![](https://utusansarawak.com.my/wp-content/uploads/2020/11/Kid-playing-with-dog.jpg)
![](https://www.utusansarawak.com.my/wp-content/uploads/2020/11/Kid-playing-with-dog-1024x683.jpg)
Tusun Kesatu
“SEHARI tu, siku da agi orang bebadi nyawa laban penyakit rabies. Tu orang ti keenam udah bebadi nyawa laban penyakit nya,” pia ku munyi batang berita lemai nya. Pending Apat bediri ninga berita nya. Tiap-tiap kali bisi disebut penyakit rabies, ati iya gemerang.
Mua Apat bebali mirah. Isi iya tekala nya baka ke deka belaga. Pun bulu tak tumbuh. Pala iya sekejap berasai ngelu pinang. Sekejap udah nya, iya pulai baka selama. Tusah ati iya ensepi diri baka nya. Pendiau iya berasai enda nyamai. Tak nyemia gamal ukui ti dikesayauka iya menya mansa mua iya. Mua Apat berangat. Bisi asai ai tak lelinang sereta meili-ili ngisi kedua-dua kelupak mata iya lalu lilih ngagai kuyu iya.
“Aih, kasih nuan Teddy. Nuan diukum ukai laban penyalah nuan. Aku ke salah,” ku Apat betelai kediri. Atau iya asai ke digirau. Pedis asai ke ditanchum jarum. Taja munyi jaku iya enda pansut, terinsung pending iya ninga telai ati nya.
SIGAT ANAK UDUK
Pengingat Apat terebai mawa ngagai maya urung taun 1978 kelia. Maya nya Apat nyadi Pengetua ba Sekolah Menengah Lepong Berangan. Ba pun taun nya pangan iya bisi meri ngagai iya siku anak uduk setengah German Shephard. Anak uduk nya benung manah dikayam. Benung rindu meda iya, keba jaku sempama Iban bisi nyebut sigat anak uduk. Cute ku jaku rama orang kemaya tu. Ketiga-tiga anak Apat, kelebih agi anak lelaki iya, Ujang, balat angkunka Teddy. Teddy enda digaga ke sangkar. Lebuh siang, maya bala nembiak sekula mayuh, iya ditanchang ba baruh rumah Pengetua ba ujung knadang endur sekula. Lebuh malam iya dilepas. Maya Ujang nadai sekula, laban iya besekula sesyen pagi aja, iya mai anak uduk nya bejalai ba kandang sekula. Suah seduai iya bemain betikamka utai udah nya diambi baru. Ditikamka buah bol, Teddy jampat belanda, nagum buah bul mit nya, lalu mai nya pulai ngagai Ujang. Nya siti latih ke dikerinduka seduai. Lebuh Pengetua lepa, iya pan sama betundi enggau Teddy. Teddy nyau nyadi patih bendar. Diasuh duduk, iya uduk. Diasuh angkat, iya angkat. Disuruh ngambi utai ditikau, iya ngagai lalu ngambi utai nya, Dibai Ujang berumpak belanda iya gaga laban iya deras agi belanda ari Ujang. Enti ditikamka kayu ke atas angin, Teddy nemu nyambut kayu nya sambil engkechit sebedau nagum kayu nya. Iya ngetup kayu nya lalu manggum kayu nya dibai ngagai Ujang.
UKUI BESAI TUAI
Apat enggau Ujang balat siru enggau Teddy; diberi mandi enggau shampoo. Pulai mandi bulu iya dilap baka ke enggau mensia. Pemakai Teddy ama asi digulai sup dagin diambi ari lauk sida Apat sebilik. Kadang-kadang asi Teddy endang dipanduk kediri digulai enggau dagin rekung manuk. Pemakai iya suah dichampur enggau ubat vitamin dibeli ari kedai. Urung bulan Jun, Teddy udah mansang nyadi ukui ke besai tuai. Tubuh iya besai, bebulu bauh sereta alus lalu iku iya ensebam. Bulu ba mua enggau genturung idung iya bisi bepulau chelum. Urung kening, pending lalu ngagai rekung sereta kaki mua enggau kaki belakang terus ngagai engkapan dada enggau perut lalu ngagai pun pah iya, bulu iya kepayang. Belakang, kerigai enggau punggung lalu ngagai burit iya chelum indah enda baka kain ti dilempai ba belakang iya. Iku iya ari pun ngagai ujung, bulu iya kepayang. Semina puting iku iya baka ke nipak mua iya betumpuk chelum. Kedua-dua pending Teddy seruran bediri lalu iku iya selalu nunduk ke baruh tang ukai ga besirat iku. Taja pia lebuh iya ngengar, iku iya angkat lalu bulu iya ngerenjang,
Teddy baka ke ukai perenakan German Shepherd. Naka ke udah nya, Teddy jinak sereta enda garang. Jarang bendar iya dipeda tak ngenakutka orang taja pan gamal iya ke besai tinggi ngenakut. Taja pia, lebuh diperansang sereta diaska Ujang lebuh meda ukui ari luar bisi tama kandang endur sekula, iya lalu ngagai. Enti ukui datai nya ngelaban,Teddy nyadi mangah lalu ngerekak. Suah bendar ukui ke datai-datai rari tekala nya lebuh meda Teddy. Tu ti ngasuh Ujang gaga bendar. Teddy rindu betundi enggau Ujang lalu ningkap ba semin tauka tengah tanah lalu jari kanan iya dipanggai iya ba jari kiba. Teddy rindu duduk nyendi Apat semak-semak datai ke iya nyau beempit-empit enggau Tuan iya. Lebuh ngetu duduk, tapa kaki mua iya diatur iya entap lalu tubuh iya jurus. Nya ti ngasuh iya bisi datai ke nyauka tiga kaki peninggi. Lebuh duduk baka nya, Teddy rindu ngelurka dilah iya ti suah ngujungka liur iya beterenjui nitik.
Betampung…
Oleh JANTAN UMBAT