![](https://utusansarawak.com.my/wp-content/uploads/2020/08/4.-kenyalang-dua.jpg)
![](https://www.utusansarawak.com.my/wp-content/uploads/2020/08/4.-kenyalang-dua.jpg)
BANSA Iban kelia amat mayuh penti pemali. Nyadi penti pemali nya enda tau dilanggar tauka dilaban.
Kelimpah ari bebadi lesi laya parai, orang ke ngelaban pemali nya tau bulih penusah bukai baka buta mata enggau kena laban sekeda penyakit bukai.
MAYUH BANSA PEMALI
Nyadi pemali tu mayuh bansa, baka pemali ngereja sebengkah pengawa, mali makai dagin jelu tauka utai tumbuh, enggau mayuh bansa pemali bukai. Bisi nya mali makai Ular Sawa, mali Ripung, mali makup tauka Jugam, mali Kijang, mali Baya, baka peturun kami.
Bisi nya mali makai sebansa buah tauka sebansa sayur. Ambika banding, niang apai menya mali buah entekai, tang nyau dudi pemali nya dibuai orang ke nemu muai pemali.
Bala anak aku enda tau makai dagin Kijang laban ari tubuh indai sida mali Kijang enggaika kena sakit laan, iya nya belang kaki enggau jari.
Bisi kami serumah mali nanam lia lalu nyadi buta tegal dima apai tiri iya nanam lia maya agi mit ti ngujungka tudah tuai buta maya umur urung lima taun.
Dulu ari tu aku udah bisi nyerita pasal mali Tiung. Sekali tu aku deka ngenang pasal siti agi pemali nitihka tusui orang tuai kelia.
Nitih cherita dulu kelia bisi dua iku orang bujang bansa kitai Iban ke balat bendar bebakih enggau pangan diri. Seduai tu bisi penuyu, iya nya sama ngayap ngagai indu siku nya, lalu taja pan bebakih, seduai sama berebut deka jadi enggau indu ti sama.
Nyau kelama kuil kuil nadai temu penyadi, pulai alah meh iya ti tuai laban iya ke biak agi, lalu iya meh jadi enggau indu nya.
Meda diri alah laban bakih iya ke biak, angkat deh pedis amat meh ati iya ke tuai nya lalu betati deka munuh bakih iya nya tadi.
Ku pikir orang bujang nya – diatu kitai ngena nama Bujang – ”Ba puchuk kayu di pala umai aku din bisi lubang burung Kenyalang. Kayu nya tinggi amat. Manah aku mai iya kia, lalu ngasuh iya niki kayu nya, lak ka burung nya mantuk mata iya lebuh iya nyenguk ngagai lubang deka ngulihka burung nya. Iya tentu labuh lalu parai.”
Bisi mega iya berunding deka ngeju siku nya ari tebiang lakka iya labuh lalu parai.
Enda mengat lama udah bekau Bujang ke bisi runding nya tadi, iya lalu ngangau pangan iya nya, lalu ku iya, ”Oi Unggal! Aram tua ngambi anak Kenyalang ba kayu tinggi di pala umai aku din. Sayau amat enda dambi, tang aku tu enda tulihka burung nya, laban kayu nya tinggi, lalu enda mudah ditiki. Nuan landik niki, nuan meh ngulih burung nya ka tua. Aku tu sigi enda nemu niki.”
BUTA PANTUK KENYALANG
Seduai lalu bejalai ngagai pala umai iya, sereta lalu nuju pun kayu alai Kenyalang nya. Peda bakih iya amat bisi lubang burung Kenyalang. Nyadi burung Kenyalang tu besarang ba lubang dalam batang kayu ke tinggi bendar. Nya sigi pendiau bansa burung panjai patuk baka nya.
Bujang lalu ngasuh bakih iya niki. Siku nya enda chechamang lalu niki. Datai iya ba lubang Kenyalang, lalu nilik ngena mata sepiak ke dalam lubang. Angkat deh amat munyi ku runding Bujang nya tadi, pansut deh patuk Kenyalang lalu mantuk mata iya. Mata iya nya lalu buta enda ulih meda utai agi.
