![](https://utusansarawak.com.my/wp-content/uploads/2020/12/Pic6.jpg)
![](https://www.utusansarawak.com.my/wp-content/uploads/2020/12/Pic6.jpg)
Tusun Ke-9
UGAT ANAK LIBAU-BUBAN
Ugat tu anak Libau-Buban seduai Nawie. Apai iya Libau tu tuai Iban Paku ke beberita ukai ketegal iya berani dalam pengawa ngayau tang laban ketegal ulah iya ti rurus ati, manah ati sereta taluk ngagai nembiak iya. Iya landik ngatur adat ngaduka nembiak redak enti sida bisi penyarut. Ketegal ke nyau tuai, buk iya nyau buban, nya alai iya digela orang “Buban”.
Ugat idup serambau enggau Linggir-Mali Lebu. Iya mega berani sereta tau matak serang. Tang iya enda sebulu enggau Linggir, laban iya begedika Laksamana Amir ke nyadi pengari perintah Brunei di Saribas ti ngumpul pupu padi ninting taun ari semua Iban enggau Melayu ba kandang menua sungai Batang Paku. Ketegal iya ke enggai dipegai perintah Sultan Brunei (Raja Merom) sereta enggai mayar chukai dia Ugat lalu belaya enggau Laksamana Amir di Nanga Buling, Spaoh. Ugat ngelar pengari Laksamana Amir ke ngumpul chukai padi ngena duku iya. Nya mih ti ngasuh Laksamana Amir ringat amat ngagai Ugat. Ugat lalu bekira deka angkat ngelaban Laksamana Amir, semua Iban Ulu Paku nyukung Ugat. Tang bala Iban ke diau di Anyut enggai nyukung Ugat laban Laksamana Amir bekaban amat enggau Linggir “Mali Lebu” enggau sida sebilik di Kerangan Pinggai.
UGAT BEBASAKA LINGGIR ‘MALI LEBU’
Meda baka nya Ugat pan enda nyadi ngelaban Laksamana Amir laban bebasaka Linggir “Mali Lebu” ti petunggal iya empu. Nya alai kena iya mantupka ati iya ke pedis sereta berani, Ugat berunding deka nguluka kayau anak. Keterubah nguluka kayau Ugat matak bala iya ngayau ngalahka Seru enggau Beliun ke diau di kandang menua Sarikei. Udah nyendiaka diri Ugat enggau bala iya pan bekejang bejalai ngulu sungai Paku. Udah dua malam di rantau jalai dia Ugat enggau bala iya pan datai di ulu Awik ke besabung enggau ulu Sarikei. Sida bemalam di ulu Awik lalu ngatur bala pengayau iya deka nyerang orang di sungai Sarikei pagi hari seiti. Ugat ngasuh manuk sabung iya Ramping, Doo, Ita enggau Japang mupuk dulu ari bala bukai urung sebatu. Sida empat enda ibuh mai barang semina senyata enggau terabai aja.
Nyau semak tengahari dalam pejalai seduai deka nuju rumah munsuh, Ramping seduai Doo mansa kebun pisang munsuh. Seduai pan munuh seiku indu munsuh ke benung nebas ensiang pun pisang iya. Bala munsuh bukai ke meda seduai munuh indu nya pan begau madahka bala Iban datai nyerang sida.
Ramping seduai Ita mai pala munsuh nya ngagai Ugat. Ugat irau amat ati ninga Ramping seduai Doo madahka iya bala munsuh bisi meda seduai munuh indu nya. Nya alai iya pan mai bala iya nikal pulai ke ulu Paku. Taja kayau iya ti deka ngalahka munsuh di sungai Sarikei balang, Ugat enda jera. Sekali tu iya mai bala iya ngayau ngalahka munsuh iya ke diau ari ili Wong Embuas di ili Batang Kerian. Maya tu nadai seiku Iban ke pindah ari Rimbas udah diau ari ulu Wong Embuas. Maya nya bala Iban menua Batang Kerian ke udah diuan bansa Iban semina di Melupa. Ketegal bansa Iban ke mimit diau dia, rumah panjai Iban ba Kerangan Arang bisi dua kali dialahka munsuh ari Julau.
NGAYAU MUNSUH BA WONG EMBUAS
Kena nyendiaka diri deka ngalahka munsuh iya, Ugat nguluka bala iya ke ulu Kerian ti alai sida ngaga perau pengayau. Udah perau pengayau nya tembu Ugat lalu nguluka bala iya undur ngili Sungai Kerian nuju rumah munsuh di Wong Embuas. Lebuh sida mansa menua ke dikumbai Setebuk, sida ninga nyawa orang rinchah amai datai ari ili. Nya alai Ramping seduai Japang lalu matak perau sida ke tebing lalu disurukka sida ba baruh dan kayu ke merundai ke ai. Sida belalai dia. Enda lama udah nya sida pan tepedaka sebuah perau panjai datai ari ili ke ngundan bala munsuh lelaki, indu enggau nembiak. Bala munsuh tu mudik deka ngabang ngagai rumah orang ke rami nikah ari ulu sida. Meda perau munsuh nya nyau semak-sesemak,Japang mai bala iya nyerang perau nya. Sida bekayuh ngansak semak agi ngagai perau bala munsuh nya. Datai sida ba perau munsuh nya Ramping seduai Japang lalu numbuk munsuh ngena sangkuh lalu bedengah dua iku munuh. Ugat ke ngeluan mega pan bedengah seiku agi.
