MINTA BEREKAT…Dato Sri Tiong King Sing sama enggau miring minta berekat maya Pengerami Ngiling Tikai Gawai
Dayak 2022 ke diatur PDP N.53 Bawang Assan malam Hari Enam ke udah. Sama bisi enggau (ari kiba) Lidam Assan, Joshua Ting Fu Ying,Dr. Annuar Rapaee,Jefferson Jamit Unyat enggau Safiee Ahmad.
SIBU: Pengerami nyambut Gawai Dayak nyadi platform dikena ngerapitka penyerakup mensia mayuh ari mayuh bengkah raban bansa enggau agama ba Sarawak.
Presiden Parti Progresif Demokratik (PDP) Dato Sri Tiong King Sing madahka, pengerami nyambut hari besai nya medium dikena ngerapitka kaul semua raban bansa ba Sarawak.
“Malam tu kitai nempa sejarah laban PDP enggau Parti Pesaka Bumiputera Bersatu (PBB) sama bela enggau ngatur program Gawai ke baka tu.
“Nya ngayanka kitai ari PDP enggau PBB bekerejasama nyadi siti ruang bilik dalam Gabungan Parti Sarawak (GPS),” ku iya lebuh bejaku maya Pengerami Ngiling Tikai Gawai Dayak 2022 ke diatur PDP N.53 Bawang Assan malam Hari Enam ke udah.
Ku iya, pegawa ngatur pengerami ke baka nya mega madangka semua rayat ba Sarawak sama bela bebasaka panagn diri enggau adat bansa bukai.
“Pengidup kitai meseti bisi penyerakup baru kitai ulih ngemansangka kandang menua diri empu,” ku Kaban Kunsil Nengeri (ADUN) Dudong.
Iya ngarapka pengerami ke baka tu lebih besai agi diatur ba taun nyin ila.
Tiong ti mega Ambassador Spesial Menteri Besai ngagai Republik China setuju ngambika semua Tuai Rumah (TR) ba sitak Kunsil Nengeri (DUN) Bawang Assan dipaduka sererta diberi surat kuasa megai penuduk.
Sama bisi enggau maya pengerami nya Sapit Menteri Pelajar, Inovasyen enggau Pemansang Pengelandik ti mega ADUN Nangka Dr Annuar Rapaee, Sapit Menteri ba Opis Premier Sarawak (Undang-Undang enggau Adat Bumiputera) ti mega ADUN Bukit Goram Jefferson Jamit Unyat, ADUN Daro Safiee Ahamd, ADUN Katibas Lidam Assan, Seketeri Politik Premier Sarawak ti mega Tuai PBB N.53 Bawang Assan Romeo Christopher Tegong, Chairman Ngatur Pengerami Kunsilor Joshua Ting Fu Ying enggau Tuai PDP Pampang N.53 Bawang Assan Wong Hua.