Nilik ga iya ngena mata sepiak, lalu dipantuk Kenyalang ga mata iya. Mata iya lalu sama buta kedua-dua piak.
Bepenusah bendar meh uchak nya laban mata dua piak sama enda ulih meda. Dia iya lalu ngangau Bujang tu tadi, ”Oi Unggal! Buta mata aku tu! Parai aku tu! Saup aku Unggal, minta kasih nuan mai aku pulai ke rumah.
”Au,” ku Bujang ke diau ba tanah, tang munyi nyawa iya nyau jauh, nyau rapas didinga.
”Anang guai pulai!” pia deh ku jaku tudah ke niki kayu sereta udah buta mata. ”Ma aku tu pulai. Parai aku tu. Mata aku nyau buta, enda nemu arung jalai agi,” ku tudah nyau kaung-kaung ngangau ari puchuk kayu.
Lalu ku saut Bujang nya, ”Au meh, deka aku ngema nuan pulai ke rumah, enti nuan deka meri bini nuan ngagai aku.”
Tudah ti buta nadai nemu saut agi, ”Nadai ku enggau meh,” ku iya nyaut. ”Ambi meh bini aku, asal ga nuan deka ngema aku pulai ke rumah.”
BUJANG GAGA ATI
Nama agi deh, gaga meh dalam ati Bujang ninga bakih iya deka meri bini ngagai iya.
Iya lalu ngema kaban iya ti buta, udah siku nya merurut nurun ari puchuk kayu tadi. Datai seduai ba umai, dia bisi kayu dua begembar nyengkar sungai. Lebuh Bujang ti ngema siku nya bejalai niti batang, batang nya lalu begilik. Iya ti ngema lalu terap, lalu kaki iya masuk entara batang kayu. Pah iya lalu teluit dia, sereta lalu patah.
Nya alai ku iya, ”Parai meh aku tu deh! Patah pah aku. Enda ulih bejalai agi meh aku. Uji nuan ngema aku.”
Ku saut kaban iya ti buta – diatu kitai ngena nama Buta – ”Kati ku aku ulih ngema nuan. Mata aku udah buta, kati aku ulih meda arung jalai?”
Udah nya Bujang nyaut, ”Nuan amat buta tang nuan tau bejalai. Aku tu lansik, tang enda tau bejalai. Nya alai manah nuan ngema aku, lagi aku madah tunga jalai.”
BESILIH NGEMA BAKIH
Seduai lalu besilih ngema pangan diri. Buta diatu ngema Bujang ke patah pah, lalu iya ti patah pah nya lalu madah kuing jalai ngagai Buta.
Nyau balat pemuas seduai ke kapul-kapul lubah nengah jalai umai, nengah titi, nengah emperan, niki munggu, nengah ai sungai, telajak kaki ba sebelah urat, ujung-ujung datai ga seduai ba rumah sida.
Orang pan tusah meh meda seduai sama teulih ka pemedis. Nyadi bini Buta pan enggai agi jadi enggau iya laban meda iya udah buta.
Udah nya datai ga Bujang ke udah patah pah, lalu nitir indu nya madah diri deka jadi enggau iya, tang enggai ga indu ti udah jadi enggau Buta nya. Ni indu nya deka, ga iya enda dapat gawa laban udah patah pah.
Lebu meh tudah Bujang, asa ngapa deka ngambi bini Buta, tang enda ga mujur. Seduai dua iku, sama enda nemu tunga tuju tegal udah sama bulih penusah, ti bepun ari Bujang ti balat gagit deka ngambi bini Buta. Tang diatu, nunda sema jaku tuai kitai Iban, seduai nya sama baka manuk lepas, jari bau tai. Seduai sama enda jadi enggau indu nya.
