![](https://utusansarawak.com.my/wp-content/uploads/2022/07/Caption-1.jpg)
Tusun Ke-16
SELAMAT kitai betemu baru ba dada keretas surat-kabar Utusan Sarawak (SADA). Dalam Tusun Ke-16 tu alai penulis mai bala pemacha macha, belemati sereta ngupas beberapa pekara ti nyengala agi ke bisi diundan segenteran sada bebuah ti diberi nama “Nesal Dudi Nadai Reti”.
NESAL DUDI NADAI RETI
Ku perati maya lengkas besili,
Jampat bebali:
Iya enda nganti,
Enda alah seli,
Enda ulih biki,
Enda alah seruri,
Enda alah seleti.
Seharitu, udah nyadi kemari,
Pagila udah nyadi tadi.
Maya udah ku sidi,
Jam udah ku tapi,
Musim udah ku keliti,
Mansa udah ku punsi,
Ketika udah ku titi;
Munka aku begedi, ngutuk diri,
Ensepi ba jeman tuai tu
Diri tepipi, rimpai rimpi,
Tegal pengelemi diri.
Chuan biak salah iri,
Rebak nembiak salah bai,
Nesal dudi nama mih reti!
Manggul burung kutuk nadai ni penyadi!
Wayang pengidup ku ulang pasang:
Nadai sepekara ke tau merindang,
Tusun pengidup melintang pukang,
Ulah jelekah senundang-luntang,
Pengawa empelita besuda balang
Kereja melisa sebarang-barang,
Pendiau bebitau, nyelalang jalang,
Sempama abu di tempangan tapang
Dikebuka begiu begalu-gulang
Terus lesi ditabanka hari
Mati dibudi jemu pagi.
Isa bintang enda ulih aku tunang
Laban aku tu nadai pemandang engkuang nerutu,
Isa bulan enda ulih jadika perembam dalam
Laban aku tu nadai lunda jematan, duyung melepu,
Isa mata hari enda ulih diambi ke sulu ati, peraja mimpi
Laban aku tu nadai jayau beteri buluh perindu.
Tang, semua danau dah patut aku keranau
Ngiga empurau beduri pati;
Lempa, tanah paya dah patut aku seruga
Nengkilaka pama muntat ngeli;
Engkebuk dah patut aku jenguk
Nyubuk teguk besiram mandi;
Genting dah patut ku rambing,
Merening tengiling betaring siti;
Seribu jalai, patut dah seribu ku titi
Baru aku jampat mereti,
Tetemuka panti seribu tapi.
Lubuk dalam dah patut aku selam,
Seninjik tetemuka Bunsu Gumba Ngereman,
Nyurungka aku perugan tanduk genali.
Puchuk Tapang Undang dah patut ku tekang,
Seninjik tetemuka menaul kempang,
Nyuaka aku tipang lang menari.
Bukit tinggi dah patut ku tiki,
Ku gagaka terusi, entakka panti.
Sungai besai dah patut ku semerai,
Ku gagaka jalai, aduka titi.
Enggal tasik luar, dah patut aku layar
Lantar enggau bidar lundai kemudi.
Udah patut aku temu, semua ke patut aku giga;
Udah patut aku saut, semua ke patut aku tanya;
Udah patut aku pansik, semua ke patut aku seruga;
Udah patut aku perening, semua ke patut aku peda;
Udah patut aku pakai, semua ke patut aku empa;
Udah patut aku gigit, semua ke patut aku ginya.
Tang semua nya papa mensena, suntuk belala,
Ngenadai panching kesa,
Ngemimit kemi pada;
Laban tali pemagas, enda ku tengkulas,
Mina ku tibar pelapui, nejui sesibui;
Tuak pengidup mina ku kechup,
Enda ku irup nyentuk ke tugui;
Jimat pengering runding dah patut aku teranting,
Tang agi betelu lusing, melulur enjui.
Sigi bendar jaku pujangga pintar, lemambang berakal, ke nelah:
Mensia tesat penunga, laban lembau betanya,
Mensia kirat seranta, laban ngelusu begiga;
Malu bekayuh, perau rarat;
Malu betanya, pejalai tesat.
Enggai ngansah, duku tumpul,
Ngelusu, kelalah idup tepeliur
Engkinjur bubur;
Nesal dudi nama mih penyadi!
Ngutuk diri nama mih reti!
Nya munyi sada bebuah ti dikumbai “Nesal Dudi Nadai Reti.” Apin penulis berengkah ngupas reti sada bebuah tu, iya dulu deka minta pemendar ngagai pemacha mayuh, meri iya ruang ti serekat, alai iya nerangka reti sekeda leka jaku tauka rambai jaku ti bisi dikena dalam sada nya tadi, dikena mulaika pengingat kitai ke tuai sereta ke tambah penemu sida ke nembiak sentang reti sekeda lekajaku tauka rambaijaku bansa diri-empu ti jarang dikena kitai bejaku tauka nulis besehari-sehari:
• Jelekah — nyauka sama reti enggau leka jaku ulah, semina bebida laban jelekah tu ulah mensia ke nyelai-nyelai (kekadang mapap) tauka nempelah-nempelah, baka tak limpang berandauka judi sabung jam orang bukai berandauka pengawa besekula.
• Melintang pukang; senundang luntang – gaya utai ti enda betusun/beripih manah-manah, bisi nya munjur bisi nya melintang; mega dikumbai bintang banting.
• Besuda balang – ngereja pengawa enda tembu. Suda nya tempat tauka palan ti udah diabas baya alai iya deka betelu, tang enda nyadi ga iya betelu dia, nyau betelu ba endur bukai.
• Engkuang nerutu (tauka engkuang nangis); lunda jematan; duyung melepu; buluh perindu — semua nya bansa pemandang tauka jayau dikena ngulihka laki tauka bini.
• Muntat – siti reti muntat nya nadai utai temu, lansang. Tang dalam jaku bebuah tu tadi, reti muntat nya taring babi tauka sebarang utai bukai (baka buluh, rutan) ti betampung enggau batu nyadi – ke pengaruh pemampul bedil (tauka pengaruh ngasuh bedil enggai meletup ditimbakka)
• Ginya – kunyah enda udu laban nyau nadai agi ngeli.
• Pada – sebansa indu utai pengerusak padi di umai.
• Tengkulas – gulung tauka pulung manah-manah, kemas-kemas, baka reti ti enggau tali ti panjai.
• Pelapui – leka tauka tak engkahka sebarang alai, baka ke enggau utai ti enda agi dipeguna.
• Nejui – unjur enda engkebut (baka reti pendiau ular ke diau belelak tauka bejembui).
• Sesibui (tauka sibui-sibui) melulur tauka engkitang ke baruh, baka reti gempung buk mensia ke digaga ke jejabung pedang kirai.
• Kechup – irup enda mayuh.
• Tugui – sedak; tugi; empangup (baka reti sedak beram tuak ti betimbun ba burit rumbang).
• Kirat – berat tauka raya amat (baka reti orang ke sakit; ringkat amat, kayat).
BETAMPUNG
Oleh JANANG ENSIRING