Meda baka nya bala munsuh bendar amat ngetanka bala indu nembiak. Sida mega numbuk bala Ugat ngena seligi nibung lalu ngemakalka Unchie seduai Lunyai. Meda baka nya dia Ugat mai bala iya nikal baru ngulu Batang Kerian lalu pulai ke Paku.
MIMPI MEDA MAYUH ORANG DATAI
Dua tiga taun udah ke ngayau bansa bukai di Wong Embuas di ili Batang Kerian Ugat bisi mimpi. Iya bemimpi asai ke meda mayuh bala orang datai ngagai rumah iya di Nanga Tiang. Bala orang nya madahka sida ari Bangat lalu minta Ugat nirika gawai besai kena ngelaluka sida. Maya nya bala Iban di Ulu Paku diau begulai serumah betuaika Ugat seduai menyadi iya Kaya. Libau-Buban apai Ugat diau kediri di Ulu Samu, udah ke bebini jadi enggau Saap, sepengudah bini iya ti benama Nawie mati.
Nama utai empa mimpi aku nya, ku Ugat bejaku kediri. Iya pan ngelumuka sida serumah lalu nanyaka runding sida pasal mimpi iya nya. Ninga munyi nya, Kelass anak Saing madah, Ugat sigi patut nirika gawai besai udah ke menang ngelaban munsuh di Sarikei enggau di Wong Embuas di Kerian. Bala sida ke bukai mega besetuju enggau penemu Kelass.
GAWAI ENCHABUH ARUNG
Sebedau nirika gawai Enchabuh Arung, Ugat ngasuh tukang ukir ke pandai ngukirka iya tiang Chandi Uriek. Udah gawai nya nyau deka jadi, Ugat pan madahka Uyu apai Ikum ari Ulu Julau datai ngabang ngagai gawai iya nya lalu nyadi Tuai Gawai. Datai di rumah Ugat, Uyu apai Ikum meda ukir tiang chandi Ugat kelalu tuai. Iya madah, laban Ugat agi biak sereta apin suah matak kayau nya alai gawai Ugat nya apin tau nirika tiang ngemesai nya. Uyu nanyaka endur Libau “Buban” apai Ugat. Ugat madahka apai iya di Ulu Samu diau enggau bini baru iya. Ninga munyi nya Uyu madahka diri enda berani mutuska baka ni atur gawai nya sebedau iya berunding enggau Libau “Buban”. Ninga munyi nya, Ugat ngasuh bala iya ngambi apai iya di Ulu Samu. Udah Libau “Buban” datai, Uyu apai Ikum madah, ba penemu iya ukir tiang chandi ke kena Ugat begawai nya kelalu besai.
“Ugat agi kelalu biak sereta apin tau dikumbai tuai kayau. Nya alai ba penemu aku, manah agi enti gawai tu dipejadi atas nama nuan, ukai atas nama Ugat,” pia ku Uyu nambahka jaku iya tadi.
Libau pan setuju. Nya alai gawai nya ukai atas nama Ugat tang atas nama apai iya Libau “Buban”.
LINGGIR ALAH NGELABAN RAJA
Udah gawai nya mih Linggir “Mali Lebu” alah ngelaban bala Raja di Beting Maru dalam taun 1849. Ari rumah Ugat nya mega Kedit “Rindang” datai mantu Linggir-Mali Lebu betempuh enggau bala Raja di Nanga Peka empat hari udah perang Beting Maru. Udah alah, Linggir enggau bala Iban Paku pan nundukka perintah Raja. Ugat laban ke enggai dipegai sebarang perintah mai bala iya pindah ke Julau. Mayuh bala Iban ari Ulu Paku nitihka iya, tang sebedau sida pindah ke Julau sida dulu berimba menua Ulu Awik.
Apin lama udah Ugat pindah ke ulu Julau bala Enchana-Letan ari Karangan Pinggai di Paku mega pindah ke Awik dalam taun 1854. Tiga taun udah nya bala Minggat mega pindah ke Awik. Enda lama udah nya, enda mukai-mukai maya nebang taun sida ke datai di Julau, Ugat enggau bala iya kena rampit penyakit pedis perut. Meda baka nya, Ugat berumban mai bala sida ke sakit pulai ke Paku. Apin lama udah datai di rumah sida di ulu Paku, mayuh sida mati, nyengkaum Ugat empu. Ketegal pemati Ugat dia bala iya, pulai ke Paku magang, lalu enda pulai ke Julau agi, nya alai pemindah sida lalu balang ngapa. Puntan baka menasan jalai jelu, kabah baka buah merunjau ulu.
(Betampung ba Tusun Ke-10 minggu nyin ila)
Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146
Oleh Harry Usup Umbar