undang dah patut ku tekang,
Seninjik tetemuka menaul kempang,
Nyuaka aku tipang lang menari.
Bukit tinggi dah patut ku tiki,
Ku gagaka terusi, entakka panti.
Sungai besai dah patut ku semerai,
Ku gagaka jalai, aduka titi.
Enggal tasik luar, dah patut aku layar
Lantar enggau bidar lundai kemudi.
Udah patut aku temu, semua ke patut aku giga;
Udah patut aku saut, semua ke patut aku tanya;
Udah patut aku pansik, semua ke patut aku seruga;
Udah patut aku perening, semua ke patut aku peda;
Udah patut aku pakai, semua ke patut aku empa;
Udah patut aku gigit, semua ke patut aku ginya.
Tang semua nya papa mensena, suntuk belala,
Ngenadai panching kesa,
Ngemimit kemi pada;
Laban tali pemagas, enda ku tengkulas,
Mina ku tibar pelapui, nejui sesibui;
Tuak pengidup mina ku kechup,
Enda ku irup nyentuk ke tugui;
Jimat pengering runding dah patut aku teranting,
Tang agi betelu lusing, melulur enjui.
Batang penemu ti diselitka dalam Rentayan Ke-5 enggau Ke-6 tu, iya nya sekeda ari pekara ti udah patut pengarang kereja, tang mih enda dikereja iya (tauka semina dikereja iya main-main) lebuh ke agi biak menya. Ke banding, kampung, danau, tasik, bukit udah patut iya tujah, udah patut iya keranau, patut iya patau, patut iya layar, patut iya selam, patut iya tiki alai begigaka mudal pengidup tauka mudal mensia (munyi ti udah disebut ari pun nyin tadi); tang mih utai nya sekia nadai dikereja iya. Matak jaku pulai, bisi pan nya dikereja, tak dikereja pia-pia aja, dikereja main-main, tauka dikereja enda bendar – enggau jaku bukai, semuti dama dikereja.
Nama kebuah iya pia? Kebuah iya pia, ketegal pengawa udu enda menuku, ulah sura-ura, pendiau empelita, dipanggung enggau pengelusu. Nya alai, nama pengujung? Sigi nadai pengujung bukai, kelimpah ari neribu pengidup ti sereba kurang, sereba nadai, merinsa mensena.
BETAMPUNG
Oleh JANANG ENSIRING