![](https://utusansarawak.com.my/wp-content/uploads/2021/03/Orang-melecur-kena-api.jpg)
![](https://www.utusansarawak.com.my/wp-content/uploads/2021/03/Orang-melecur-kena-api.jpg)
Tusun Kedua
DIDINGA bisi munyi orang nyerarat madahka diri mati. Munyi redup kaki orang belanda nujah geladak papan enggau gelegar rumah nya sesedum. Nya tetap munyi orang begau.
“Api! Api! Angus rumah kitai!” Didinga munyi orang manjung bereta, bala di bilik beterudus pansut ke ruai. Orang bekaban-kaban rari ke tanju.
Sekeda ba endur ke baruh enda chamang-chamang terejun ke tanah. Kaban indu beterais manjung minta tulung. Anak mit bekerit nyabak. Mayau bekekiau, manuk enggau itit bekekebap rari pansut ari pagar. Uduk meraung besirat iku rari ke babas. Orang bekerauh bekangauka pangan. Gamal utai nyengala naka iya ka kelam-kabut.
Ba maya ke sama, bala ke di ruai mayuh tegepang lalu tedadang. Sida ke gali ensugau angkat lalu belanda enda tentu temu tunga abis nempuh tiang. Sampal bala sedanah mindah begigaka ai. Sekeda sempat jampat nyapai pemadam api ti disangking ba tiang ruai. Sekeda belanda nuju munyi letup nya. Sekeda ke bukai sempat nyapai kapak deka dikena mungga ramu enggau mabak atap rumah awakka nyeraraka rumah ke apin angus.
DAUN API MANJUT
Bala ke bisi kerita diengkah besemak enggau rumah beguai-guai mindahka nya ngagai alai ke jauh agi sereta likun. Bisi orang belanda nuju letup nya. Bisi mega orang begau madahka orang bisi betu tang udah ditaban ke kelinik. Seninjik bisi siku orang empu kerita lalu nadai betangguh nabanka iya ke kelinik kenu. Nadai orang udah nemu sapa orang nya, sapa ke nabanka iya lalu bedau mega orang nemu pemalat betu iya.
Ba maya ke sama, dalam sekejap mata, peda daun api bechura mirah jera udah bedimbap manjut. Keterubah, iya nyambar urung baruh, udah nya nyelamar ngagai sadau lalu makai perabung. Asap tebal sereta chelum uram-uram kekepul ngemuchuk kayu. Kelekatan nyelepepai ditabanka ribut baka kaban burung ke terebai. Letup utai bemunyi ke kiba ke kanan; bisi aja munyi utai semerap-semerap. Munyi api nyau meretih sereta bedauh indah enda munyi api ke makai reban maya nunu. Ribut belabuh betiup deras lalu nyadi kabut. Nya ti ngasuh munyi api nyau gu-gu, deru-deru munyi guntur mabu. Nama utai kena pansa iya diempa iya aja; retung memagang. Daun api nyau bejila; nyau ngeninggi puchuk engkabang.
Iya nyau bela enggau puchuk nyiur sereta puchuk pinang. Diang api nya nadai ulih pangkang. Iya nyerarai ke ulu enggau ke ili niti perabung nadai utai nagang. Tak nadai utai enda dipakai. Tiang, tutup tiang, kasau, jempayan enggau menawa abis dititi api magang. Ramu ke diempa api nyau baka sempun lalu merentum bekeberai runtuh. Tiang nadai agi bekedegi; semua dipajuh api terus nyidi pun sida ke lubang tanah. Atap sepindik nyau baka plastik lebur, atap sing luluh, tiang semin runtuh. Nadai utai agi bediri. Semua rubuh. Rengka ramu sadau ke runtuh betugung lalu diempa api baka tugung panduk di umai maya ngebak. Tapak rumah nyau bebali baka tegalan.
NGANGAU BOMBA
Mensia tak temati kutu, beberap dada betungkat dagu. Sida nadai nemu utai dikereja, nyau enda nemu bejaku. Sampal tak teganggam asai ke demam. Dagu nyau gegetar asai ke baru pansut ari dalam ai udah nyelam. Bisi ke takut nyau asai ke deka bira enggau kemi. Sida tak semina ngemata, nyau nadai runding agi. Sida ke bisi telipon sempat ga ngangau bomba, tang nama dih guna nya? Ukai nya semak. Datai dia lagi ukai nya bisi ai semak kelimpah ari sungai. Bala penguan rumah panjai bela nadai jalai ngambi reta tengkira. Sida semina ulih ngidupka nyawa diri. Ni munyi bala ke nyabak bekerung. Mayuh ke manjung kaung-kaung.
“Aih naka mih kitai tu. Mati kitai tu. Nama penyadi, engka reta tengkira dia abis. Sayau mih tajau. Sayau senapang. Sayau padi. Sayau pengeraja. Abis tawak, abis bebendai, abis tikai, abis semua utai,” ku sabak kaban indu.
“Nama penyadi kitai tu? ku jaku deka begawai berantu belalu orang ke udah sulai, udah parai. Tu nama penyadi rumah udah nyadi amau, udah nyadi arang? Nama penyadi kitai wai, gari semina bisi di punggung, idup mua mata?” ku serebana bala bukai.
“Sapa-sapa ke nganguska rumah? Tak tabak ke api enggau iya!” ku putap enggau pari siku apai tuai ke enda ditemu bagi.
Naka penusah mih sida dia. Rumah udah nyadi amau enggau arang. Semina asap agi repuk-repuk makai tuga tiang. Enda datai setengah jam api nganguska rumah dua puluh pintu nya ti ngasuh nyauka dua ratus iku orang dia nadai agi endur diau. Naka penusah-nusah; ukai baka karam di ai. Karam di darat lenyau semua-mua utai. Semina pengingat agi tinggal.
Betampung…
Oleh JANTAN UMBAT