NGERINDUKA ATI … Seketeri Perintah Sarawak, Datuk Amar Jaul Samion ngena lepa puang iya nemuai ngagai Gawai Bazar Tikas Nengeri Sarawak 2022 ke diatur ba kandang komplek Kunsil Bandaraya Kuching Selatan (MBKS) kena Hari Enam ke udah.
KUCHING: Seketeri Perintah Sarawak, Datuk Amar Jaul Samion ngena lepa puang iya ngatur penemuai ngabas Gawai Bazar Tikas Nengeri Sarawak 2022 ba kandang komplek Kunsil Bandaraya Kuching Selatan (MBKS) kena Hari Enam ke udah.
Gawai Bazar Tikas Nengeri Sarawak diatur berengkah ari 17 ngagai 26 Jun sereta dibuka berengkah ari pukul 4.00 ngalih hari nyentukka ngagai 11.00 malam (Hari Satu ngagai Hari Limat) sereta pukul 10.00 pagi ngagai 11.00 malam maya Hari Enam enggau Hari Minggu.
Maya nemuai ngagai endur nya Datuk Amar Jaul berandau enggau bala sida ke bedaja sereta mensia mayuh kelimpah ari nyepi mayuh bengkah pemakai ba kedai ke bisi ba Gawai Bazar nya.
Sama enggau nyereta penemuai nya Datuk Bandar Kunsil Bandaraya Kuching Selatan (MBKS), Dato Wee Hong Seng.
Gaya ke ngerinduka ati nya, bisi meda mayuh bengkah raban bansa ngelingi Kuching mega sama bela datai nyereta program nya.
Kelimpah ari nya, mensia mayuh mega diperindang bala artis raban bansa Dayak nyengkaum mayuh bengkah aktivit bukai sepemanjai program nya.
Sekeda ari aktivti ke bisi diatur nya pekit karaoke ke nyediaka perais mata duit RM500 ngagai penyereta ke nyadi champion, nyual asil pengelandik jari, nyual pemakai enggau ai irup, pekit Kumang enggau Keling, Sarawakian Got Talents enggau iya ke bukai.
Bisi 200 bengkah kedai dibuka ba Gawai Bazar ke sekali tu.
