Tusun Kedua
NYA alai mimpi ke tinduk di retuk alang gerunggang
Bebungkur ke lebur bali nengkebang.
Dia iya bemimpi:
Asai ke betemu enggau Bunsu Ini Manang
Nyua’ka iya gempelu batu bintang
Batu tandan bulan mansang.
Diterima iya enggau tapa kiba, jari ngengkang.
Lalu pansut iya ke liu’ tanju’ lantang.
Peda iya bedau ga petakang bintang beguang
Pesedan tandan bulan terang,
Meruan rendang-rendang tumbuh di gentilang tisi langit.
Nya alai nya naka mimpi iya.
Nya alai nya ke diibun, ke ditusun kami seharitu tadi.
Tang mih apin kami nemu empa,
Nemu ulu’ mimpi iya ke munyi nya,
Dia tak tekenyit kami tadi.
Lebuh kami ke kemumuk duduk betugung
Di peretang penyarang rumah belung, engkami ditu,
Di gelenggang Batang Kemidan Rerenjung.
Ninga utai tak bemunyi rengung-rengung.
Lalu pendingka kami.
Kada enda nya munyi Pegagang Pinang Upung
Lebuh medung nyung Rengayung Bujang Paku Lawang
Mansang betunang!
Nya alai kami ke kemumuk duduk bebandi
Begulu’ enggau indu bala lelaki,
Dia kami tak tekenyit, tegepang ati
Ninga utai tai kelalu rami,
Lalu pendingka kami ga.
Kada enda munyi nya kangau Balau Ijau
Di rantau Luba’ Sebandi,
Lebuh gumi sida ke nganjung Sendi belaki napatka Guang!
Kita pen nyau nampak ga tadi, menyadi:
Dipeda kami betandang mansang besurung
Indah enda baka pemayuh semut lutung
Ke bejung-jung betiti serambung jalai bunang.
Nyau dipeda kami angkat bepipis
Nyau baka pemayuh kaban angkis betam’a lubang.
Nyau dipda kami nyeriat baka singut lalat ninggalka idang.
Kita pan nyau .
Datai di tengah menalan nyapan dua betekup, engkami ditu.
Aku tak nyau takut, asai ke deka surut,
Nangika kita bisi mai batu ribut
Bepuput surut ngeridang dunya.
