![](https://utusansarawak.com.my/wp-content/uploads/2020/09/IOW-Merdeka2.jpeg)
![](https://www.utusansarawak.com.my/wp-content/uploads/2020/09/IOW-Merdeka2.jpeg)
SAMARAHAN: Program ‘Info On Wheels’ (IOW) Merdeka sigi relevan amat dikena ngenataika mesej meredeka lebih agi maya musin pandemik Covid-19.
Direktor Opis Pemadah Nengeri Sarawak, Swady Guliling lebuh dirandau pengarang berita maya Program IOW Merdeka enggau Gempuru Sivik ba Pasaraya Farley, Kota Samarahan kemari madahka, ngembuan runding meredeka sigi endang patut disimpan sereta ditanka.
Ku iya, taja pan Program IOW diatur chara relak aja, tang iya dipeda rami amat lebuh mensia mayuh ngepaika menira Jalur Gemilang ke ngayanka mensia mayuh diau ba Samarahan bisi ngembuan runding patriotik lebuh nyambut bulan merdeka ba taun tu.
Program IOW Merdeka ke diatur Opis Pemadah (JAPEN) Pelilih Samarahan nya mega disereta Menijar Pasaraya Farley Samarahan, Eiseng Lau.
Program nya berengkah enggau pengawa nyuaka Jalur Gemilang (menira mit) enggau pamplet ngagai mensia mayuh nyengkaum sida ke ngempu kerita datai ngagai supermarket nya.
Bisi 200 iti menira mita diberi ngagai mensia mayuh ke bisi datai nyereta pogram nya.
Sekeda ari pamplet ke diberi nya Pakej Rangsangan Ekonomi (Prihatin Rakyat), Penambahbaikan Subsidi Upah (PSU), Bantuan Sara Hidup 2020, Aplikasi MyTrace (Bantu Kerajaan Kesan & Putuskan COVID-19), Kurangkan Risiko Dijangkiti Koronavirus, Aplikasi MySejahtera, Soalan Lazim Bantuan Khas Sarawakku Sayang (BKSS) 3.0.
IOW nya inisiatif JAPEN dikena meransang mensia mayuh ngembuan runding patriotik sereta rinduka menua beserimbai enggau Nyambut Bulat Nasional ngena konsep sama bela enggau nyereta chara terus dikena madahka penerang betul sereta jampat ngagai mensia mayuh.
Sama bisi enggau nyereta program nya Sapit Direktor Opis Pemandah Nengeri Sarawak, Aziz Abdul Rahman enggau Pemesai Opis Pemadah Pelilih Samarahan, Abdul Latip Shamsuddin.