Tusah bendar meh seduai nya tadi, sama nadai orang ngibun, nadai orang meri makai. Buta tu ulih bejalai tang mata enda lansik; Bujang tu lansik tang enda ulih engkebut tegal udah patah pah.
Nyadi dalam rumah nya, seninjik bendar laban bisi siku indu ke balat balut lusung. Ni penyai gamal tudah agi. Indu tu sayauka Buta, meda iya enda nemu ngintu diri agi. Tambah mega, laban gamal tudah Buta tu sigat, ka tambah ke manah ulah enggau ati.
Indu lusung nya lalu ngintu iya, baka berapi ka iya, lalu ngiga orang ngubat mata iya ti pedis, ngichaka ulih ubat lalu pulai gerai sereta lansik baka selama.
Nya kelama Buta pan nyau nyadi suman, lalu mata iya sepiak pulai lansik baka ngelamatu, lalu sepiak ulih meda mimit. Tang lebuh iya deka begulai baru enggau bini iya suba, indu nya enggaika iya agi.
Nyadi indu lusung nya madah diri deka jadi enggau iya, nya alai seduai lalu jadi melaki bini.
Kira udah bisi bebulan udah nya, rambang (bini dulu) Buta suba pan jadi ga enggau lelaki bukai. Seduai bisi anak lelaki siku.
Buta seduai indu lusung ( diatu ngena nama Lusung) begulai manah jadi melaki bini lalu selalu besampi minta lusung bini iya gerai. Tudah Buta pan bebendar ga ngubat lusung bini iya lalu ngejungka gerai. Seduai pan bisi anak indu siku.
Peda gaya bala mensia rambau nya, bini dulu Buta enggau laki iya merinsa amat ngidupka diri. Seduai bagas bendar gawa tang semua utai enggai ulih.
Nyadi Buta seduai bini iya Lusung lantang bendar ngidupka diri. Seduai lantang agi ari bala orang bukai dalam rumah sida nya.
MIMPI MEDA KENYALANG
Nyadi malam siti, Buta bisi mimpi. Dalam mimpi iya meda burung Kenyalang. Tubuh iya baka gamal mensia, tang pala iya betangkung baka burung Kenyalang, lalu bepatuk.
Ku burung nya, ”Aku tu Raja Kenyalang. Nyadi aku sigi ngasuh nuan bulih utai, ngambika nuan lantang senang ngidupka diri. Tang nuan enda tau sekali-kali munuh burung Kenyalang. Kenyau ari diatu, nyentuk ka tubuh uchu ambu, ichit wit nuan jemah ila, mali munuh Kenyalang.
”Enti nuan bisi buya ngereja utai ke mali, nuan enggau uchu ambu nuan deka buta baka nuan suba.”
Udah nya Raja Kenyalang nya lalu lesap. Buta lalu tedani, nya baru nemu nya mimpi.
Tumu pagi nya, Buta lalu beguai nusui ngagai bini seduai anak iya pasal pemali sida sebilik, iya nya mali enda tau munuh Kenyalang enggai ka buta.
Nyadi anak bujang bini dulu Buta enggau laki dudi iya keran bendar deka jadi enggau anak dara Buta enggau bini dudi iya. Lelaki nya nguai ngagai bini iya lalu diau begulai enggau Buta seduai Lusung.
Bini dulu Buta, ke diatu nyadi isan iya, nyau suntuk bendar, lalu seruran datai nyanda padi ngagai Buta seduai Lusung. Semua perengka dalam bilik bini dulu iya abis dijual ngagai Buta seduai Lusung magang.
Nyau kelama, bini dulu Buta enggau laki dudi iya lalu bekuli ba Buta seduai Lusung, iya nya isan seduai. Isan bekuli ba isan. Tang nadai ku enggau meh nama kitai udah suntuk. Enda ulih kira agi pemalu, asal ga bisi utai dempa.
Buta seduai Lusung nyau majak lantang senang. Sida sebilik meh pengabis orang bisi reta, ka tambah ke begulai lantang senang enggau pangan diri.
Oleh TELESA EMPERAN