![](https://utusansarawak.com.my/wp-content/uploads/2020/08/Caption-6.jpg)
![](https://www.utusansarawak.com.my/wp-content/uploads/2020/08/Caption-6.jpg)
PUN penatai pemisi artis jeman 70an ngagai 90an enda sebaka enggau artis diatu. Jeman nya suba bala artis semina ngarapka asil ti datai ari album sida. Diatu trend ke bansa nya udah berubah laban ngaga album penuh tauka single semina nyadi ke tempara endur sida mantaika (to popularize) diri. Bisi kebuah trend nya berubah. Iya ti bendar, penatai pemisi artis kitai Iban diatu bepanggai ba show ba mayuh bengkah palan pemerindang.
Minggu tu ruang pemerindang bekunsika berita enggau cherita ari Andy BRC; dikangauka mega enggau nama Aki Agi Sigat. Andy madahka penatai diri ari Betong tang diatu netap di Kuching laban nitih ke periuk asi diri empu. Kelimpah ari nyadi penanyi, Andy bisi muka dagang kediri. Dagang nya ku iya makin mujur sereta makin mudah dikereja laban iya majak dikelala ba industri pemerindang.
ALBUM ENGGAU LAGU
Sekumbang ke udah begelar artis, Andy udah bisi tiga iti lagu iya nya Aya Agi Sigat, Ngatika Diri enggau Asai Ke Dalam Mimpi. Tiga iti agi lagu ke udah dirikot ba studio nya Bungai Semaya, Joget Sulu Ati enggau Sama Keran (bepadu nyawa). Ditanya sentang perambu ngaga album penuh Andy madahka, pekara nya udah bisi dalam ati iya tang biar lagu nya udah dirikot dulu. Kebuah pia ku iya laban ngerikot sepuluh iti lagu ba siti timpuh nyangka tau pulai ke penanggul kelebih agi ari aspek modal. Andy madah semua lagu dirikot iya ba Ranyai Studio enggau Joseph Clem Studio.
PENGIDUP ARTIS
Ngenang gaya pengidup artis Iban maya ke diatu, Andy madah ukai senang ngidupka diri bepanggai penuh ba pengawa belagu.
“Idup bepanggai ba pengawa belagu tauka show tau dikumbai tusah diatu. Taja pan diatu udah mayuh palan pemerindang tang diatu mega nyau betambah mayuh artis baru.
“Kadang-kadang pemayuh palan pemerindang baka karaoke pub, funfair enda tetangkupka pemayuh bala artis. Penanggul ti kedua nya penatai pemisi artis. Diatu artis kitai enda ulih idup ari asil bejual album.
“Mayuh chabar lalu siti ari nya ‘cetak rompak’ lalu kedua laban orang ulih download lagu ngena youtube semina milih lagu ti dikerinduka sida. Trend nya nunjukka peminat lagu Iban kurang gagit meli album penuh bebanding enggau mendingka lagu dikerinduka sida ngena youtube,” ku Andy ngepunka saut iya ba randau kami duai.
TIP NYADI PENANYI BEKUALITI
Mayuh penemu madahka pengawa pemerindang enda tentu mudah. Kebuah pia laban kitai deka nentuka orang ti datai meda pulai enggau ati ti puas sereta gaga.
“Kitai ke nyadi penanyi ukai semina belagu pia aja. Kitai deka ngasuh peminat kitai teperindang lalu sida berasai enda lebu. Bisi beberapa iti pekara ti patut diperatika kitai. Vokal tauka sada nyawa patut nadai penimpang taja kualiti vokal enda sebaka enggau pangan diri.
“Nambahka nya, kualiti ‘performance’ kitai mega patut dijaga. Dia mih endur orang nentuka kualiti siku-siku penanyi. Chara kitai begulai enggau orang mega siti pekara ti chukup beguna laban artis patut enda sumbung enggau semua orang. Pekara ke penudi nya pekayan tauka gaya idup. Enti ulih kitai mesti enggau naka ulih ngena gari ti badas sereta narit ati,” ku Andy sekali agi bekunsika penemu enggau tip nyadi penanyi.
INDUSTRI MUZIK
Lebuh mantaika penemu diri sentang industri muzik kemaya hari tu Andy madahka, lagu enggau muzik Iban majak manah. Siti pekara ti patut dikemanahka agi ku Andy nya kaul enggau pangan diri. Ngena chara bekempit semak enggau pangan, mayuh penemu enggau utai ti badas ulih dikereja. Kebuah pia laban industri tu enda ulih diempu tauka dikuingka siku aja. Semua artis enggau orang ti aktif ba pengawa seni patut begulai sejalai enggau pangan diri.
SAMBUT PEMINAT
Nyaut tanya pasal sambut peminat, Andy madah iya semampai nerima sukung ti chukup badas ari bala bakih iya.
“Sekumbang aku ke udah nyadi penanyi, semua show aku nerima sambut ti chukup badas. Aku rinduka semua orang. Prinsip idup ngajar aku ngaga pemadas dulu ari utai bukai. Aku mega pechaya pemadas deka dibalas enggau pemadas. Nya mih kebuah aku enggai jai enggau orang dulu,” ku Andy ke diatu beumur 56 taun tang dipeda baka ke baru 30.
PESAN
“Aku meri besai terima kasih ngagai komposer, pemuzik enggau studio ke alai aku ngerikot. Terima kasih ngagai DJ radio, pangan fb, media enggau semua pengempu palan pemerindang ti kala ngambi aku belagu. Ke penudi, terima kasih ngaga bala peminat ti enda kala leju nyukung aku ari ngelama tu ti udah,” ku Andy BRC ngujungka randau kami duai.
Ngagai kita ti deka ngambi Andy BRC belagu tau betanya ari iya empu nengah nombor 011 27555 992.
DIKARANG MR TUBAI PENGERINDU